സോളാര്‍ തട്ടിപ്പുകേസിലെ മുഖ്യപ്രതികളായ സരിത എസ് നായരെയും ബിജു രാധാകൃഷ്ണനെയും അറിയില്ലെന്ന് മുന്‍മന്ത്രി തിരുവഞ്ചൂര്‍ രാധാകൃഷ്ണന്‍. ഇവര്‍ തന്നെ കാണുകയോ സംസാരിക്കുകയോ ചെയ്തിട്ടില്ലെന്ന് തിരുവഞ്ചൂര്‍ സോളാര്‍ കമ്മീഷനില്‍ മൊഴി നല്‍കി. സരിത ഒരു തവണ തന്റെ ഫോണിലേക്ക് വിളിച്ചിരുന്നു. എന്നാല്‍ ഫോണെടുത്ത ഗണ്‍മാന്‍ അത് തനിക്ക് തരുന്നതിന് മുമ്പ് കോള്‍ കട്ടായി. തന്റെ ഫോണില്‍ നിന്നും 19 സെക്കന്റ് ദൈര്‍ഘ്യമുള്ള ഒരു കോള്‍ സരിതയുടെ ഫോണിലേക്ക് പോയിരുന്നതായി സംശയിക്കുന്നതായും തിരുവഞ്ചൂര്‍ ജസ്റ്റിസ് ജി ശിവരാജന്‍ കമ്മീഷനു മൊഴി നല്‍കി.

അതേ സമയം കേസിലെ മറ്റൊരു പ്രതിയായ സിനിമാസീരിയല്‍ താരം ശാലുമേനോനെ അറിയാമെന്ന് തിരുവഞ്ചൂര്‍ മൊഴി നല്‍കി. ശാലുമേനോന്റെ വീടുതാമസത്തിന് പോയിരുന്നു. അതൊരു സാമൂഹിക സദസ്സ് മാത്രമായിരുന്നതിനാലാണ് ആ പരിപാടിയില്‍ പങ്കെടുത്തത്. അവിടെ അന്ന് ബിജു രാധാകൃഷ്ണനെ കണ്ടതായി ഓര്‍മയില്ല. താന്‍ ആ ചടങ്ങില്‍ പങ്കെടുക്കുന്ന സമയം ശാലുമേനോന് എന്തെങ്കിലും കേസുള്ളതായി അറിഞ്ഞിരുന്നില്ലന്നും മുന്‍മന്ത്രി മൊഴി നല്‍കി. 

തലശ്ശേരി എസ്‌ഐ ബിജു ജോണ്‍ ലൂക്കോസ് സരിതയെ അറസ്റ്റ് ചെയ്യുന്നതിന് മുമ്പ് പെരുമ്പാവൂര്‍ പോലിസ് അവരെ അറസ്റ്റ് ചെയ്തത് മുകളില്‍ നിന്നുള്ള നിര്‍ദ്ദേശപ്രകാരമായിരുന്നോ എന്നറിയില്ല. താന്‍ ആഭ്യന്തര മന്ത്രിയായിരുന്ന കാലത്ത് അത്തരമൊരു നിര്‍ദ്ദേശം നല്‍കിയിരുന്നില്ലെന്നും തിരുവഞ്ചൂര്‍ കമ്മീഷനില്‍ മൊഴി നല്‍കി. തിരുവഞ്ചൂരിന്റെ വിസ്താരം 5ന് വീണ്ടും തുടരും.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha