പിണറായി വിജയന്റെ കാബിനറ്റിലെ ഘടകകക്ഷി മന്ത്രിക്കെതിരെ അന്വേഷണത്തിന് ഉത്തരവിട്ട് സി.പി.ഐ മന്ത്രി കെ.ചന്ദ്രശേഖരന്‍. അന്വേഷണത്തിന്റെ കാര്യം മുഖ്യന്‍ അറിഞ്ഞതുമില്ല.

മൂന്നാര്‍ വിഷയത്തിനു പിന്നാലെ മന്ത്രി തോമസ് ചാണ്ടി മാത്തൂര്‍ ദേവസ്വം ഭൂമി കൈയേറിയ വിഷയത്തിലും സി.പി.എമ്മിനു മുഖാമുഖമായി സി.പി.ഐ.

ഭൂമി കൈയേറ്റ വിഷയത്തില്‍ അന്വേഷണത്തിന് തീരുമാനമെടുക്കേണ്ടത് മുഖ്യമന്ത്രിയല്ല, താനാണെന്നാണ് റവന്യുമന്ത്രിയുടെ നിലപാട്.

ദേവസ്വത്തിന്റെ 34 ഏക്കര്‍ തോമസ് ചാണ്ടി കൈയേറിയെന്ന പരാതിയിലാണ് റവന്യ മന്ത്രി അന്വേഷണത്തിന് ഉത്തരവിട്ടത്. ദേവസ്വം അധികൃതര്‍ നല്‍കിയ പരാതിയില്‍ ലാന്റ് ബോര്‍ഡ് സെക്രട്ടറിയോട് അടിയന്തിരമായി അന്വേഷണം നടത്തി റിപ്പോര്‍ട്ട് സമര്‍പ്പിക്കാന്‍ നിര്‍ദ്ദേശിക്കുകയായിരുന്നു. ഇക്കാര്യം മുഖ്യമന്ത്രിയും അദ്ദേഹത്തിന്റെ ഓഫീസും അറിഞ്ഞത് ടെലിവിഷന്‍ സ്‌ക്രോളിലൂടെയാണ്.

ഇതു സംബന്ധിച്ച് ഉന്നത സര്‍ക്കാര്‍ വൃത്തങ്ങള്‍ നല്‍കിയ സൂചന അനുസരിച്ച് മന്ത്രി തോമസ് ചാണ്ടി ബുദ്ധിമുട്ടിലാകുമെന്ന് പറയപ്പെടുന്നു. അദ്ദേഹത്തിന്റെ നിയമവിരുദ്ധ പ്രവര്‍ത്തനങ്ങള്‍ക്കൊക്കെ തെളിവുള്ളതാണ് കാരണം. ഇക്കാരണത്താലാണ് അദ്ദേഹത്തെ മന്ത്രിയാക്കാന്‍ മുഖ്യമന്ത്രി ആദ്യം അറച്ചത്.

എന്നാല്‍ ഒരു മന്ത്രിക്കെതിരെ അന്വേഷണം നടത്തുമ്പോള്‍ അത് മുഖ്യമന്ത്രി അറിയേണ്ടതല്ലേ എന്ന ചോദ്യം ബാക്കിയാവുന്നു. അത് ഏത് തരത്തിലുള്ള അന്വേഷണമായാലും മുഖ്യമന്ത്രി അറിഞ്ഞിരിക്കേണ്ടത് നിയമപരമായ ബാധ്യതയാണ്. ദേവസ്വം അധികൃതര്‍ നല്‍കിയ പരാതിയില്‍ മന്ത്രിയുടെ പേര് പറഞ്ഞിട്ടുണ്ട്. മന്ത്രി ഭൂമി കൈയേറി എന്നു പറയുമ്പോള്‍ അത് ഗുരുതര പിഴവാണ്. അതു കൊണ്ടു തന്നെ റവന്യ മന്ത്രി അറിഞ്ഞില്ലെന്ന് പറയുന്നത് വെറുതെയാണ്. കാനം രാജേന്ദ്രന്‍ ഇക്കാര്യത്തില്‍ റവന്യ മന്ത്രിക്കൊപ്പമാണ്.

മൂന്നാര്‍ വിഷയത്തില്‍ സി.പി.ഐ നിയോഗിച്ച അഡ്വ.രഞ്ജിത് തമ്പാനെ മാറ്റണമെന്ന് സി.പി.എം ആവശ്യപ്പെട്ടപ്പോള്‍ സി.പി.ഐ തയ്യാറായില്ല. സി.പി.എം സ്വന്തം വക്കീലിനെ നിയമിക്കാന്‍ തീരുമാനിച്ചു. ഇത്തരം വിവാദങ്ങള്‍ക്കിടയിലാണ് തോമസ് ചാണ്ടിക്കെതിരായ അന്വേഷണം വന്നിരിക്കുന്നത്.