ഉപരിപഠനത്തിനു ജര്‍മനിയില്‍ പോകാനായി വിമാനത്താവളത്തിലേക്കു പോകുമ്പോള്‍ യുവ ഡോക്ടര്‍ വാഹനാപകടത്തില്‍ മരിച്ചു. എംസി റോഡില്‍ പുല്ലുവഴിയില്‍ കാറും ലോറിയും കൂട്ടിയിടിച്ചു കോട്ടയം മരങ്ങാട്ടുപിള്ളി പാലയ്ക്കാട്ടുമല തെരുവത്ത് ടി.ടി. തോമസിന്റെ മകന്‍ ഡോ. ആകാശ് തോമസ് (26) ആണു മരിച്ചത്.

കാര്‍ ഓടിച്ചിരുന്ന തോമസ് (ജോയി), ഭാര്യ സൂസമ്മ (ഉഷ) എന്നിവരെ ഗുരുതര പരുക്കുകളോടെ ആലുവ ചുണങ്ങംവേലിയിലെ സ്വകാര്യ ആശുപത്രിയില്‍ പ്രവേശിപ്പിച്ചു. സൂസമ്മയുടെ നില അതീവ ഗുരുതരമാണെന്ന് ഡോക്ടര്‍മാര്‍ പറഞ്ഞു. ജര്‍മനിയില്‍ എംഡിക്കു പഠിക്കുന്ന ആകാശിനെ കൊച്ചി രാജ്യാന്തര വിമാനത്താവളത്തില്‍ യാത്ര അയയ്ക്കുന്നതിനായി പോകുമ്പോള്‍ ഇന്നലെ പുലര്‍ച്ചെ 1.30നു കര്‍ത്താവുംപടി റോഡിലേക്കു തിരിയുന്ന ഭാഗത്താണ് അപകടം.

എതിരെ വന്ന ലോറിയുമായി കൂട്ടിയിടിച്ചു കാറിന്റെ മുന്‍ഭാഗം പൂര്‍ണമായി തകര്‍ന്നു. നാട്ടുകാര്‍ മൂവരെയും ചുണങ്ങംവേലിയിലെ ആശുപത്രിയിലെത്തിച്ചെങ്കിലും ആകാശ് മരിച്ചു. ആകാശ് രണ്ടു മാസമായി നാട്ടിലുണ്ടായിരുന്നു. ഓസ്‌ട്രേലിയയിലുള്ള സഹോദരങ്ങളെ സന്ദര്‍ശിച്ച ശേഷം ജര്‍മനിക്കു പോകാനായിരുന്നു തിരുമാനം. ഇന്നലെ അര്‍ധരാത്രിയോടെയാണ് ആകാശും ടി.ടി. തോമസും സൂസമ്മയും പാലയ്ക്കാട്ടുമലയിലെ വീട്ടില്‍ നിന്നു യാത്ര തിരിച്ചത്.

മൃതദേഹം പോസ്റ്റ്‌മോര്‍ട്ടത്തിനു ശേഷം പാലാ മരിയന്‍ ആശുപത്രിയില്‍ സൂക്ഷിച്ചിരിക്കുകയാണ്. സംസ്‌കാരം പിന്നീട്. പിതാവ് ടി.ടി. തോമസ് റിട്ട. ഹെഡ്മാസ്റ്ററും മാതാവ് സൂസമ്മ റിട്ട. എസ്ബിടി അസി. മാനേജരുമാണ്. ഡോ. ആകാശ് അരുണാപുരം മരിയന്‍ മെഡിക്കല്‍ സെന്ററില്‍ സേവനമനുഷ്ഠിച്ചിട്ടുണ്ട്. സഹോദരങ്ങള്‍: ആശിഷ്, ആനന്ദ്.