18 വര്‍ഷമായി സംപ്രേക്ഷണം ചെയ്തുകൊണ്ടിരിക്കുന്ന സൂര്യ ടീവിക്കെതിരെ രൂക്ഷമായ പീഡനാരോപണം. ശമ്പള വര്‍ധനവും മറ്റ് ആനുകൂല്യങ്ങളും ആവശ്യപ്പെട്ട് ഒരുവിഭാഗം ജീവനക്കാര്‍ ഒന്‍പത് മാസമായി നടത്തിവന്ന സമരത്തോട് നിഷേധാത്മക സമീപനമാണ് മാനേജ്‌മെന്റ് പുലര്‍ത്തുന്നതെന്നും ജീവനക്കാരുമായി ഒരുവിധ ചര്‍ച്ചക്കും തയ്യാറാകുന്നില്ലെന്നും ജീവനക്കാരുടെ പ്രതിനിധികള്‍ ആരോപിച്ചു. ശമ്പള വര്‍ദ്ധനവ് മാനേജ്മെന്റിന് സൗകര്യമുള്ളപ്പോള്‍ നടപ്പാക്കുമെന്നുള്ള നിലപാട് സ്വീകരിച്ചതോടെ ജീവനക്കാര്‍ ഒന്നടങ്കം അനിശിചിതകാല സമരത്തിലേക്ക് നീങ്ങുകയായിരുന്നു. സൂര്യ ടി.വി സംപ്രേക്ഷണം തുടങ്ങി 18 വര്‍ഷത്തിനിടയില്‍ ഒരു തവണ മാത്രമാണ് ജീവനക്കാര്‍ക്ക് ബോണസ് നല്‍കിയത് എന്നു ജീവനക്കാര്‍ പറയുന്നു. പരാതിയുടെ അടിസ്ഥാനത്തില്‍ തൊഴില്‍ വിഭാഗം സൂര്യ ടി.വി.ഓഫീസില്‍ പരിശോധന നടത്തുകയും ക്രമക്കേടുകള്‍ കണ്ടെത്തുകയും ചെയ്തു. തൊഴില്‍ വകുപ്പ് നിര്‍ദ്ദേശിക്കുന്ന മാനദണ്ഡങ്ങളില്‍ 60 ശതമാനവും സ്ഥാപനം പാലിക്കുന്നില്ല എന്ന് പരിശോധനയില്‍ കണ്ടെത്തി.

ജീവനക്കാരുടെ നിരന്തരമായ ആവശ്യത്തെത്തുടര്‍ന്ന് 2016 ല്‍ ഓണത്തിന് 7000 രൂപ ബോണസ് അനുവദിച്ചു. എന്നാല്‍ പിന്നീട് ഈ തുക ശമ്പളത്തില്‍നിന്ന് പിടിക്കുകയും ചെയ്തു. ഉയര്‍ന്ന തസ്തികകളില്‍ ഉള്ളവര്‍ വന്‍ തുകകള്‍ ശമ്പളമായി വാങ്ങുമ്പോഴാണ് ചാനലിന്റെ സാങ്കേതികമേഖലകളില്‍ ഉള്‍പ്പെടെ പിന്നണിയില്‍ പ്രവര്‍ത്തിക്കുന്ന ജീവനക്കാരോട് മാനേജ്മെന്റിന്റെ ക്രൂരത.

ഓരോ ജീവനക്കാരനും വാര്‍ഷിക ഇന്‍ക്രിമെന്റായി 20 രൂപമുതല്‍ 172 രൂപ വരെ മാത്രമാണ് ശമ്പളത്തില്‍ കൂടുന്നത്. 10 വര്‍ഷമായി ക്യാമറാമാനായി സൂര്യ ടി.വി.യില്‍ ജോലി ചെയ്യുന്ന ഒരാള്‍ക്ക് വെറും 10000 രൂപയാണ് ശമ്പളമായി നല്‍കുന്നത്..ചാനലിലെ ജീവനക്കാരില്‍ 70 ശതമാനവും ഇത്തരത്തില്‍ കുറഞ്ഞ വേതനത്തില്‍ ജോലി ചെയ്യേണ്ടി വരുന്നവരാണ്. എന്നാല്‍ മാനേജ്മെന്റിന് താല്പര്യമുള്ളവരെ ജോലിക്കെടുക്കുമ്പോള്‍ ഉയര്‍ന്ന തുക ശമ്പളം നല്‍കും. ടി.വി.സീരിയയിലുകളുടെയും ചലച്ചിത്ര താരങ്ങളുമായി ബന്ധപ്പെട്ട പരിപാടികളുടെയും ഇടനിലക്കാരായി നില്‍ക്കുന്നവര്‍ക്ക് കമ്പനി വന്‍ തുകകള്‍ പ്രതിഫലമായി നല്‍കുന്നുവെന്നും ജീവനക്കാര്‍ ആരോപിക്കുന്നു. ശമ്പളവും മറ്റ് ആനുകൂല്യങ്ങളും വര്‍ധിപ്പിക്കണമെന്ന് ആവശ്യപ്പെട്ട് ജീവനക്കാര്‍ കഴിഞ്ഞ ഒന്‍പത് മാസമായി സമരത്തിലാണ്. സമരത്തെ നേരിടാന്‍ മാനേജമെന്റ് കണ്ട പ്രതിവിധി രണ്ട് ചാനലുകളുടെ ട്രാന്‍സ്മിഷന്‍ ഉള്‍പ്പെടെ ചെന്നൈയിലേക്ക് മാറ്റുക എന്നതായിരുന്നു. ഈ രണ്ടു ചാനലുകളിലെയും ജീവനക്കാരെ ജോലിയും ശമ്പളവും ഇല്ലാതെ കൊച്ചിയിലെ ഓഫീസില്‍ നിലനിര്‍ത്തി. ചാനലില്‍ നടക്കുന്ന തൊഴിലാളി ദ്രോഹങ്ങളെക്കുറിച്ച് ജില്ലാ ലേബര്‍ ഓഫീസര്‍ക്ക് ജീവനക്കാര്‍ പരാതി നല്‍കിയപ്പോള്‍ പ്രതികാരമെന്നോണം ഇവരെ ചെന്നൈ ഹൈദരാബാദ് ഓഫീസുകളിലേക്ക് സ്ഥലം മാറ്റുകയാണ് മാനേജ്മന്റ് ചെയ്തത്.