ഇരുമ്പനം ഐഒസിയില്‍ ടാങ്കര്‍ ലോറിക്കാര്‍ ഇന്ന് മുതല്‍ അനിശ്ചിതകാല പണിമുടക്ക് തുടങ്ങി. ട്രാന്‍സ്‌പോര്‍ട്ടേഷന്‍ ടെന്‍ഡറിലെ അപാകം പരിഹരിക്കണമെന്നാവശ്യപ്പെട്ടാണ് ഐഒസി ബിപിസിഎല്‍ എച്ച്പിസിഎല്‍ കോര്‍ഡിനേഷന്‍ കമ്മിറ്റി സമരം നടത്തുന്നതെന്ന് രക്ഷാധികാരി കെടി സൈഗാള്‍ വ്യക്തമാക്കി. പുതിയ കരാര്‍ വ്യവസ്ഥ വന്‍കിട ട്രക്കുടമകളെ സഹായിക്കാന്‍ എന്നും ആരോപണമുയര്‍ന്നിട്ടുണ്ട്.

നേരത്തെ 610 ട്രക്കുകളായിരുന്നു ഇവിടെ നിന്നും സര്‍വീസ് നടത്തിയിരുന്നത്. എന്നാല്‍ ഇപ്പോള്‍ അത് 550 ആയി വെട്ടിച്ചുരുക്കി. പുതിയ കരാര്‍ പ്രകാരം 50 ട്രക്കുകളെങ്കിലും ഉള്ളവര്‍ക്ക് മാത്രമേ സര്‍വീസ് നടത്താനുളള ലൈസന്‍സ് നല്‍കുന്നുള്ളൂ. ഇത് ഒന്നോ രണ്ടോ ട്രക്കുകളുള്ള ഉടമകളെ പ്രശ്‌നത്തിലാക്കിയ സാഹചര്യത്തിലാണ് സമരം പ്രഖ്യാപിച്ചത്.

നേരത്തെ 20000, 10000 ലിറ്റര്‍ വരെ സര്‍വീസ് നടത്തിയിരുന്ന ട്രക്കുടമകള്‍ക്ക് ഒരേ വേതനമാണ് നല്‍കിയിരുന്നതെങ്കില്‍ ഇപ്പോള്‍ അതിലും മാറ്റം വരുത്തിയിട്ടുണ്ട്. പ്രശ്‌നപരിഹാരത്തിനായി ഇന്നലെ കളക്ടറുടെ നേതൃത്വത്തില്‍ ചര്‍ച്ച നടന്നിരുന്നുവെങ്കിലും അത് വിജയിച്ചില്ല. തുടര്‍ന്നാണ് സമരം ആരംഭിച്ചത്. സംസ്ഥാനത്തിന്റെ വിവിധ ഭാഗങ്ങളിലേക്കായി ഇന്ധനവുമായി പ്രതിദിനം 600ലേറെ ലോഡാണ് ഇരുമ്പനം ഐഒസിയില്‍ നിന്ന് പോകാറുള്ളത്. സമരം തുടങ്ങുന്നതോടെ ഈ ഈ ഇന്ധനനീക്കം നിലയ്ക്കും. ഇതേ പ്രശനമുന്നയിച്ച് ഓണസമയത്ത് കോഓര്‍ഡിനേഷന്‍ കമ്മിറ്റി സമരം നടത്താന്‍ തീരുമാനിച്ചിരുന്നതാണ്. സര്‍ക്കാര്‍ ഇടപെട്ടതിനെ തുടര്‍ന്നാണ് അന്ന് സമരം മാറ്റിവച്ചത്.