തൃപ്പൂണിത്തുറ ശിവശക്തി യോഗ സെന്ററിനെതിരെ വെളിപ്പെടുത്തലുമായി മറ്റൊരു പെണ്‍കുട്ടി ഹൈക്കോടതിയില്‍. ഘര്‍വാപ്പസി നടത്തുന്നുണ്ടെന്ന ആക്ഷേപമുയര്‍ന്ന യോഗ സെന്ററില്‍ അന്തേവാസികളായ പെണ്‍കുട്ടികളെ നിര്‍ബന്ധിത ഗര്‍ഭപരിശോധന നടത്തിയെന്ന് ഹൈക്കോടതി ജഡ്ജിമാര്‍ക്ക് മുന്‍പില്‍ പെണ്‍കുട്ടി നല്‍കിയ മൊഴില്‍ പറയുന്നു.

വന്‍ പീഡനമുറകളാണ് യോഗകേന്ദ്രത്തില്‍ നടക്കാറുള്ളതെന്ന് പെണ്‍കുട്ടി കോടതിയില്‍ വെളിപ്പെടുത്തി.
മുസ്ലിം യുവാവുമായി പ്രണയത്തിലായിരുന്ന യുവതിയെ മാതാപിതാക്കളാണ് ധര്‍മ്മം പഠിപ്പിക്കാനെന്ന പേരില്‍ യോഗ കേന്ദ്രത്തിലെത്തിച്ചത്. യുവാവ് നല്‍കിയ ഹേബിയസ് കോര്‍പ്പസ് ഹര്‍ജിയുടെ അടിസ്ഥാനത്തില്‍ കോടതിക്ക് മുന്‍പിലെത്തിയപ്പോഴാണ് യുവതിയുടെ ഞെട്ടിക്കുന്ന വെളിപ്പെടുത്തല്‍.
ക്രൂരമായ പീഡനമുറകള്‍ സെന്ററില്‍ നടക്കാറുണ്ടെന്നാണ് മൊഴിയില്‍ പറയുന്നത്. അതിരാവിലെ മുഖത്ത് വെള്ളം തെളിച്ച്‌ എഴുന്നേല്‍പ്പിക്കും. ചോദ്യം ചെയ്താല്‍ പിന്നെ പീഡനമാണ്. തന്റെ വയറിന്ചവിട്ടിയെന്നും വായില്‍ തുണി തിരുകിയ ശേഷംമര്‍ദ്ദിച്ചെന്നും പെണ്‍കുട്ടി പറയുന്നു. അന്തേവാസികളായ പെണ്‍കുട്ടികളെ നിര്‍ബന്ധിത ഗര്‍ഭപരിശോധന നടത്തിയെന്നും പെണ്‍കുട്ടി വെളിപ്പെടുത്തുന്നു.
പെണ്‍കുട്ടി ആദ്യം തൃപ്പൂണിത്തുറ ഹില്‍ പാലസ് പൊലീസില്‍ നല്‍കിയ മൊഴി കൃത്യമായി രേഖപ്പെടുത്തിയില്ലെന്ന് ആക്ഷേപമുണ്ട്. പെണ്‍കുട്ടിയുടെ വെളിപ്പെടുത്തലിന്റെ പശ്ചാത്തലത്തില്‍ കേസെടുത്ത് അന്വേഷണം നടത്താന്‍ ഹൈക്കോടതി ഡിവിഷന്‍ ബെഞ്ച് ഉത്തരവിട്ടു.