സര്‍ക്കാര്‍ ജീവനക്കാരുടെയും അധ്യാപകരുടെയും ആഗസ്തിലെ ശമ്പളവും ബോണസും മുന്‍കൂറും ഉത്സവബത്തയും 25 മുതല്‍ വിതരണം തുടങ്ങും. 25, 26, 29 തീയതികളിലാണ് ശമ്പളവിതരണം. പെന്‍ഷന്‍ 30ന് ലഭിക്കും. 24000 രൂപവരെ ശമ്പളമുള്ളവര്‍ക്ക് 4000 രൂപയാണ് ബോണസ്. ഇതിനുമുകളില്‍ 2500 രൂപ. കഴിഞ്ഞ വര്‍ഷം 1000 രൂപയില്‍ താഴെ ബോണസ് ലഭിച്ചവര്‍ക്ക് ഇത്തവണ 1000 രൂപയായി നിശ്ചയിച്ചു. ഇതിനുമുകളില്‍ 2500 രൂപയില്‍ താഴെ ലഭിച്ചിരുന്നവര്‍ക്ക് 100 രൂപ വീതം വര്‍ധിക്കും.

ബോണസിന് അര്‍ഹതയില്ലാത്തവര്‍ക്ക് 2750 രൂപ ഉത്സവബത്ത ലഭിക്കും. സ്ഥിരം ജീവനക്കാര്‍ക്ക് പുറമെയുള്ള വിവിധ വിഭാഗങ്ങള്‍ക്ക് 1000 മുതല്‍ 1210 രൂപവരെ ഉത്സവബത്ത അനുവദിച്ചിട്ടുണ്ട്. ഓണം മുന്‍കൂര്‍ 15000 രൂപവരെ അനുവദിക്കും. ഇത് അഞ്ചു ഗഡുക്കളായി തിരിച്ചടച്ചാല്‍ മതി. സര്‍ക്കാരുമായോ സര്‍ക്കാര്‍ സ്ഥാപനങ്ങളുമായോ സ്വയംഭരണസ്ഥാപനങ്ങളുമായോ ബന്ധപ്പെടുന്ന എല്ലാ ജീവനക്കാര്‍ക്കും തൊഴിലാളികള്‍ക്കും താല്‍ക്കാലികജീവനക്കാര്‍ക്കുമെല്ലാം ബോണസോ ഉത്സവബത്തയോ ഉറപ്പാക്കിയിട്ടുണ്ട്.

കേരളത്തിലെ തൊഴിലുറപ്പ് തൊഴിലാളികള്‍ക്ക് എല്‍ഡിഎഫ് സര്‍ക്കാരിന്റെ പ്രത്യേക ഓണസമ്മാനം. ഒന്നര ലക്ഷത്തോളംപേര്‍ക്ക് 1000 രൂപയാണ് പാരിതോഷികമായി നല്‍കുന്നത്. വര്‍ഷം 100 തൊഴില്‍ദിനം പൂര്‍ത്തിയാക്കിയവര്‍ക്കാണ് അര്‍ഹത. പൂട്ടിക്കിടക്കുന്ന പൊതുമേഖലാസ്ഥാപനങ്ങളിലെയും തോട്ടങ്ങളിലെയും തൊഴിലാളികള്‍ക്കും 2000 രൂപ വീതം നല്‍കും. സ്വകാര്യ തോട്ടങ്ങളില്‍ ഉള്‍പ്പെടെയുള്ള 20000 പേര്‍ക്കാണ് സഹായം (എക്‌സ്‌ഗ്രേഷ്യ) ലഭിക്കുന്നത്.

കശുവണ്ടിത്തൊഴിലാളികള്‍ക്ക് 2000 രൂപയും 10 കിലോഗ്രാം അരിയും ഓണസമ്മാനമായി ലഭിക്കും. പൂട്ടിക്കിടക്കുന്ന ഫാക്ടറികളിലെ തൊഴിലാളികള്‍ക്ക് 2000 രൂപയായിരിക്കും സഹായം. പൂട്ടിക്കിടക്കുന്ന ആലപ്പുഴ തുറമുഖത്തിലെ 300ല്‍പരം തൊഴിലാളികള്‍ക്ക് 5000 രൂപയും 10 കിലോഗ്രാം അരിയും അനുവദിക്കും. 

മെയ് മുതല്‍ ആഗസ്ത് വരെയുള്ള സാമൂഹ്യസുരക്ഷാ പെന്‍ഷന്‍ വിതരണത്തിന് ധനവകുപ്പ് 1952.92 കോടി രൂപ അനുവദിച്ചു. 2016 ജൂണ്‍മുതല്‍ 2017 ഏപ്രില്‍വരെയുള്ള പെന്‍ഷന്‍ നേരത്തെ വിതരണംചെയ്‌തെങ്കിലും വിവിധ കാരണങ്ങളാല്‍ കുറെപേര്‍ക്ക് ലഭിച്ചിരുന്നില്ല. ഇവര്‍ക്ക് കുടിശ്ശിക വിതരണംചെയ്യുന്നതിന് 129.97 കോടി രൂപയും അനുവദിച്ചു. പല കാരണങ്ങളാല്‍ പെന്‍ഷന്‍ അനുവദിക്കപ്പെടാതെപോയവര്‍ക്ക് പിന്നീട് പെന്‍ഷന്‍ അനുവദിച്ചിരുന്നു. ഇവര്‍ക്ക് 2016 ജൂണ്‍മുതല്‍ 2017 ഏപ്രില്‍വരെയുള്ള പെന്‍ഷന്‍ കുടിശ്ശിക 594.43 കോടി രൂപ അനുവദിച്ചു.
സര്‍ക്കാര്‍സഹായത്തോടെ പെന്‍ഷന്‍ നല്‍കുന്ന ക്ഷേമനിധി ബോര്‍ഡുകള്‍ക്ക് 2014 മുതല്‍ വിവിധ തരത്തിലുള്ള പെന്‍ഷന്‍ കുടിശ്ശിക നല്‍കുന്നതിന് 425.28 കോടി രൂപ നീക്കിവച്ചു. എല്ലാ സാമൂഹ്യസുരക്ഷാ പെന്‍ഷനുകളും 1100 രൂപയാക്കി ഉത്തരവിറക്കി. ഏപ്രില്‍ ഒന്നുമുതല്‍ ഇതിന് മുന്‍കാലപ്രാബല്യമുണ്ടാകും.