സെന്കുമാര് കേസില് സുപ്രീം കോടതി പിഴ ചുമത്തിയിട്ടില്ലെന്ന് മുഖ്യമന്ത്രി; സര്ക്കാര് മാപ്പും പറഞ്ഞിട്ടില്ല; അഡ്വക്കറ്റ് ജനറലിന്റെ നിയമോപദേശത്തിലാണ് വ്യക്തത തേടിയത്
ഡിജിപി ടി.പി. സെന്കുമാര് വിഷയത്തില് ഇന്നും നിയമസഭ കലങ്ങിമറിഞ്ഞു. സെന്കുമാറിന് പൊലീസ് മേധാവിയായി പുനര്നിയമനം നല്കാനുള്ള സുപ്രീം കോടതി വിധിയില് വ്യക്തത തേടിയതിന്റെ പേരില് സര്ക്കാരിനു മേല് പിഴ ചുമത്തിയിട്ടില്ലെന്ന് മുഖ്യമന്ത്രി പിണറായി വിജയന് വ്യക്തമാക്കി. 25,000 രൂപ ലീഗല് സര്വീസ് അതോറിറ്റിക്കു നല്കാന് മാത്രമാണ് സുപ്രീം കോടതി നിര്ദേശിച്ചതെന്നും മുഖ്യമന്ത്രി നിയമസഭയെ അറിയിച്ചു. ഈ പണം ബാലനീതി ആവശ്യങ്ങള്ക്ക് വിനിയോഗിക്കാനും സുപ്രീം കോടതി ആവശ്യപ്പെട്ടതായി അദ്ദേഹം അറിയിച്ചു. പിഴ എന്ന വാക്ക് സുപ്രീം കോടതി ഉപയോഗിച്ചിട്ടില്ല എന്ന സാങ്കേതികതയില് ഊന്നിയാണ് മുഖ്യമന്ത്രിയുടെ വിശദീകരണം.
സെന്കുമാര് വിഷയത്തില് പ്രതിപക്ഷം നല്കിയ അടിയന്തര പ്രമേയ നോട്ടിസിനുള്ള മറുപടിയിലാണ് മുഖ്യമന്ത്രി ഈ നിലപാടു സ്വീകരിച്ചത്. കേസുമായി ബന്ധപ്പെട്ട് സര്ക്കാര് സുപ്രീം കോടതിയില് മാപ്പു പറഞ്ഞിട്ടില്ലെന്നും മുഖ്യമന്ത്രി വ്യക്തമാക്കി. ഇക്കാര്യത്തില് ആവശ്യമായ വിശദീകരണം തേടുക മാത്രമാണ് സര്ക്കാര് ചെയ്തത്. ഈ വിഷയം സഭ നിര്ത്തിവച്ച് ചര്ച്ച ചെയ്യാന് മാത്രം ഗൗരവകരമല്ലെന്നും അദ്ദേഹം മറുപടി നല്കി. അഡ്വക്കറ്റ് ജനറലിന്റെ നിയമോപദേശത്തിന്റെ അടിസ്ഥാനത്തിലാണ് വിധിയില് വ്യക്തത തേടി വീണ്ടും സുപ്രീം കോടതിയെ സമീപിച്ചതെന്നും മുഖ്യമന്ത്രി സഭയെ അറിയിച്ചു. അതേസമയം, സെന്കുമാര് കേസില് സര്ക്കാര് കോടതിയില് നല്കിയ പുനഃപരിശോധനാ ഹര്ജി പിന്വലിക്കാന് ധാരണയായി.
അതിനിടെ, പ്രതിപക്ഷത്തിന്റെ അടിയന്തരപ്രമേയ നോട്ടീസിന് സ്പീക്കര് നിബന്ധനകളോടെ അനുമതി നല്കി. കേസില് സര്ക്കാരിനുണ്ടായ നാണക്കേട് സഭ നിര്ത്തിവച്ച് ചര്ച്ച ചെയ്യണമെന്നായിരുന്നു പ്രതിപക്ഷത്തിന്റെ ആവശ്യം. കേസിന്റെ ചെലവിന് സര്ക്കാര് നല്കുന്ന പണം പൗരന്മാരുടെ പണമാണ്. അതിനാല് വിഷയം ചര്ച്ച ചെയ്യാന് മാത്രം പ്രാധാന്യമുള്ളതാണ്. സുപ്രീം കോടതി സര്ക്കാരിന് പിഴ വിധിക്കുന്നത് അപൂര്വമായ സംഭവമാണെന്നും പ്രതിപക്ഷ നേതാവ് രമേശ് ചെന്നിത്തല ചൂണ്ടിക്കാട്ടി.
കോടതിയുടെ പരിഗണനയിലിരിക്കുന്ന വിഷയങ്ങള് ഒഴിവാക്കണമെന്ന നിര്ദേശത്തോടെയാണ് നോട്ടീസിന് അനുമതി നല്കിയത്. ഇത്തരം വിഷയങ്ങള് അടിയന്തരപ്രമേയത്തിന്റെ പരിധിയില് വരുന്നതല്ല. ഇത് ഒരിക്കല് ചര്ച്ച ചെയ്ത വിഷയമാണ്. മാത്രമല്ല, വിഷയം കോടതിയുടെ പരിഗണനയിലുമാണെന്ന് സ്പീക്കര് ഓര്മിപ്പിച്ചു.
https://www.facebook.com/Malayalivartha
