തിരു: സംസ്ഥാന മനുഷ്യാവകാശ കമ്മീഷന്റെ ഉത്തരവുകള്‍ യഥാസമയം നടപ്പിലാക്കുന്നുണ്ടോ എന്ന്‌ പരിശോധിക്കുന്നതിന്‌ നിയമവകുപ്പില്‍ പ്രത്യേകം സംവിധാനം ഏര്‍പ്പെടുത്തുമെന്ന്‌ നിയമ മന്ത്രി കെഎം മാണി. സംസ്ഥാന മനുഷ്യാവകാശ കമ്മീഷന്‍ സംഘടിപ്പിച്ച മനുഷ്യാവകാശ ദിനാചാരണം ഉദ്‌ഘാടനം ചെയ്യുകയായിരുന്നു മന്ത്രി. മനുഷ്യാവകാശ കമ്മീഷന്റെ ഉത്തരവുകള്‍ കൃത്യമായി നടപ്പിലാക്കാതിരിക്കുമ്പോള്‍ ലംഘിക്കപ്പെടുന്നത്‌ സാധാരണക്കാരന്റെ അവകാശങ്ങളാണ്‌. നിയമവകുപ്പില്‍ പ്രത്യേക സംവിധാനം വരുന്നതോടെ വിവിധ വകുപ്പുകളിലേക്ക്‌ കമ്മീഷന്‍ അയക്കുന്ന ഉത്തരവുകള്‍ നടപ്പിലാക്കുന്നത്‌ ഉറപ്പുവരുത്താനാവുമെന്ന്‌ മന്ത്രി പറഞ്ഞു. കമ്മീഷനില്‍ ലഭിക്കുന്ന പരാതികളിന്‍മേല്‍ അവര്‍ വിവിധ വകുപ്പുകളോട്‌ ആവശ്യപ്പെടുന്ന വിശദീകരണം കൃത്യസമയത്ത്‌ നല്‍കാന്‍ വകുപ്പധ്യക്ഷന്മാര്‍ നടപടിയെടുക്കണമെന്നും മന്ത്രി പറഞ്ഞു.
സ്‌കൂള്‍-കോളേജ്‌ തലത്തില്‍ മനുഷ്യാവകാശ സംരക്ഷണം പാഠ്യപദ്ധതിയില്‍ ഉള്‍പ്പെടുത്താന്‍ നടപടിയെടുക്കും.
സംസ്ഥാന മനുഷ്യാവകാശ കമ്മീഷന്‌ ആസ്ഥാനമന്ദിരം നിര്‍മ്മിക്കുന്നതിന്‌ നഗരഹൃദത്തില്‍ സ്ഥലം അനുവദിക്കുമെന്നും അടുത്ത ബജറ്റില്‍ തുകു വകയിരുത്തുമെന്നും മന്ത്രി കെഎം മാണി അറിയിച്ചു. ജസ്റ്റിസ്‌ ജെ.ബി. കോശി കമ്മീഷന്‍ അധ്യക്ഷനായശേഷം ഏഴായിരിത്തിലധികം പരാതികള്‍ തീര്‍പ്പാക്കാന്‍ കഴിഞ്ഞത്‌ നേട്ടമാണെന്നും മന്ത്രി പറഞ്ഞു.
കമ്മീഷന്‍ അധ്യക്ഷന്‍ ജസ്റ്റിസ്‌ ജെ ബി കോശി അധ്യക്ഷനായിരുന്നു. കമ്മിഷന്‍ അംഗം ആര്‍ നടരാജന്‍ മുഖ്യപ്രഭാഷണം നടത്തി.
നിയമ വകുപ്പ്‌ സെക്രട്ടറി സി.പി രാമരാജ പ്രേമ പ്രസാദ്‌, ജയില്‍ ഡിജിപി ഡോ. അലക്‌സാണ്ടര്‍ ജേക്കബ്‌, കമ്മീഷന്‍ സെക്രട്ടറി ജി.എസ്‌. ഷൈലാമണി, ഫിനാന്‍സ്‌ ഓഫീസര്‍ എസ്‌. മുരളീധരന്‍, അഡ്വ. സുഭാഷ്‌ എസ്‌ ചന്ദ്‌ എന്നിവര്‍ പ്രസംഗിച്ചു.