തൃശൂരിലെ സെക്യൂരിറ്റി ജീവനക്കാരനായ ചന്ദ്രബോസിനെ കൊന്ന കേസില്‍ കുറ്റവാളിയായ മുഹമ്മദ് നിഷാമിന്റെ കിംങ്‌സ് ബീഡി കമ്പനിയുടെ കോടികള്‍ വിലവരുന്ന നാലു കാറുകള്‍ കാണാതായെന്ന് പരാതി. കമ്പനിയുടെ മറ്റു പങ്കാളികളാണ് സിറ്റി പൊലീസ് കമ്മിഷണര്‍ക്കു പരാതി നല്‍കിയത്. കിങ്‌സ് ബീ!ഡി കമ്പനിയുടെ ഡയറക്ടര്‍മാര്‍ക്കു തുല്യാവകാശമുള്ള വാഹനങ്ങള്‍ നിഷാമുമായി ബന്ധമുള്ളവര്‍ കൊണ്ടുപോയെന്നാണ് പരാതി. കോടികള്‍ വിലമതിക്കുന്ന നാലു ആഡംബര കാറുകള്‍ അടുത്ത കാലംവരെ തൃശൂരിലുണ്ടായിരുന്നു.
ഇതേ കമ്പനിയുടെ ഉടമസ്ഥതയിലുള്ള ലംബോര്‍ഗിനി കാര്‍ എവിടെയാണെന്നു കണ്ടെത്താനായിട്ടില്ലെന്ന് പരാതിയിലുണ്ട്. കമ്പനിയുടെ പണം ഉപയോഗിച്ചു നിഷാം വാങ്ങാന്‍ നിശ്ചയിച്ചിരുന്ന രണ്ട് ആഡംബര കാറുകള്‍ക്കു ഒന്നേക്കാല്‍ കോടി അഡ്വാന്‍സ് നല്‍കിയതായി രേഖയുണ്ടെങ്കിലും ഈ കാറുകള്‍ വാങ്ങിയോ എന്നുറപ്പില്ലെന്നും പരാതിയില്‍ പറയുന്നു. കാറുകള്‍ എല്ലാംതന്നെ കമ്പനിയുടെ പൊതു ഫണ്ടുപയോഗിച്ചു വാങ്ങിയതാണെന്നും അതുകൊണ്ടുതന്നെ ഇതു നിഷാം മാത്രമായി ഉപയോഗിക്കുന്നതോ കൊണ്ടുപോകുന്നതോ തടയണമെന്നാണ് ആവശ്യം. കമ്പനി പൊതു അക്കൗണ്ടില്‍നിന്നു ഇവയ്ക്കു പണം അടച്ചതിന്റെ രേഖകള്‍ സമര്‍പ്പിച്ചു.