കൊച്ചിയില്‍നിന്നു മത്സ്യബന്ധനത്തിനു പോയ ബോട്ടില്‍ ഇടിച്ച ആംബര്‍ എല്‍ എന്ന കപ്പിലിനെതിരേ മുമ്പും പരാതിയുണ്ടായിരുന്നതായി കോസ്റ്റല്‍ പോലീസിനു വിവരം ലഭിച്ചു. സുരക്ഷാ മാനദണ്ഡങ്ങള്‍ പാലിക്കാത്തതിനാല്‍ ഫെബ്രുവരിയില്‍ യുഎസിലെ പോര്‍ട്ട്‌ലാന്റില്‍ ദിവസങ്ങളോളം കപ്പല്‍ തടഞ്ഞുവച്ചിരുന്നതായാണ് വിവരം. കപ്പലിന്റെ പ്രവര്‍ത്തനം സംബന്ധിച്ച സുപ്രധാന രേഖകള്‍ പോലീസിന്റെയും കോസ്റ്റ് ഗാര്‍ഡിന്റെയും സംയുക്ത പരിശോധനയിലൂടെ കസ്റ്റഡിയിലെടുത്തിട്ടുണ്ട്.

ഫെബ്രുവരിയില്‍ ദിവസങ്ങളോളം പോര്‍ട്ട്‌ലാന്‍ഡ് തുറമുഖത്തു കപ്പല്‍ തടഞ്ഞുവച്ചതിന്റെ രേഖകള്‍ കോസ്റ്റല്‍ പോലീസിനു ലഭിച്ചിട്ടുണ്ട്. പാനമയില്‍ റജിസ്റ്റര്‍ ചെയ്ത ഈ ചരക്കുകപ്പല്‍ 2000ലാണു നിര്‍മാണം പൂര്‍ത്തിയാക്കിയത്. 185 മീറ്റര്‍ നീളവും 30 മീറ്റര്‍ വീതിയുമുള്ള കപ്പലിനു 48,282 ടണ്‍ ആണ് ആകെ ഭാരം. എന്നാല്‍, കപ്പലിന്റെ കേവുഭാരം (ഗ്രോസ് ടെന്നേജ്) 25,955 ടണ്‍. 

ഫോര്‍ട്ട്‌കൊച്ചി തീരത്തുനിന്ന് 30 നോട്ടിക്കല്‍ മൈല്‍ അകലെ ഞായാറാഴ്ച പുലര്‍ച്ചെ രണ്ടോടെയായിരുന്നു മത്സ്യബന്ധനത്തിനു പോയ ബോട്ടില്‍ കപ്പല്‍ ഇടിച്ചത്. തോപ്പുംപടി ഹാര്‍ബറില്‍നിന്നു വെള്ളിയാഴ്ച പുറപ്പെട്ട കാര്‍മല്‍മാത ബോട്ടാണ് അപകടത്തില്‍പ്പെട്ടത്. അപകടത്തില്‍ രണ്ടു പേര്‍ മരിച്ചു, ഒരാളെ കാണാതായി. ബോട്ടിലുണ്ടായിരുന്ന മറ്റു 11 പേര്‍ നിസാര പരിക്കുകളോടെ രക്ഷപ്പെട്ടു.