തോമസ് ചാണ്ടിയുടെ കായല് കൈയ്യേറ്റ വിവാദത്തെ തുടര്ന്ന് സംസ്ഥാനത്തെ മുഴുവന് കായല്, പുഴ കൈയ്യേറ്റങ്ങളും അടിയന്തരമായി അന്വേഷിക്കാന് ജില്ലാകളക്ടര്മാര്ക്ക് റവന്യൂ വകുപ്പിന്റെ കര്ശന നിര്ദ്ദേശം
മന്ത്രി തോമസ് ചാണ്ടിയുടെ കായല്, റോഡ് കൈയേറ്റം വിവാദമായ സാഹചര്യത്തില് സംസ്ഥാനത്തെ മുഴുവന് കായല്, പുഴ കൈയേറ്റങ്ങളും അടിയന്തരമായി അന്വേഷിക്കാനും അനധികൃതമെന്ന് കാണുന്നവ ഒഴിപ്പിക്കാനും ജില്ല കലക്ടര്മാര്ക്ക് റവന്യൂ വകുപ്പിന്റെ കര്ശന നിര്ദേശം. എറണാകുളം, കോട്ടയം, ആലപ്പുഴ, കൊല്ലം, തൃശൂര് കലക്ടര്മാര്ക്കും ആര്.ഡി.ഒമാര്ക്കും സബ് കലക്ടര്മാര്ക്കുമാണ് നിര്ദേശം ലഭിച്ചത്.
കായല്, പുഴ കൈയേറ്റങ്ങളെ സംബന്ധിച്ച് നിലവില് ലഭിച്ച പരാതികളെല്ലാം പരിശോധിക്കണം. സംശയമുള്ളവ സ്ഥലത്തെത്തി നിരീക്ഷിക്കണമെന്നും കൈയേറിയവര് എത്ര ഉന്നതരായാലും പിന്നോക്കം പോകരുതെന്നും നിര്ദേശമുണ്ട്. ആലപ്പുഴ, കോട്ടയം, കൊല്ലം, എറണാകുളം ജില്ലകളില് പലയിടത്തും വ്യാപകമായി കായല് കൈയേറിയെന്നാണ് റിപ്പോര്ട്ട്.
കോട്ടയത്ത് വേമ്പനാട്ടുകായലില് ഏക്കറുകണക്കിന് ഭൂമി റിസോര്ട്ട് ഉടമകളും വന്കിടക്കാരും സ്വകാര്യ വ്യക്തികളും കൈയേറിയെന്നും രേഖകള് പരിശോധിച്ച് ശക്തമായ നടപടി വേണമെന്നും റവന്യൂ വകുപ്പ് സെക്രട്ടറി ആവശ്യപ്പെട്ടു. കോട്ടയം, ആലപ്പുഴ, എറണാകുളം ജില്ലകളില് ഉള്പ്പെടുന്ന കുമരകംവൈക്കം മേഖലകളിലും എറണാകുളത്തും കായല് കൈയേറ്റം ഇപ്പോഴും നടക്കുന്നെന്നും ഇതിന് പിന്നില് ഉന്നതരാണെന്നും റവന്യൂ വകുപ്പും റവന്യൂ ഇന്റലിജന്സും റിപ്പോര്ട്ട് നല്കി.
എന്നാല്, ഇവര്ക്കെതിരെ ചെറുവിരല് അനക്കാന്പോലും ഉദ്യോഗസ്ഥര് തയ്യാറായില്ല. ബന്ധപ്പെട്ട വില്ലേജ് ഉദ്യോഗസ്ഥരും കൈയേറ്റവിവരം മൂടിവെച്ചു. ജില്ല ഭരണകൂടത്തിന്റെ വീഴ്ചയും കണ്ടെത്തി. കുമരകത്ത് മെത്രാന് കായല് നികത്താന്പോലും കലക്ടര് അനുമതി നല്കിയതും പിന്നീട് സര്ക്കാര് ഇടപെടലില് ഉത്തരവ് പിന്വലിച്ചതും വിവാമായിരുന്നു.
മെത്രാന് കായല് നികത്താനുള്ള അനുമതിയുടെ മറവില് മേഖലയില് വ്യാപകമായി കായല് കൈയേറിയെന്നും റവന്യൂ ഉദ്യോഗസ്ഥര് ചൂണ്ടിക്കാട്ടി. വേമ്പനാട്ടുകായലില് പലയിടത്തും കൈയേറി നിര്മാണം പൂര്ത്തിയാക്കി. വിനോദസഞ്ചാര വികസനത്തിന്റെ മറവിലാണ് ഭൂരിപക്ഷം കൈയേറ്റങ്ങളും. കോട്ടയംആലപ്പുഴ ജില്ലകളില് കൃഷിഭൂമി നികത്തലും തകൃതിയാണ്. കായല് കൈയേറിയ ശേഷം സര്ക്കാര് സ്ഥാപിച്ച ജണ്ട പൊളിച്ചുമാറ്റുകയാണ് ചെയ്യുന്നത്. ചിലര് ജണ്ട മാറ്റി സ്ഥാപിച്ചതായും കണ്ടെത്തി.
https://www.facebook.com/Malayalivartha
