സംസ്ഥാന സര്ക്കാര് മൊബൈല് ടവര് നിര്മാണ രംഗത്തേക്ക്
വരുമാന വര്ധനയും ഒപ്പം ഗുണമേന്മയുള്ള ടെലികോം സേവനം ലഭ്യമാക്കലും ലക്ഷ്യമിട്ട് സംസ്ഥാന സര്ക്കാര് മൊബൈല് ടവര് നിര്മാണ രംഗത്തേക്ക്. സര്ക്കാര് ഉടമസ്ഥതയില് കമ്പനി സ്ഥാപിക്കുകയും ടെലികോം കമ്പനികള്ക്ക് പാട്ടക്കരാര് വ്യവസ്ഥയില് ടവറുകള് നല്കുകയുമാണ് ലക്ഷ്യം.
സര്ക്കാര് ഏജന്സിയായ കേരള സ്റ്റേറ്റ് ഇന്ഫര്മേഷന് ടെക്നോളജി ഇന്ഫ്രാസ്ട്രക്ചര് ലിമിറ്റഡിനാണ് (കെ.എസ്.ഐ.ടി.ഐ.എല്) മൊബൈല് ടവറുകളുടെ നിര്മാണച്ചുമതല. ടെലികോം ഓപറേറ്റര്മാര് ആവശ്യപ്പെടുന്ന മുറക്ക് സര്ക്കാര് കെട്ടിടങ്ങളിലും നിര്ണായക സ്ഥാനങ്ങളിലും പൊതുവായ ടവറുകള് സ്ഥാപിക്കും. സംസ്ഥാന സര്ക്കാറിന്റെ ഉടമസ്ഥതയിലുള്ള സ്ഥലങ്ങള് ടവറുകള്ക്കായി വിനിയോഗിക്കുന്നതിലൂടെ വരുമാന വര്ധനയുണ്ടാകുമെന്നാണ് പ്രതീക്ഷിക്കുന്നത്.
പാട്ടക്കരാറിലടക്കം തീരുമാനമെടുക്കാന് വിദഗ്ധരടങ്ങിയ ഉന്നതാധികാര സമിതിയും രൂപവത്കരിക്കും. ടെലികോം കമ്പനികളുടെ അപേക്ഷകളില് ഉന്നതാധികാര സമിതി ആറുമാസത്തിലൊരിക്കല് ചേര്ന്ന് തീരുമാനമെടുക്കുന്ന രൂപത്തിലാവും ക്രമീകരണങ്ങള്. നിര്ദേശിച്ച സ്ഥലങ്ങളില് നെറ്റ് വര്ക്ക് കവറേജിന്റെ പര്യാപ്തത വിലയിരുത്തേണ്ടതും ഈ സമിതിയാണ്. നിലവാരമുള്ള കവറേജ്, ചെലവ് കുറവ്, വിഭവങ്ങളുടെ ഫലപ്രദമായ ഉപയോഗം, ടെലികോം ബിസിനസ് രംഗത്തെ ഇടപെടലിലൂടെ സാമ്പത്തിക മെച്ചം, ഉപഭോക്താവിന് കുറഞ്ഞ വില, മികച്ച നിലവാരമുള്ള സേവനം തുടങ്ങിയവയാണ് പുതിയ സംരംഭത്തിലൂടെ സര്ക്കാര് കാണുന്ന നേട്ടം.
ഒരു ടവര് നിര്മിക്കാന് 45 ലക്ഷമാണ് ചെലവ് പ്രതീക്ഷിക്കുന്നത്. ചുരുങ്ങിയ കാലയളവിനുള്ളില് പാട്ടത്തിലൂടെ ഈ തുക വസൂലാക്കാം. ഒപ്പം ടവറുകള് ആസ്തിയുമാകും. ഇതോടൊപ്പം വിവിധ സ്ഥാപനങ്ങളിലും പദ്ധതികളിലൂടെയും സ്ഥാപിച്ച ഐ.ടി ആസ്തികള് ഫലപ്രദമായി ഉപയോഗപ്പെടുത്താനും തീരുമാനമുണ്ട്. ഇതിനു മുന്നോടിയായി ആസ്തികള് സംബന്ധിച്ച വിശദാംശം ശേഖരിച്ച് സൂക്ഷിക്കും. ടെക്നോപാര്ക്ക്, ഇന്ഫോപാര്ക്ക്, സൈബര്പാര്ക്ക് എന്നിവയുടെ പ്രവര്ത്തനം 'കേരള ഐ.ടി പാര്ക്ക്' എന്ന ബ്രാന്ഡില് ഏകീകരിക്കാനും ആലോചനയുണ്ട്.
എല്ലാ അടിസ്ഥാന സൗകര്യ നിര്മാണവും 'കെ.എസ്.ഐ.ടി.ഐ.എല്' എന്ന കമ്പനിയുടെ കീഴിലാകും. ഐ.ടി പാര്ക്കുകളില് കമ്പനികള്ക്കായി കൂടുതല് കെട്ടിടങ്ങള് നിര്മിക്കുന്നതിനൊപ്പം ഐ.ടി പശ്ചാത്തല സൗകര്യം ഒരുക്കുന്നതില് സ്വകാര്യ സംരംഭങ്ങളെ പ്രോത്സാഹിപ്പിക്കാനും തീരുമാനമുണ്ട്.
https://www.facebook.com/Malayalivartha
