മുതിര്‍ന്ന മാധ്യമപ്രവര്‍ത്തക ഗൗരി ലങ്കേഷിനെ കൊലപ്പെടുത്തിയ കേസില്‍ ഉടന്‍ സിബിഐ അന്വേഷണം നടത്തില്ലെന്ന് കര്‍ണാടക മുഖ്യമന്ത്രി സിദ്ധരാമയ്യ. അന്വേഷണത്തിനായി ഇന്‍സ്‌പെക്ടര്‍ ജനറലിന്റെ (ഐജി) നേതൃത്വത്തില്‍ പ്രത്യേക അന്വേഷണസംഘം രൂപീകരിച്ചതായി അദ്ദേഹം അറിയിച്ചു. അന്വേഷണം സിബിഐക്കു കൈമാറണമെന്ന ആവശ്യവുമായി കര്‍ണാടകയില്‍നിന്നുള്ള കേന്ദ്രമന്ത്രി സദാനന്ദഗൗഡ രംഗത്തെത്തിയിരുന്നു. സംഭവം പ്രത്യേക അന്വേഷണ സംഘം അന്വേഷിക്കണമെന്ന് മുതിര്‍ന്ന കോണ്‍ഗ്രസ് നേതാവ് എ.കെ. ആന്റണിയും ആവശ്യപ്പെട്ടു.

ഗൗരി ലങ്കേഷ് വധക്കേസിലെ പ്രതികളെ ഉടന്‍ പിടികൂടുമെന്ന് കര്‍ണാടക ഗതാഗതമന്ത്രി എച്ച്.എം.രേവണ്ണ ഉറപ്പുനല്‍കി. പൊലീസ് അന്വേഷണം തൃപ്തികരമായ നിലയിലാണ് പുരോഗമിക്കുന്നത്. സിസിടിവി ദൃശ്യങ്ങള്‍ പരിശോധിക്കുന്നുണ്ട്. അന്വേഷണത്തിന് മൂന്ന് സംഘങ്ങളെ നിയോഗിച്ചിട്ടുണ്ടെന്നും അദ്ദേഹം പറഞ്ഞു.

ഗൗരി ലങ്കേഷിന്റെ വസതിയുടെ വിവിധ ഭാഗങ്ങളില്‍ സ്ഥാനപിച്ചിട്ടുള്ള സിസിടിവി ക്യാമറകളിലെ ദൃശ്യങ്ങള്‍ അന്വേഷണ സംഘം പരിശോധിക്കുകയാണ്. ഗൗരി ലങ്കേഷ് കാറില്‍നിന്ന് ഇറങ്ങുന്നതും വെടിയേല്‍ക്കുന്നതും സിസിടിവിയില്‍ വ്യക്തമാണ്. ഹെല്‍മറ്റ് ധരിച്ച ഒരാളാണ് ഗൗരിക്കെതിരെ വെടിയുതിര്‍ത്തതെന്നും സിദ്ധരാമയ്യ പറഞ്ഞു. അതേസമയം, ഗൗരി ലങ്കേഷിന്റെ കൊലപാതകവുമായി ബന്ധപ്പെട്ട് സംസ്ഥാന സര്‍ക്കാരില്‍നിന്ന് കേന്ദ്രം റിപ്പോര്‍ട്ടു തേടി. കര്‍ണാടക ചീഫ് സെക്രട്ടറിയോടാണ് കേന്ദ്രം റിപ്പോര്‍ട്ട് തേടിയത്. ആഭ്യന്തരമന്ത്രി രാജ്‌നാഥ് സിങ് കേന്ദ്ര ആഭ്യന്തര സെക്രട്ടറിയോടും റിപ്പോര്‍ട്ട് നല്‍കാന്‍ ആവശ്യപ്പെട്ടിട്ടുണ്ട്.

ഗൗരി ലങ്കേഷിന്റെ വീടിനു പുറത്തുള്ള സിസിടിവി ക്യാമറകളില്‍നിന്ന് പ്രതികളിലൊരാളുടെ ദൃശ്യം പൊലീസിനു ലഭിച്ചിട്ടുണ്ട്. ഹെല്‍മറ്റും ബാഗും ധരിച്ച യുവാവിന്റെ ദൃശ്യമാണ് സിസിടിവിയിലുള്ളത്. ബസവനഗുഡി മുതല്‍ ഇയാള്‍ ഗൗരി ലങ്കേഷിനെ പിന്തുടര്‍ന്നിരുന്നതായി കണ്ടെത്തിയിട്ടുണ്ട്. കൂടുതല്‍ വിവരങ്ങള്‍ ശേഖരിക്കുന്നതിനായി അന്വേഷണ സംഘം ഉടന്‍ മംഗളൂരുവിലേക്ക് പോകും.

പ്രതികളെ കണ്ടെത്തുന്നതിനായുള്ള തിരച്ചില്‍ കര്‍ണാടക പൊലീസ് ശക്തമാക്കി. മുന്‍കരുതലെടുക്കുന്നതിന്റെ ഭാഗമായി ചെക്ക്‌പോസ്റ്റുകളിലും ടോള്‍ പാതകളിലും പരിശോധന നടത്തുന്നുണ്ട്. കര്‍ണാടക കൂടാതെ ആന്ധ്രാപ്രദേശ്, മഹാരാഷ്ട്ര, തമിഴ്‌നാട് എന്നിവിടങ്ങളിലേക്കും അറിയിപ്പു നല്‍കിയിട്ടുണ്ട്. ഗൗരി ലങ്കേഷിനെ എതിര്‍ത്ത് സമൂഹമാധ്യമത്തില്‍ പോസ്റ്റുകളിട്ട ഒരാളെ പൊലീസ് കസ്റ്റഡിയിലെടുത്തു. ഇയാള്‍ ഉള്‍പ്പെടെ ഒട്ടേറെപ്പേരെ ചോദ്യം ചെയ്തു വരികയാണെന്നും കര്‍ണാടക പൊലീസ് അറിയിച്ചു.

ഗൗരി ലങ്കേഷിന്റെ വധത്തിനു പിന്നില്‍ വാടകക്കൊലയാളികളാണെന്ന സംശയത്തിലാണ് അന്വേഷണ സംഘം. വീടിന്റെ വിവിധ ഭാഗങ്ങളിലായി സ്ഥാപിച്ചിരിക്കുന്ന സിസിടിവി ദൃശ്യങ്ങളില്‍നിന്ന് പ്രതികളിലേക്കു നയിക്കുന്ന സൂചനകള്‍ ലഭിക്കുമെന്ന പ്രതീക്ഷയിലാണ് പൊലീസ്.

രാത്രി എട്ടുമണിയോടെ വീട്ടിലെത്തിയ ഗൗരി ലങ്കേഷ് കാറില്‍ നിന്നിറങ്ങിയപ്പോഴാണ് അക്രമികള്‍ അവര്‍ക്കുനേരെ വെടിയുതിര്‍ത്തത്. ഏഴു തവണ വെടിയുതിര്‍ത്തെങ്കിലും നാലെണ്ണം ഉന്നം പിഴച്ച് വീടിന്റെ ഭിത്തിയിലാണ് തറച്ചത്. രണ്ടെണ്ണം ഗൗരിയുടെ നെഞ്ചിലും ഒരെണ്ണം ശിരസ്സിലും തറച്ചുകയറി.