അന്ധമായ താരരാധന കേരളത്തെയും മാറ്റിമറിക്കുന്നു. തമിഴകത്തിന് താരങ്ങള്‍ രാഷ്ട്രീയത്തില്‍ ഇറങ്ങുന്നതും ഭരണം കയ്യാളുന്നതും പുത്തരിയല്ലെങ്കിലും കേരളത്തിന് അത് പുതുമയാണ്. ഇന്നസെന്റിനെ ഇറക്കി സീറ്റ് പിടിച്ചതാണ് മുകേഷിനെ ഇറക്കാന്‍ സിപിഎമ്മിന് ധൈര്യമായത്. എന്നാല്‍ ഇനി അണിയറയില്‍
നീക്കം നടക്കുന്നത് താരസിംഹങ്ങളെ കളത്തില്‍ ഇറക്കാനാണ്.നടന്‍ കമല്‍ ഹാസന്‍ സി.പി.എം പിന്തുണയോടെ തമിഴക രാഷ്ട്രീയത്തിലിറങ്ങും. തമിഴകത്ത് തുടങ്ങിയ അന്ധമായ താരാരാധ ഇപ്പോള്‍ കേരളത്തില്‍ എത്തിയതും പാര്‍ട്ടിക്ക് ഇതിന് ധൈര്യം നല്‍കുന്നു. മോഹന്‍ലാലിനൊപ്പം ആന്റണി പെരുമ്പാവൂരിനും കട്ടൗട്ടര്‍ ഉയര്‍ന്നത് സോഷ്യല്‍ മീഡിയയില്‍ വ്യാപക വിമര്‍ശനത്തിന് ഉയര്‍ന്നിരുന്നു. കേരളം താര ആരാധനയില്‍ തമിഴകത്തെ കടകത്തിവെട്ടുന്നുവെന്നാണ് ആരോപണം.

മുഖ്യമന്ത്രി പിണറായി വിജയനുമായി കൂടിക്കാഴ്ച നടത്തിയ കമല്‍ രാഷ്ട്രീയവും ചര്‍ച്ച ചെയ്തു. കമലിന്റെ രാഷ്ട്രീയ പ്രവേശനത്തിന് സിപിഎമ്മിന്റെ എല്ലാ പിന്തുണയും മുഖ്യമന്ത്രി വാഗ്ദാനം ചെയ്യുകയും ചെയ്തു. സി.പി.എം കേന്ദ്ര നേതൃത്വവുമായി അടുത്ത ബന്ധമുള്ള കമല്‍ മുഖ്യമന്ത്രി പിണറായി വിജയന്റെ അടുത്ത സുഹൃത്ത് കൂടിയാണ്.
കമലിലൂടെ തമിഴകം ചുവപ്പിക്കാമെന്ന പ്രതീക്ഷയില്‍ സി.പി.എമ്മും വലിയ പ്രതീക്ഷയിലാണ്. ഒപ്പം മമ്മൂട്ടിയെ അണിനിരത്തി കേരളവും പിടിക്കാമെന്നാണ് കണക്കുകൂട്ടല്‍.
കമലിനെ ഡി.എം.കെ മുന്നണിയിലെത്തിച്ചാല്‍ സി.പി.എമ്മിന് കൂടുതല്‍ സീറ്റുകള്‍ നല്‍കാമെന്നുമുള്ള ഡി.എം.കെ വാഗ്ദാനം സി.പി.എം തള്ളിക്കളഞ്ഞിരുന്നു. അതേസമയം സംസ്ഥാന സര്‍ക്കാറിനെ രൂക്ഷമായി കടന്നാക്രമിച്ച് തമിഴക രാഷ്ട്രീയത്തില്‍ കൊടുങ്കാറ്റ് വിതച്ചിരിക്കുകയാണ് ഉലകനായകന്‍ കമല്‍ ഹാസനിപ്പോള്‍.നേരത്തെ വിമാനത്താവളത്തില്‍ എത്തിയപ്പോള്‍ കൂടിക്കാഴ്ചയില്‍ രാഷ്ട്രീയവും ചര്‍ച്ചാ വിഷയമാകുമെന്ന് മാധ്യമ പ്രവര്‍ത്തകരോട് കമല്‍ പ്രതികരിച്ചിരുന്നു.

കേരളത്തിലേക്കുള്ള ഓരോ യാത്രയും പഠനയാത്രകളാണെന്ന് പറഞ്ഞ കമല്‍ ഇത്തവണ രാഷ്ട്രീയ കേരളത്തില്‍ കാല് കുത്തിയിരിക്കുന്നതെന്ന് വ്യക്തം. താരങ്ങള്‍ക്ക് നിര്‍ണ്ണായക സ്വാധീനമുള്ള തമിഴകത്ത് രജനി രാഷ്ട്രീയത്തിലിറങ്ങുമെന്ന് സൂചന നല്‍കിയെങ്കിലും ഇതു സംബന്ധിച്ച അനിശ്ചിതത്വം ഇപ്പോഴും തുടരുകയാണ്. ഈ സാഹചര്യത്തില്‍ കമലിന്റെ രാഷ്ട്രീയ പ്രവേശനത്തിന് വലിയ പ്രാധാന്യമുണ്ട്. സെക്രട്ടറിയേറ്റിലേക്കുള്ള യാത്രയിലാണ് താന്‍ ഇപ്പോഴെന്ന് കഴിഞ്ഞ ദിവസവും കമല്‍ വ്യക്തമാക്കിയിരുന്നു. എന്നാല്‍ സിനിമയില്‍ എന്നപോലെ രാഷ്ട്രീയത്തിലും കമലുമായി ഏറ്റുമുട്ടാന്‍ രജനി ആഗ്രഹിക്കുന്നില്ലന്ന റിപ്പോര്‍ട്ടുകളും ഇപ്പോള്‍ പുറത്തു വരുന്നുണ്ട്.

സി.പി.എം ഉള്‍പ്പെടെ സമാന ചിന്താഗതിയുള്ള വിഭാഗങ്ങളെ കോര്‍ത്തിണക്കി അഴിമതി വിമുക്ത മുന്നണിയുണ്ടാക്കി മത്സര രംഗത്തിറങ്ങാനാണ് കമലിന്റെ പദ്ധതി. സി.പി.എം നേതൃത്വത്തിനും ഇത്തരമൊരു വിശാല ഐക്യത്തിനാണ് താല്‍പ്പര്യം. കമ്യൂണിസ്റ്റ് ആശയത്തില്‍ ഉറച്ചു വിശ്വസിക്കുന്ന കമല്‍ സി.പി.എമ്മിനെ സംബന്ധിച്ച് തമിഴകത്ത് ഒരു തുറുപ്പ് ചീട്ടാണ്. കമലിന് പിന്തുണയായി മറ്റൊരു സി.പി.എം സഹയാത്രികനായ നടന്‍ മമ്മുട്ടിയും തമിഴകത്ത് പ്രചരണ രംഗത്തിറങ്ങിയേക്കും. കേരളത്തിലും മമ്മൂട്ടിയെ ഇറക്കാന്‍ ഇതിനുമുമ്പും ചര്‍ച്ചകള്‍ നടന്നിരുന്നു. തമിഴകത്തും അറിയപ്പെടുന്ന നടനാണ് മമ്മുട്ടി. മാത്രമല്ല കമല്‍ രാഷ്ട്രീയത്തിലിറങ്ങിയാല്‍ പ്രമുഖരായ ചില താരങ്ങളും അദ്ദേഹത്തോടൊപ്പം ചേരുമെന്നും അഭ്യൂഹമുണ്ട്. ജയലളിതയുടെ മരണത്തിനു ശേഷം താരാധിപത്യം ഇപ്പോള്‍ തമിഴക രാഷ്ട്രീയത്തിലില്ല. ഈ ശൂന്യത ഒഴിവാക്കാന്‍ കമലോ രജനിയോ രാഷ്ട്രീയത്തിലിറങ്ങണമെന്ന് തമിഴ് സിനിമാലോകവും ആഗ്രഹിക്കുന്നുണ്ട്. ജയലളിതയുമായി ഏറെ അടുപ്പമുണ്ടായിരുന്നതും കമലിനെ സംബന്ധിച്ച് പിടിവള്ളിയാണ്. പ്രത്യേകിച്ച് ഇരു അണ്ണാ ഡി.എം.കെയിലും ജനങ്ങള്‍ക്ക് വിശ്വാസം നഷ്ടപ്പെട്ട സാഹചര്യത്തില്‍.

ജയലളിതയുടെ സഹോദരി പുത്രി ദീപയെകൂടി തന്നോടൊപ്പം കൂട്ടാന്‍ കമല്‍ ആഗ്രഹിക്കുന്നുണ്ട്. സ്വന്തമായി രാഷ്ട്രീയ പാര്‍ട്ടി രൂപീകരിച്ചെങ്കിലും പുതിയ സാഹചര്യത്തില്‍ ദീപ കമലിനൊപ്പം ചേരാനുള്ള സാധ്യതയും തളളിക്കളയാന്‍ കഴിയുന്നതല്ല. അണ്ണാ ഡിഎംകെ മുഖ്യമന്ത്രി പളനി സ്വാമിക്കുള്ള പിന്തുണ ദിനകരന്‍ വിഭാഗം പിന്‍വലിച്ച സാഹചര്യത്തില്‍ ഏത് നിമിഷവും സര്‍ക്കാര്‍ താഴെ പോവുന്ന സാഹചര്യമാണ് നിലവില്‍.

അവിശ്വാസം കൊണ്ടുവരാന്‍ താല്‍പ്പര്യപ്പെടുന്ന പ്രതിപക്ഷമായ ഡി.എം.കെയ്ക്ക് കമല്‍ മറ്റൊരു മുന്നണി സംവിധാനം രൂപീകരിച്ചാല്‍ തങ്ങള്‍ക്ക് അത് തിരിച്ചടിയാകുമോയെന്ന ഭയവുമുണ്ട്. രാഷ്ട്രീയ ഉപദേശം തേടാന്‍ പിണറായിയെ തന്നെ സെലക്ട് ചെയ്ത കമലിന്റെ സെലക്ഷന്‍ എന്തായാലും മോശമാവില്ലന്നാണ് രാഷ്ട്രീയ നിരീക്ഷകരും വിലയിരുത്തുന്നത്.