ക്യാച്ചിംഗ് ക്യാപ്ഷന്‍ ഇതായിരുന്നു മൂന്നു പാര്‍ട്ടിക്കാരുടെയും ഇത്തവണത്തെ ഇലക്ഷനിലെ ക്യാംപെയിനിലെ തന്ത്രം. അതേല്‍ക്കുകയും ചെയ്തു നന്നായിത്തന്നെ. ഞങ്ങള്‍ വന്നാല്‍ 'എല്ലാം ശരിയാവു'മെന്ന വാഗ്ദാനം, അതല്ല നാട് വളരണമെങ്കില്‍ ഞങ്ങളാണ് തുടരേണ്ടതെന്ന തിരുത്ത്, ഇത് രണ്ടുമല്ല കേരളം വഴിമുട്ടിയിരിക്കുകയാണെന്നും വഴി കാട്ടണമെങ്കില്‍ ഞങ്ങള്‍ വരേണ്ടിവരുമെന്നുമുള്ള വിദൂരശബ്ദം. പതിനാലാം കേരള നിയമസഭയില്‍ എല്‍ഡിഎഫ് മതി എന്ന് മലയാളികള്‍ തീരുമാനിച്ചതിന് പിന്നില്‍ അവരുടെ പ്രചരണ മുദ്രാവാക്യത്തിനും ഒരു പങ്കുണ്ട്. വെള്ളയടിച്ച ചുവരുകളില്‍ നീലയും ചുവപ്പും അക്ഷരങ്ങളില്‍ 'തങ്ങളുടെ സ്ഥാനാര്‍ഥിയെ വിജയിപ്പിക്കാന്‍'ആഹ്വാനമെഴുതിയ കാലത്തുനിന്ന് കേരളത്തിലെ തെരഞ്ഞെടുപ്പ് പ്രചരണരംഗം ബഹുദൂരം മുന്നോട്ടുപോയിരിക്കുന്നു. മുന്‍കാലങ്ങളില്‍ നിന്ന് വ്യത്യസ്തമായി മുന്‍നിര പരസ്യകമ്പനികളായിരുന്നു ഇത്തവണ മൂന്ന് മുന്നണികളുടെയും പ്രചരണത്തിന് ചുക്കാന്‍ പിടിച്ചത്. എല്‍ഡിഎഫിന് വേണ്ടി മൈത്രി അഡ്വര്‍ടൈസിംഗ്, യുഡിഎഫിന് വേണ്ടി പുഷ് ഇന്റഗ്രേറ്റഡ് കമ്യൂണിക്കേഷന്‍, എന്‍ഡിഎയ്ക്ക് വേണ്ടി ഗ്രാഫിന്‍ കമ്യൂണിക്കേഷന്‍ എന്നീ സ്ഥാപനങ്ങളാണ് പരസ്യപ്രചരണം നടത്തിയത്.
മുദ്രാവാക്യം വേണ്ടെന്ന് തീരുമാനിച്ചിരുന്നു; 'ട്രോളുകള്‍' മുന്‍കൂട്ടി കണ്ടിരുന്നു
(വേണുഗോപാല്‍, ക്രിയേറ്റീവ് ഡയറക്ടര്‍, മൈത്രി അഡ്വര്‍ടൈസിങ്)
ഇടത് മുന്നണിക്ക് ജനങ്ങളോട് പറയാനുള്ള കാര്യങ്ങള്‍ ഏറ്റവും താഴേത്തട്ടിലേക്ക് എത്തിക്കണമെന്നായിരുന്നു ഞങ്ങള്‍ക്ക് കിട്ടിയ പ്രാഥമിക നിര്‍ദേശം. പ്രധാന വാചകത്തിന് ഒരു മുദ്രാവാക്യസ്വഭാവം ഉണ്ടാവരുതെന്നും പറഞ്ഞിരുന്നു. മുദ്രാവാക്യങ്ങള്‍ എഴുതാന്‍ നമ്മളേക്കാള്‍ കഴിവുള്ള എത്രയോപേര്‍ പാര്‍ട്ടിയിലുണ്ട്. അപ്പോള്‍ അതുവേണ്ട ഒരു ക്യാച്ച്‌ലൈനാണ് ആവശ്യപ്പെട്ടത്. പല ഓപ്ഷന്‍സും കൊടുത്തിരുന്നു. അതില്‍നിന്നാണ് 'എല്‍ഡിഎഫ് വരും എല്ലാം ശരിയാവും' എന്ന 'വാഗ്ദാന'ത്തിലേക്ക് എത്തുന്നത്. ഭരണത്തിലിരിക്കുന്നവരേക്കാള്‍ പ്രതിപക്ഷത്തിരിക്കുന്നവര്‍ക്കാവും ഒരു വാഗ്ദാനം നല്‍കാനാവുക, അതാവും ജനം കൂടുതല്‍ വിശ്വസിക്കുക.
സോഷ്യല്‍ മീഡിയ ഇത്ര സജീവമായ ഒരു കാലത്ത് നമ്മള്‍ എന്തുതരം കമ്യൂണിക്കേഷന്‍ നടത്തിയാലും അതിനുമേല്‍ ട്രോളിംഗ് ഉണ്ടാവുമെന്നും അറിയാമായിരുന്നു. ചര്‍ച്ചകളുടെ സമയത്ത്തന്നെ നേതാക്കളുമായും ഇക്കാര്യം സംസാരിക്കുകയും അവര്‍ക്കത് ബോധ്യമാവുകയും ചെയ്തിരുന്നു. 'എല്‍ഡിഎഫ് വരും എല്ലാം ശരിയാവും' എന്ന് നമ്മള്‍ പറയുമ്പോള്‍ 'ഇപ്പൊ ശരിയാക്കിത്തരാം' എന്ന ഒരു ട്രോളാണ് ആദ്യം വരികയെന്നതും അറിയാമായിരുന്നു. ഒരുപക്ഷേ ആ പരസ്യവാചകത്തിന്റെ പ്രചാരം വര്‍ധിപ്പിച്ചതില്‍ സോഷ്യല്‍ മീഡിയയ്ക്ക് പങ്കുണ്ട്, ട്രോളുകള്‍ക്കും. പിന്നെ ഞങ്ങളുടെ ഇടയിലുള്ള ഒരു പറച്ചിലുണ്ട്. ഏത് തരം പബ്ലിസിറ്റിയും നല്ല പബ്ലിസിറ്റിയാണെന്ന്. നെഗറ്റീവ് പബ്ലിസിറ്റി എന്ന ഒരു സാധനമേ ഇല്ലെന്ന്.
നിലവില്‍ എന്തോ കുഴപ്പമുണ്ടെന്ന് ആ വാക്യത്തിലൂടെ മനസിലാക്കാന്‍ പറ്റും, എന്നാല്‍ അത് ശരിയാക്കാന്‍ പറ്റുന്നതാണെന്നും. ആ വലിയൊരു പ്രോമിസില്‍ ചവുട്ടിനിന്നുകൊണ്ട് ക്യാംപെയ്‌നിലൂടെ അതിനെ സാധൂകരിച്ച്, എന്തുകൊണ്ടാണ് അങ്ങനെ പറഞ്ഞതെന്ന് വിശദീകരിച്ചുള്ള ഒരു പ്രചരണമായിരുന്നു ലക്ഷ്യമാക്കിയത്. ഒന്നരമാസം നീണ്ടുനില്‍ക്കുന്ന ഒരു ക്യാംപെയ്ന്‍. ഞങ്ങള്‍ക്ക് വര്‍ക് ചെയ്യാനായും ഒന്നരരണ്ട് മാസം ലഭിച്ചിരുന്നു. ഏതായാലും വാക്ക് പൊലിച്ചു ഇനി കാത്തിരുന്ന് കാണാം.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha