കൊച്ചി മെട്രോ ചൊവ്വാഴ്ച മുതല്‍ നഗരത്തിലേക്ക് ഓടിത്തുടങ്ങും. പാലാരിവട്ടം മുതല്‍ മഹാരാജാസ് ഗ്രൗണ്ട് വരെയുള്ള പാതയിലെ സര്‍വിസ് രാവിലെ 11ന് എറണാകുളം ടൗണ്‍ഹാളില്‍ നടക്കുന്ന ചടങ്ങില്‍ മുഖ്യമന്ത്രി പിണറായി വിജയന്‍ ഉദ്ഘാടനം ചെയ്യും. കേന്ദ്ര നഗരവികസന മന്ത്രി ഹര്‍ദീപ്‌സിങ് പുരി മുഖ്യാതിഥിയാകും. ഉദ്ഘാടന ചടങ്ങിന് മുന്നോടിയായി കലൂര്‍ ജവഹര്‍ലാല്‍ നെഹ്‌റു സ്‌റ്റേഡിയം സ്‌റ്റേഷനില്‍ രാവിലെ മുഖ്യമന്ത്രിയും കേന്ദ്രമന്ത്രിയും ചേര്‍ന്ന് പുതിയ പാതയിലെ സര്‍വിസ് ഫ്‌ലാഗ് ഓഫ് ചെയ്യും.

തുടര്‍ന്ന് 10.30ന് വിശിഷ്ടാതിഥികള്‍ കലൂരിലെ സ്‌റ്റേഷനില്‍നിന്ന് മെട്രോ ട്രെയിനില്‍ യാത്ര ചെയ്യും. ഇതിനുശേഷമാണ് ടൗണ്‍ഹാളിലെ ഉദ്ഘാടന ചടങ്ങ്. ആലുവക്കും പാലാരിവട്ടത്തിനുമിടയിലെ 13 കിലോമീറ്റര്‍ പാതയിലെ സര്‍വിസ് ജൂണ്‍ 17നാണ് പ്രധാനമന്ത്രി നരേന്ദ്ര മോദി ഉദ്ഘാടനം ചെയ്തത്. മഹാരാജാസ് ഗ്രൗണ്ട് വരെ നീളുമ്പോള്‍ മെട്രോ ഓടുന്ന ദൂരം 18 കിലോമീറ്ററാകും. ഉദ്ഘാടനത്തിന് മുന്നോടിയായി പുതിയ പാതയിലെ അഞ്ച് സ്‌റ്റേഷനുകളിലും അവസാനവട്ട മിനുക്കുപണികള്‍ പുരോഗമിക്കുകയാണ്.

ഉദ്ഘാടനദിവസം കന്നിയാത്രക്കാര്‍ക്ക് തങ്ങളുടെ കാരിക്കേച്ചറുകള്‍ സ്വന്തമാക്കാന്‍ കൊച്ചി മെട്രോ റെയില്‍ ലിമിറ്റഡ് (കെ.എം.ആര്‍.എല്‍) അവസരമൊരുക്കിയിട്ടുണ്ട്. 10 കാര്‍ട്ടൂണിസ്റ്റുകളുടെ നേതൃത്വത്തില്‍ ഉച്ചക്ക് 12 മുതല്‍ രണ്ടുവരെ കലൂര്‍ ജവഹര്‍ലാല്‍ നെഹ്‌റു സ്‌റ്റേഡിയം സ്‌റ്റേഷനിലാണ് തത്സമയ കാരിക്കേച്ചര്‍ രചന.

നഗരഹൃദയത്തിലേക്ക് മെട്രോ എത്തുന്നതിന് മുന്നോടിയായി കെ.എം.ആര്‍.എല്ലും സോള്‍സ് ഒഫ് കൊച്ചിനും ചേര്‍ന്ന് തിങ്കളാഴ്ച മെട്രോ ഗ്രീന്‍ റണ്‍' സംഘടിപ്പിക്കും. രാവിലെ 6.30ന് ദര്‍ബാര്‍ ഹാള്‍ ഗ്രൗണ്ടില്‍നിന്ന് ആരംഭിച്ച് മെട്രോ റൂട്ടിലൂടെ ജവഹര്‍ലാല്‍ നെഹ്‌റു സ്‌റ്റേഡിയത്തില്‍ എത്തി ദര്‍ബാര്‍ ഹാള്‍ ഗ്രൗണ്ടില്‍ അവസാനിക്കുന്ന 10 കിലോമീറ്റര്‍ ആണ് ദൈര്‍ഘ്യം. മഹാരാജാസിനും ജവഹര്‍ലാല്‍ നെഹ്‌റു സ്‌റ്റേഡിയത്തിനും ഇടയിലുള്ള ഏത് സ്‌റ്റേഷനില്‍നിന്നും ഓട്ടത്തില്‍ പങ്കാളിയാകാം.