എവിടെ നിന്ന് എന്നറിയാതെ അക്കൗണ്ടില്‍ വന്ന തുകയറിഞ്ഞ് മിഠായിക്കച്ചവടക്കാരന്‍ ഞെട്ടി. ഒന്നും രണ്ടുമല്ല 18 കോടി രൂപയാണ് അക്കൗണ്ടിലെത്തിയത്. താന്‍ കോടീശ്വരനായ വിവരം കിഷോര്‍ ലാല്‍ എന്ന 30വയസ്സുകാരന്‍ അറിയുന്നത് ആദായനികുതി വകുപ്പിന്റെ നോട്ടീസ് ലഭിക്കുമ്പോഴാണ്.

വീടുകള്‍ തോറും നടന്ന് ചോക്ലേറ്റ് വില്‍പന നടത്തിയാണ് കിഷോര്‍ ഉപജീവനമാര്‍ഗം കണ്ടെത്തിയിരുന്നത്. കുറച്ച് നാളുകള്‍ക്ക് മുമ്പ് കിഷോര്‍ പട്ടണത്തിലെ ശ്രീ രേണുകാ മാതാ മള്‍ട്ടിസ്‌റ്റേറ്റ് കോഓപ്പറേറ്റീവ് അര്‍ബന്‍ സൊസൈറ്റിയില്‍ അക്കൗണ്ട് തുറന്നിരുന്നു.

അടുത്തിടെ കിഷോറിന് ആദായനികുതി വകുപ്പ് സമന്‍സ് നോട്ടീസ് അയച്ചു. ഏതാനും മാസങ്ങള്‍കൊണ്ട് താങ്കളുടെ അക്കൗണ്ടില്‍ 18,14,98,815 രൂപ നിക്ഷേപിക്കപ്പെട്ടിണ്ടുണ്ടെന്നും അത് സംശയാസ്പദമാണെന്നുമായിരുന്നു നോട്ടീസില്‍.

നോട്ടീസ് ലഭിച്ചയുടനെ കിഷോര്‍ ആദായ നികുതി വകുപ്പിനെ സമീപിച്ചു. തന്റെ അക്കൗണ്ടില്‍ പണം വന്നതിനെക്കുറിച്ച് തനിക്കറിയില്ലെന്ന് ഇയാള്‍ അധികൃതരെ ബോധ്യപ്പെടുത്തി. സംഭവത്തില്‍ ബാങ്കിന് പങ്കുണ്ടോയെന്നാണ് ആദായ നികുതി വകുപ്പിന്റെ സംശയം. ബാങ്കിലെ സിസിടിവി ദൃശ്യങ്ങള്‍ ആദായ നികുതി വകുപ്പ് ആവശ്യപ്പെട്ടു.