പ്രമുഖ ഫൈനാന്‍സിങ്ങ് സ്ഥാപനമായ ഗോകുലം ഗ്രൂപ്പില്‍ നടന്ന റെയ്ഡില്‍ കണ്ടെത്തിയത് 1100 കോടി രൂപയുടെ നികുതിവെട്ടിപ്പ്. അനധികൃതസ്വത്ത് കണ്ടെത്തിയതിനേത്തുടര്‍ന്ന് ഗോകുലം ഗ്രൂപ്പ് പിഴയടക്കാമെന്ന് ആദായവകുപ്പിന് സത്യവാങ്മൂലം നല്‍കി. നികുതിയിനത്തില്‍ 330 കോടി രൂപയും പിഴയും ഗോകുലം ഗ്രൂപ്പ് അടക്കേണ്ടി വരും.
ഗോകുലം ഗോപാലന്റെ നേതൃത്വത്തിലുളള ഗോകുലം ഫിനാന്‍സിന്റെ രാജ്യമെമ്പാടുമുളള ശാഖകളില്‍ ആദായനികുതി വകുപ്പ് റെയ്ഡ് നടത്തിയിരുന്നു. ഏപ്രില്‍ 19നാണ് ആദായനികുതി വകുപ്പിന്റെ പ്രത്യേക സംഘങ്ങള്‍ കേരളത്തിലും തമിഴ്‌നാട്ടിലുമുളള ശാഖകളില്‍ അന്വേഷണം ആരംഭിച്ചത്.
ഗോകുലം ഫിനാന്‍സ് നികുതി വെട്ടിപ്പ് നടത്തുന്നതായി നേരത്തെ ആദായനികുതി വകുപ്പിന് പരാതി ലഭിച്ചിരുന്നു. ഇതിന്റെ അടിസ്ഥാനത്തില്‍ കഴിഞ്ഞ മൂന്നുമാസമായി ഗോകുലം ഫിനാന്‍സിനെ ആദായ നികുതി വകുപ്പ് നിരീക്ഷിച്ച് വരികയായിരുന്നു. തുടര്‍ന്നാണ് റെയ്ഡ് നടത്താനുളള തീരുമാനം ഉണ്ടാകുന്നത്.
കേരളത്തിലെ ഗോകുലം ഫിനാന്‍സിന്റെ 30 ശാഖകളിലും തമിഴ്‌നാട്ടിലെ 25 ശാഖകളിലുമാണ് ഒരേസമയം ആദായ നികുതി വകുപ്പ് ഉദ്യോഗസ്ഥര്‍ പരിശോധന നടത്തിയത്. ഇത് കൂടാതെ ഗോകുലം ഗോപാലന്റെ കേരളത്തിലും തമിഴ്‌നാട്ടിലുമുളള വീടുകളിലും പരിശോധന നടത്തിയിരുന്നു.