കോണ്‍ഗ്രസ്സും രാഷ്ട്രീയവുമെല്ലാം വിട്ടു,ഇനി എന്തെങ്കിലും ജോലി ചെയ്ത് ജീവിക്കണം: സി.ആര്‍ മഹേഷ്
കോണ്‍ഗ്രസ് ഉപാധ്യക്ഷന്‍ രാഹുല്‍ ഗാന്ധിയെ വിമര്‍ശിച്ചതിനു പിന്നാലെ യൂത്ത് കോണ്‍ഗ്രസ് സംസ്ഥാന വൈസ് പ്രസിഡന്റ് സി.ആര്‍. മഹേഷ് പാര്‍ട്ടി വിട്ടു. 'തല്‍ക്കാലം മറ്റു പാര്‍ട്ടികളിലേക്കില്ല, രാഷ്ട്രീയം വിടുകയാണ്, ഇനി മറ്റെന്തെങ്കിലും തൊഴില്‍ ചെയ്തു ജീവിക്കണം'-രാജി പ്രഖ്യാപിച്ചുകൊണ്ട് കൊല്ലത്തു നടത്തിയ വാര്‍ത്താ സമ്മേളനത്തില്‍ മഹേഷ് വ്യക്തമാക്കി. കോണ്‍ഗ്രസ് ഉപാധ്യക്ഷന്‍ രാഹുല്‍ ഗാന്ധി സ്ഥാനമൊഴിയണമെന്ന വിവാദ പ്രസ്താവനയ്ക്കു പിന്നാലെയാണു മഹേഷിന്റെ രാജി. കൊല്ലത്തെ യുവനേതാക്കളില്‍ പ്രമുഖനായിരുന്നു മഹേഷ്.
രാഷ്ട്രീയ പ്രവര്‍ത്തനം അവസാനിപ്പിക്കുകയാണ്. കോണ്‍ഗ്രസില്‍ ചീഞ്ഞു നാറി നില്‍ക്കാന്‍ ആഗ്രഹിക്കുന്നില്ല. ഇനിയും രാഷ്ട്രീയത്തില്‍ തുടരാന്‍ സാധിക്കില്ല. രാഷ്ട്രീയത്തില്‍നിന്ന് ഒന്നും ഉണ്ടാക്കിയിട്ടില്ല, ഒന്നും ഉണ്ടാക്കണമെന്നും ആഗ്രഹിച്ചിട്ടില്ല. ജനങ്ങളുടെ പ്രശ്‌നങ്ങളില്‍ ഇനിയും ഇടപെടുമെന്നും മഹേഷ് പറഞ്ഞു. കഴിഞ്ഞ നിയമസഭാ തിരഞ്ഞെടുപ്പില്‍ ഇടതുതരംഗം ഉണ്ടായപ്പോഴും കരുനാഗപ്പള്ളിയില്‍ നേരിയ വോട്ടുകള്‍ക്കാണ് സി.ആര്‍. മഹേഷ് തോറ്റത്.
അതേസമയം, സി.ആര്‍. മഹേഷിനെ സസ്‌പെന്‍ഡ് ചെയ്തതായി യൂത്ത് കോണ്‍ഗ്രസ് ദേശീയ നേതൃത്വം അവകാശപ്പെട്ടു. രാഹുല്‍ ഗാന്ധിക്കെതിരായ പരാമര്‍ശത്തെ തുടര്‍ന്നാണ് നടപടി. രാജി പ്രഖ്യാപിക്കുന്നതിനു മുന്‍പാണ് സസ്‌പെന്‍ഷനെന്നും ദേശീയ നേതൃത്വം അറിയിച്ചു.
പാര്‍ട്ടി നേതൃത്വം ഏറ്റെടുക്കാന്‍ കഴിയില്ലെങ്കില്‍ രാഹുല്‍ ഗാന്ധി സ്ഥാനം ഒഴിയണമെന്നായിരുന്നു മഹേഷിന്റെ വിവാദ പ്രസ്താവന. കെ.എസ്.യു വളര്‍ത്തി വലുതാക്കിയ എ.കെ.ആന്റണി ഡല്‍ഹിയില്‍ മൗനിബാബയായി തുടരുകയാണ്. ഇന്ത്യന്‍ നാഷനല്‍ കോണ്‍ഗ്രസ് രാജ്യത്തുമരിക്കാതിരിക്കാന്‍ ഞങ്ങള്‍ മരിക്കാനും തയാറാണ്. പക്ഷേ, ഇനിയും ഈ സ്ഥിരം സെറ്റില്‍മെന്റ് രാഷ്ട്രീയം, ഗ്രൂപ്പ് കളി, തിരഞ്ഞെടുപ്പില്‍ മത്സരിക്കുന്നവരുടെ കാല് വാരല്‍, അഴിമതി, അവിഹിത ധനസമ്പാദനം, പ്രത്യയശാസ്ത്രപരമായ പാപ്പരത്വം, വിഴുപ്പലക്കല്‍ എന്നിങ്ങനെയുള്ള സ്ഥിരം നിര്‍ഗുണങ്ങളുമായി മുന്നോട്ടു പോകാന്‍ സാധിക്കില്ലെന്നും മഹേഷ് പറഞ്ഞിരുന്നു.
മഹേഷിന്റെ പ്രസ്താവനയെ പല കോണ്‍ഗ്രസ് നേതാക്കളും വിമര്‍ശിച്ചിരുന്നു. നേരത്തെയും പാര്‍ട്ടിയുടെ കേന്ദ്ര-സംസ്ഥാന നേതൃത്വങ്ങള്‍ക്കെതിരെ മഹേഷ് രംഗത്തെത്തിയിട്ടുണ്ട്.
https://www.facebook.com/Malayalivartha
