ചരക്കുസേവന നികുതിയുമായി (ജി.എസ്.ടി) ബന്ധപ്പെട്ട കുരുക്കില്‍പ്പെട്ട് തദ്ദേശ സ്ഥാപനങ്ങളുടെ നിര്‍മാണ പ്രവൃത്തി സ്തംഭിച്ചതിനുപിന്നാലെ പദ്ധതി നിര്‍വഹണവും താളം തെറ്റി. സാമ്പത്തിക വര്‍ഷം മൂന്നാം പാദത്തിലേക്ക് കടക്കുമ്പോഴും 20.57 ശതമാനം തുക മാത്രമാണ് ചെലവഴിക്കാനായത്. മൊത്തം 6162.51 കോടി വകയിരുത്തിയതില്‍ കേവലം 1267.38 കോടി രൂപയാണ് വെള്ളിയാഴ്ച വരെ വിനിയോഗിച്ചത്. ഇതോടെ കഴിഞ്ഞ വര്‍ഷം 67.08 ശതമാനമുണ്ടായിരുന്ന പദ്ധതി നിര്‍വഹണം ഇത്തവണ നൂറുശതമാനത്തിലെത്തിക്കുമെന്ന സര്‍ക്കാര്‍ പ്രഖ്യാപനം ജലരേഖയാവുമെന്നാണ് ആക്ഷേപം. പതിവില്‍ നിന്ന് വിഭിന്നമായി പദ്ധതി നിര്‍വഹണം നൂറുശതമാനത്തിലെത്തിക്കാനുള്ള ഒരുക്കം ഇത്തവണ ഏപ്രിലില്‍ ആരംഭിച്ചിരുന്നു.

മേയില്‍ ജനപ്രതിനിധികള്‍ക്കും ഉദ്യോഗസ്ഥര്‍ക്കുമുള്ള പരിശീലനവും പൂര്‍ത്തിയാക്കി. മാത്രമല്ല ചരിത്രത്തിലാദ്യമായി ജൂണ്‍ 15 ഓടെ മുഴുവന്‍ പഞ്ചായത്തുകളുടേതടക്കം പദ്ധതികള്‍ക്ക് ഡി.പി.സികള്‍ അംഗീകാരവും നല്‍കി. ഡിസംബറോടെ 90 ശതമാനം തുകയും ചെലവഴിക്കാന്‍ മറ്റുനടപടികളും ലളിതമാക്കിയതോടെ റെക്കോഡ് വേഗതയിലാണ് തുക വിനിയോഗിച്ചിരുന്നത്. ഇതാണിപ്പോള്‍ ഒച്ചുവേഗത്തിലേക്ക് കൂപ്പുകുത്തിയത്.
ജി.എസ്.ടിയിലെ സാങ്കേതികത്വങ്ങള്‍ ചൂണ്ടിക്കാട്ടി കരാറുകാര്‍ പ്രവൃത്തികളുടെ ടെന്‍ഡറില്‍ നിന്ന് വിട്ടു നില്‍ക്കുന്നതാണ് പദ്ധതി നിര്‍വഹണം മന്ദഗതിയിലാക്കിയത്. നിര്‍മാണ പ്രവൃത്തികള്‍ക്ക് 18 ശതമാനമുണ്ടായിരുന്ന നികുതി 12 ആക്കിയെങ്കിലും മുന്‍കൂട്ടി നികുതി അടയ്ക്കണം, മാസത്തില്‍ മൂന്നുതവണ റിട്ടേണ്‍ നല്‍കണം എന്നിവയുള്‍പ്പെടെ പരിഷ്‌ക്കാരങ്ങള്‍ അംഗീകരിക്കില്ലെന്നാണ് കരാറുകാരുടെ പക്ഷം.

അതിനിടെ, ജി.എസ്.ടി തുക എസ്റ്റിമേറ്റില്‍ ഉള്‍പ്പെടുത്തണമെന്ന ആവശ്യം സര്‍ക്കാര്‍ പരിഗണിച്ചിരുന്നു.12 ശതമാനം നികുതിയില്‍ നാല് ശതമാനം നേരത്തെ വാറ്റായി കരാറുകാര്‍ നല്‍കുന്നത് കിഴിച്ചാല്‍ കേവലം എട്ടുശതമാനത്തിന്റെ പ്രശ്‌നമാണ് നിലനില്‍ക്കുന്നതെന്നും ഇത് എസ്റ്റിമേറ്റില്‍ വര്‍ധിപ്പിക്കുമെന്നും ധനമന്ത്രി ഡോ. ടി.എം. തോമസ് ഐസക് ഉറപ്പുപറഞ്ഞിരുന്നെങ്കിലും ഈ രംഗത്തെ സ്തംഭനാവസ്ഥ ഒഴിവാക്കാനായിട്ടില്ല. ഇതാണ് പദ്ധതി നിര്‍വഹണവും തകിടം മറിച്ചത്. പ്രതിസന്ധി പരിഹരിക്കാത്തപക്ഷം മുന്‍വര്‍ഷത്തെ പോലെ 70 ശതമാനത്തിലധികം തുക ചെലവഴിക്കാനാവില്ലെന്നാണ് വിദഗ്ധര്‍ പറയുന്നത്. ജൂണില്‍ ഡി.പി.സികളുടെ അംഗീകാരം ലഭിച്ചതിനാല്‍ ഇത്തവണ പദ്ധതി നിര്‍വഹണം 90 ശതമാനത്തിലെത്തിക്കുന്നതിന് വലിയ ബുദ്ധിമുട്ടില്ലായിരുന്നു. ഇതാണ് വേണ്ട ഇടപെടലില്ലാത്തതുകാരണം മന്ദഗതിയിലായത് എന്നും ഇവര്‍ ചൂണ്ടിക്കാട്ടുന്നു.