സ്വകാര്യ ബസുകളുടെ മത്സരയോട്ടം തകര്‍ത്തത് ഒരു കുടുംബത്തിന്റെ പ്രതീക്ഷ. കണ്ണൂര്‍ താഴെചൊവ്വ റെയില്‍വേ ഗേറ്റിന് സമീപം സ്വകാര്യ ബസ് ബൈക്കിലിടിച്ച് വിദ്യാര്‍ത്ഥിനി മരിച്ചു. അച്ഛനൊപ്പം കോളേജിലേക്ക് പോവുകയായിരുന്ന കണ്ണൂര്‍ എസ്എന്‍ കോളേജ് മൂന്നാം വര്‍ഷ ബിരുദ വിദ്യാര്‍ത്ഥിനി ആതിര(20)യാണ് മരിച്ചത്. വ്യാഴാഴ്ച രാവിലെ 8.45 ഓടെയാണ് അപകടം.
കണ്ണൂരില്‍ നിന്ന് കോഴിക്കോടേക്ക് പോകുകയായിരുന്ന ഒമേഗബസ്സാണ് ബൈക്കിലിടിച്ചത്. ഇടിയുടെ ആഘാതത്തില്‍ ആതിര ബസിനടിയിലേക്ക് തെറിച്ച് വീഴുകയായിരുന്നു. റോഡിലേക്ക് തെറിച്ചുവീണ വിദ്യാര്‍ത്ഥിനിയുടെ ശരീരത്തിലൂടെ ബസ് കയറിയിറങ്ങുകയായിരുന്നു. തല്‍ക്ഷണം മരിച്ചു. അപകടത്തില്‍ പരിക്കേറ്റ് ആതിരയുടെ അച്ഛനെ ആശുപത്രിയില്‍ പ്രവേശിപ്പിച്ചിരിക്കുകയാണ്.
ബസ് ജീവനക്കാര്‍ അപകടം നടന്ന ഉടന്‍ ഓടി രക്ഷപ്പെട്ടു. വിവരം അറിഞ്ഞെത്തിയ നാട്ടുകാരും വിദ്യാര്‍ത്ഥികളും ബസ് തല്ലിത്തകര്‍ത്തു. അമിത വേഗതയില്‍ പൊലീസ് നടപടിയെടുക്കുന്നില്ലെന്ന് ചൂണ്ടിക്കാട്ടി കണ്ണൂര്‍തലശ്ശേരി റോഡ് നാട്ടുകാര്‍ ഉപരോധിച്ചു. രാഷ്ട്രീയ നേതാക്കളും പൊലീസുകാരുമെത്തി ചര്‍ച്ച നടത്തിയതിനെ തുടര്‍ന്ന് ഉപരോധം അവസാനിപ്പിക്കുകയായിരുന്നു.