നട്ടുച്ചയ്ക്കു നടുറോഡില്‍ അപമാനിക്കാന്‍ ശ്രമിച്ചയാളെ പ്ലസ്ടു വിദ്യാര്‍ഥിനി തടഞ്ഞുവച്ച് പോലീസിനു കൈമാറി. ആലപ്പുഴ ജില്ലാകോടതി റോഡിലാണു സംഭവം. വിദ്യാര്‍ഥിനിയെ കടന്നുപിടിച്ച തിരുവനന്തപുരം മംഗലപുരം പഞ്ചായത്ത് രണ്ടാം വാര്‍ഡ് ചെമ്പകമംഗലം ഊരുകോണം മിനിവിലാസം വീട്ടില്‍ സതീഷാ(ബൈക്ക് സതീഷ്27)ണു പിടിയിലായത്.

ഇന്നലെ ഉച്ചയ്ക്കു പന്ത്രണ്ടോടെ പെണ്‍കുട്ടി കോടതിക്കു മുന്നിലൂടെ നടന്നുപോകുമ്പോള്‍ എതിരേവന്ന സതീഷ് അപമര്യാദയായി പെരുമാറുകയും തള്ളിമാറ്റിയപ്പോള്‍ കടന്നുപിടിക്കുകയുമായിരുന്നു. കുപിതയായ പെണ്‍ കുട്ടി ഇയാളെ തടഞ്ഞുവച്ചു. ഇതോടെ സംഭവം കണ്ടുനിന്ന മറ്റൊരാളും സഹായത്തിനെത്തി.

ഇരുവരും ചേര്‍ന്നു പ്രതിയെ രക്ഷപ്പെടാന്‍ സമ്മതിക്കാതെ പിടിച്ചുനിര്‍ത്തുകയും ആലപ്പുഴ നോര്‍ത്ത് പോലീസില്‍ വിവരമറിയിക്കുകയുമായിരുന്നു. ഇതോടെ വഴിയാത്രക്കാരുള്‍പ്പെടെ സതീഷിനെ വളഞ്ഞു. സ്ത്രീകളും രംഗത്തുവന്നു. പോലീസ് എത്തി ഇയാളെ കസ്റ്റഡിയിലെടുത്തശേഷമാണു പെണ്‍കുട്ടിയും ജനക്കൂട്ടവും പിന്മാറിയത്.

കൊലപാതകമുള്‍പ്പെടെ നിരവധി ക്രിമിനല്‍ കേസുകളില്‍പ്പെട്ടയാളാണു പ്രതിയെന്നു പോലീസ് ചോദ്യംചെയ്തപ്പോള്‍ വ്യക്തമായി. രണ്ടുദിവസം മുമ്പാണ് ഇയാള്‍ ജയില്‍ മോചിതനായത്. സംഭവസമയം ഇയാള്‍ക്കൊപ്പം ആലപ്പുഴ സ്വദേശികളായ രണ്ടുപേര്‍കൂടി ഉണ്ടായിരുന്നു. ഇവര്‍ ക്രിമിനല്‍ പശ്ചാത്തലമുള്ളവരും പ്രതിക്കൊപ്പം തിരുവനന്തപുരത്തു ജയിലില്‍ കഴിഞ്ഞവരുമാണ്. ആളുകള്‍ കൂടിയതോടെ ഇവര്‍ സ്ഥലംവിട്ടു.
വിദ്യാര്‍ഥിനിയുടെപരാതിയില്‍ അറസ്റ്റ് ചെയ്ത പ്രതിയെ ഇന്നു കോടതിയില്‍ ഹാജരാക്കുമെന്നു പോലീസ് പറഞ്ഞു.