കാലടി സംസ്കൃത സർവകലാശാലയിലെ അധ്യാപക നിയമനങ്ങൾ..എം.ബി. രാജേഷ് സഖാവിന്റെ ഭാര്യയും പെട്ടു..ഞെട്ടിക്കുന്ന റിപ്പോർട്ട്..19 അധ്യാപകരുടെ നിയമനങ്ങൾ തെറിക്കും..
കാലടി ശ്രീശങ്കരാചാര്യ സംസ്കൃത സര്‍വകലാശാലയില്‍ 2021-ല്‍ നടത്തിയ 19 അധ്യാപക നിയമനങ്ങള്‍ക്ക് യാതൊരുവിധ സര്‍ക്കാര്‍ അംഗീകാരവുമില്ലെന്നാണ് സംസ്ഥാന ധനകാര്യ ഓഡിറ്റ് വിഭാഗം കണ്ടെത്തിയിരിക്കുന്നത്.റാങ്ക് പട്ടിക അട്ടിമറിച്ചാണ് നിയമനങ്ങള്‍ നടത്തിയതെന്ന ആക്ഷേപം മുന്‍പേ സജീവമായിരുന്നെങ്കിലും, വിസിയുടെ വിചിത്ര നടപടികള്‍ വ്യക്തമാക്കുന്ന തെളിവുകളാണ് ഓഡിറ്റ് റിപ്പോര്‍ട്ടിലുള്ളത്. സ്വജനപക്ഷപാതത്തിന്റെ ഭാഗമായി മാനദണ്ഡങ്ങള്‍ കാറ്റില്‍പ്പറത്തി നടത്തിയ ഈ നിയമന പരമ്പരകളില്‍ അന്നത്തെ ഭരണകക്ഷി നേതാക്കളുടെ ബന്ധുക്കളും ഉള്‍പ്പെട്ടിട്ടുണ്ടെന്നത് വിഷയം കൂടുതല്‍ സങ്കീര്‍ണ്ണമാക്കുന്നു.
മുന്‍ മന്ത്രി എം.ബി. രാജേഷിന്റെ ഭാര്യ നിനിത കണിച്ചേരി മലയാളം വിഭാഗത്തില്‍ അസിസ്റ്റന്റ് പ്രൊഫസറായി പ്രവേശനം നേടിയതും ഇതിലൂടെ വീണ്ടും കടുത്ത വിവാദച്ചുഴിയിലായിരിക്കുകയാണ്.ഡോ. ധര്‍മ്മരാജ് അടാട്ട് വൈസ് ചാന്‍സലറായിരുന്ന കാലത്താണ് സര്‍ക്കാരിന്റെയും സിന്‍ഡിക്കേറ്റിന്റെയും നിയമാനുസൃതമായ അനുമതികളില്ലാതെ ഈ തസ്തിക മാറ്റങ്ങളും നിയമനങ്ങളും നടപ്പിലാക്കിയത്. സര്‍ക്കാര്‍ നിര്‍ദ്ദേശിച്ചിട്ടുള്ള സംവരണ റോസ്റ്റര്‍ പൂര്‍ണ്ണമായും വഞ്ചിച്ചായിരുന്നു വിസിയുടെ നീക്കങ്ങള്‍. ഭിന്നശേഷിക്കാര്‍ക്കും പട്ടികവിഭാഗക്കാര്‍ക്കും നിയമപരമായി ലഭ്യമാകേണ്ട തസ്തികകള്‍ നല്‍കിയതിന്റെ രേഖകള്‍ ഹാജരാക്കാന്‍ ഓഡിറ്റ് വിഭാഗം സര്‍വകലാശാലയ്ക്ക് കര്‍ശന നിര്‍ദ്ദേശം നല്‍കി കത്തയച്ചു കഴിഞ്ഞു.
2019-ലെ രണ്ട് സിന്‍ഡിക്കേറ്റ് മിനിറ്റ്‌സുകള്‍ വിശദമായി പരിശോധിച്ചപ്പോഴാണ് വൈസ് ചാന്‍സലറുടെ അതിവിദഗ്ദ്ധമായ ക്രമക്കേടുകള്‍ ഓഡിറ്റ് വിഭാഗത്തിന്റെ നിരീക്ഷണത്തില്‍പ്പെട്ടത്. പല വകുപ്പുകളിലെയും അധ്യാപക ഒഴിവുകള്‍ വി.സി. സ്വന്തം നിലയില്‍ പരസ്പരം മാറ്റിമറിക്കുകയായിരുന്നു. ഒരു പ്രത്യേക വകുപ്പില്‍ അനുവദിച്ച ഒഴിവുകള്‍ മറ്റ് വകുപ്പുകളിലേക്ക് വകമാറ്റി സ്ഥാപിച്ച് പ്രിയപ്പെട്ടവര്‍ക്ക് വഴിയൊരുക്കിയെന്നും, ഇതിനൊന്നും സിന്‍ഡിക്കേറ്റിന്റെ സാധൂകരണം ലഭിച്ചിട്ടില്ലെന്നുമാണ് റിപ്പോര്‍ട്ടിലുള്ളത്.2018-ലെ വിജ്ഞാപന പ്രകാരം മൂന്ന് അസോസിയേറ്റ് പ്രൊഫസര്‍മാരെയും 16 അസിസ്റ്റന്റ് പ്രൊഫസര്‍മാരെയുമാണ് സര്‍വകലാശാലയില്‍ നിയമിച്ചത്.
അസോസിയേറ്റ് പ്രൊഫസര്‍ തസ്തികയില്‍ കെ.കെ. സുന്ദരേശന്‍ (സംസ്‌കൃതം വേദാന്തം),എം.സി. അബ്ദുള്‍ നാസര്‍ (മലയാളം), കെ.ബി. സെല്‍വമണി (മലയാളം) എന്നിവരാണ് പ്രവേശനം നേടിയത്.16 അസിസ്റ്റന്റ് പ്രൊഫസര്‍മാരുടെ വിജ്ഞാപനത്തിലാണ് എം.ബി. രാജേഷിന്റെ ഭാര്യ ആര്. നിനിത (കണിച്ചേരി) മലയാളം അധ്യാപികയായി ഇടംപിടിച്ചത്. നിനിതയ്ക്ക് പുറമെ ശീതള്‍ എസ്. കുമാര്‍ (സോഷ്യോളജി), ആര്. ഷര്‍മിള (ഫിലോസഫി), ശിവജ എസ്. നായര്‍, ആതിര ജാതവേദന്‍, നിധീഷ് കണ്ണന്‍, സി.കെ. സുജയ്കുമാര്‍, എം. അഷ്‌റഫ് (അഞ്ചു പേരും സംസ്‌കൃതം ജനറല്‍), സംഗീത തിരുവാള്‍, എ.എസ്. പ്രദീഷ് (ഇരുവരും മലയാളം), ആര്. അബ്ദുള്ള ഷാ, കെ. അബ്ദുള്‍ റഷീദ്, ടി.എസ്. രതി (മൂന്നു പേരും സംസ്‌കൃതം വ്യാകരണം), എ.ഇ. ഷെഫി, എം. അഭിലാഷ് (ഇരുവരും ഹിസ്റ്ററി),
കെ. കമറുന്നീസ (ഉര്‍ദു) എന്നിവരും നിയമനം നേടി.ധനകാര്യ ഓഡിറ്റ് വിഭാഗത്തിന്റെ ഈ കണ്ടെത്തലുകളോടെ മുന്‍ മന്ത്രി എം.ബി. രാജേഷിന്റെ ഭാര്യ നിനിത കണിച്ചേരിയുടെ അധ്യാപക ജോലി തെറിക്കുമോയെന്ന ചോദ്യമാണ് ഇപ്പോള്‍ ശക്തമാകുന്നത്.
https://www.facebook.com/Malayalivartha
