എല്ലാ ജില്ലയിലും ഇനി പേമെന്റ് ബാങ്ക് ഉടന്, സംരംഭവുമായി തപാല് വകുപ്പ്
എല്ലാ ജില്ലയിലും പേമെന്റ് ബാങ്ക് സംവിധാനം എത്തിക്കാന് തപാല് വകുപ്പ് തയ്യാറെടുക്കുന്നു. അടുത്ത മാര്ച്ച് അവസാനത്തോടെ എല്ലാ ജില്ലയിലും പേമന്റെ് ബാങ്ക് തുടങ്ങും. 2018 അവസാനത്തോടെ ഒന്നര ലക്ഷം തപാല് ഓഫിസുകളിലും പേമന്റെ് ബാങ്ക് സംവിധാനം ആവിഷ് കരിക്കും.
സ്വകാര്യ മൊബൈല് കമ്പനിയായ എയര്ടെല്ലിനുശേഷം രണ്ടാമത്തെ വലിയ പേമന്റെ് ബാങ്ക് ശൃംഖലയാകാനുള്ള ഒരുക്കത്തിലാണ് തപാല് വകുപ്പ്. വ്യക്തികളില്നിന്നും ചെറുകിട ബിസിനസുകാരില്നിന്നും ഒരു ലക്ഷം രൂപവരെ നിക്ഷേപം സമാഹരിക്കാന് പേമന്റെ് ബാങ്കിന് കഴിയും.
പോസ്റ്റ്മാന് അടക്കമുള്ള തപാല് ജീവനക്കാരെ ഇതിനുള്ള ഉപകരണമടക്കം സജ്ജരാക്കും. 25,000 രൂപ വരെയുള്ള നിക്ഷേപങ്ങള്ക്ക് തപാല് പേമെന്റ് ബാങ്ക് നാലര ശതമാനം പലിശ നല്കും. 25,000 മുതല് 50,000 രൂപ വരെ അഞ്ച് ശതമാനവും ഒരു ലക്ഷം വരെ അഞ്ചര ശതമാനവുമാണ് പലിശ. രാജ്യത്തെ ഏറ്റവും വലിയ പൊതുമേഖല ബാങ്കായ സ്റ്റേറ്റ് ബാങ്ക് ഓഫ് ഇന്ത്യ ഒരു കോടി രൂപക്ക് താഴെയുള്ള നിക്ഷേപത്തിന് മൂന്നര ശതമാനമാണ് പലിശ നല്കുന്നത്.
ആധാര് അടിസ്ഥാന രേഖയാക്കിയുള്ള ഇടപാടുകളാണ് തപാല് പേമെന്റ് ബാങ്ക് നടത്തുക. പരമാവധി ചുരുങ്ങിയ സേവന നിരക്ക് ഈടാക്കിയാല് മതിയെന്നാണ് ധാരണ. നിലവിലെ വിപുലമായ അടിത്തറ ഉപയോഗിച്ച് പേമന്റെ് ബാങ്ക് വിജയകരമാകുമെന്നാണ് തപാല് വകുപ്പിന്റെ പ്രതീക്ഷ.
കഴിഞ്ഞ വര്ഷമാണ് സ്മാള് ഫിനാന്സ് ബാങ്കുകള്ക്കും പേമെന്റ് ബാങ്കുകള്ക്കും റിസര്വ് ബാങ്ക് അനുമതി നല്കിയത്. കഴിഞ്ഞ ജനുവരിയില് ആരംഭിച്ച എയര്ടെല് പേമന്റെ് ബാങ്കിന് ഇതിനകം രണ്ടര ലക്ഷം ഇടപാടുകാരുണ്ട്. മൊബൈല് സേവന ദാതാക്കള്, സൂപ്പര് മാര്ക്കറ്റ് ശൃംഖലകള് തുടങ്ങിയവക്ക് വ്യവസ്ഥകളുടെ അടിസ്ഥാനത്തില് പേമന്റെ് ബാങ്ക് തുടങ്ങാനാകും. നിക്ഷേപം സ്വീകരിക്കുന്നതിനൊപ്പം ഇന്റര്നെറ്റ് ബാങ്കിങ് ഇടപാടുകളും പേമന്റെ് ബാങ്കില് നടത്താന് റിസര്വ് ബാങ്ക് അനുമതി നല്കുന്നുണ്ട്.
https://www.facebook.com/Malayalivartha
