വിദ്യാര്ത്ഥികളുടെ ആത്മവിശ്വാസം തകര്ത്തു കളഞ്ഞ് നീറ്റ് പരീക്ഷ
ഞായറാഴ്ച നടന്ന നീറ്റ് പരീക്ഷ വിദ്യാര്ത്ഥികളുടെ ആത്മവിശ്വാസം തകര്ത്തുകളഞ്ഞ പീഡനത്തിന്റെ മറ്റൊരു എന്ട്രന്സ്. മിക്ക പരീക്ഷ കേന്ദ്രങ്ങളിലും കണ്ണിരോടെയാണ് വിദ്യാര്ഥിനികള് ഹാളിലേക്ക് കയറിയത്. ആദ്യഘട്ട നാഷണല് എജിബിലിറ്റി എന്ട്രന്സ് പ്രവേശനപ്പരീക്ഷക്കെത്തിയ വിദ്യാര്ത്ഥിനികളുടെ അടിവസ്ത്രമഴിച്ചുള്ള പരിശോധനയില് വിദ്യാര്ഥിനികള് മാനസികമായി തകര്ന്നിരുന്നു. വളരെ കാലത്തെ കഠിനമായ പരിശ്രമങ്ങളെല്ലാം ഒറ്റനിമിഷം കൊണ്ടാണ് തകര്ന്നു പോയത്.
കണ്ണൂരിലെ ചില സ്വകാര്യ സ്കൂളുകളിലാണ് വിദ്യാര്ഥിനികളുടെ ബ്രായും ജീന്സും അഴിച്ച് പരിശോധന നടത്തിയത്. ചുരിദാറിന്റെ നീളമുള്ള കൈ മുറിച്ചുമാറ്റുകയുംചെയ്തു. പ്രവേശനപ്പരീക്ഷ നിബന്ധനകള് പാലിക്കാതെ എത്തിയവരെയാണ് പരിശോധനയ്ക്ക് വിധേയമാക്കിയത്. കുഞ്ഞിമംഗലം കൊവ്വപ്പുറം പിസ്ക് ഇംഗ്ലീഷ് മീഡിയം സ്കൂളിലാണ് സംഭവം. രാവിലെ 8.30ന് തുടങ്ങുന്ന പരീക്ഷയ്ക്ക് തൊട്ടുമുമ്പാണ് അധികൃതര് വിദ്യാര്ഥിനികളെ മെറ്റല് ഡിറ്റക്ടര് ഉപയോഗിച്ച് പരിശോധിച്ചത്. ലോഹക്കൊളുത്തുള്ള ബ്രാ ധരിച്ചെത്തിയ പെണ്കുട്ടികള്ക്കാണ് പരിശോധന പീഡനമായത്.
ക്ലാസ് മുറിക്കുള്ളില്വെച്ച് വസ്ത്രമഴിച്ച് ബ്രാ പുറത്തുനില്ക്കുന്ന അമ്മമാരുടെ കൈയില് കൊടുത്ത് അകത്തിരുന്ന് പരീക്ഷയെഴുതേണ്ടിവന്നു ഇവര്ക്ക്. പലരും നാണക്കേടുകൊണ്ട് കരഞ്ഞു. പയ്യാമ്പലത്തെ ഒരു തപാല്ജീവനക്കാരന്റെ മകള് ജീന്സാണ് ധരിച്ചിരുന്നത്. ആദ്യപരിശോധനയില് ജീന്സിലെ ലോഹബട്ടണ് മുറിച്ചുമാറ്റിച്ചു. അതിനുശേഷം ചെന്നപ്പോള് ജീന്സിലെ പോക്കറ്റ് ഒഴിവാക്കണമെന്നായി. പോക്കറ്റ് കീറിയാല് ശരീരം വെളിയില് കാണുമെന്നതിനാല് അച്ഛന് മറ്റൊരു വസ്ത്രം സംഘടിപ്പിക്കാന് ശ്രമിച്ചു. ഏറെ ദൂരെപ്പോയി കട തുറപ്പിച്ച് ലെഗ്ഗിന്സ് കൊണ്ടുവന്നാണ് മകള്ക്ക് നല്കിയത്.
ചെറുവത്തൂരിലെ അധ്യാപികയുടെ മകള്ക്കും ദൂരെപ്പോയി വസ്ത്രം വാങ്ങേണ്ടിവന്നു. അയല്വീട്ടുകാരായ സ്ത്രീകള് പലരും പെണ്കുട്ടികള്ക്ക് വസ്ത്രങ്ങള് നല്കാന് തയ്യാറായി. പരീക്ഷയ്ക്ക് തൊട്ടുമുമ്പാണ് ഇത്തരം നടപടികളുണ്ടായതെന്നതിനാല് പല കുട്ടികളും പരീക്ഷയെഴുതാന് വൈകി. കടുത്ത മാനസികസമ്മര്ദം അനുഭവിക്കേണ്ടിയും വന്നു.
അഞ്ചരക്കണ്ടി മലബാര് ഇംഗ്ലീഷ് മീഡിയം സ്കൂളിലും ചുരിദാറിന്റെ കൈ മുറിച്ചതായി പരാതി ഉയര്ന്നു. മാലൂര് അരയാരംകീഴില് ദേവാനന്ദിന്റെ മകള് വി. ചഞ്ചലിന്റെ ചുരിദാര് മുറിക്കാന് തുടങ്ങിയപ്പോള് കുട്ടി കരഞ്ഞു. പ്രശ്നമായതോടെ ഒരു കൈമാത്രം മുറിച്ചുനിര്ത്തി. വൈകുന്നേരം വീട്ടിലേക്ക് ഒറ്റക്കൈയുള്ള ചുരിദാറും ധരിച്ച് കുട്ടി വന്നപ്പോഴാണ് വീട്ടുകാര് സംഭവമറിയുന്നത്. പെണ്കുട്ടികളെ അപമാനിച്ചതില് സി.ബി.എസ്.ഇ. അധികൃതര്ക്കും മനുഷ്യാവകാശ കമ്മിഷനും പരാതി നല്കുമെന്ന് രക്ഷിതാക്കള് അറിയിച്ചു.
https://www.facebook.com/Malayalivartha
