അപകടങ്ങളിലും പ്രകൃതിദുരന്തങ്ങളിലും പെട്ട് മരിക്കുകയോ ഗുരുതരമായി പരിക്കേല്‍ക്കുകയോ ചെയ്യുന്നവരുടെ ബന്ധുക്കളെ വിവരമറിയിക്കാന്‍ ആവശ്യമെങ്കില്‍ പൊലീസ് ഉദ്യോഗസ്ഥര്‍ വീടുകളില്‍ നേരിട്ടെത്തും. വീടുകളില്‍ അല്‍പ്പസമയം ചെലവഴിക്കുന്ന ഉദ്യോഗസ്ഥര്‍ ബന്ധുക്കളെ ആശ്വസിപ്പിക്കും.

അപകടങ്ങളില്‍ മരണമോ ഗുരുതര പരിക്കോ സംഭവിക്കുന്നവരുടെ അടുത്ത ബന്ധുക്കള്‍ക്ക് സമയത്തിന് വിവരം ലഭിച്ചില്ലെന്ന പരാതി വ്യാപകമായ പശ്ചാത്തലത്തില്‍ സംസ്ഥാന പൊലീസ് മേധാവി ലോക്‌നാഥ് ബെഹ്‌റ ജില്ലാ പൊലീസ് മേധാവിക്ക് എട്ട് നിര്‍ദേശങ്ങളടങ്ങിയ കത്തയച്ചു. പൊലീസ് ഉദ്യോഗസ്ഥര്‍ അപകടവിവരം അറിയിക്കുന്നത് ശാന്തതയോടെയും സമചിത്തതയോടെയുമാകണമെന്നും കത്തിലുണ്ട്.

തിരുവനന്തപുരം എആര്‍ ക്യാമ്പിലെ പൊലീസ് ഉദ്യോഗസ്ഥന്‍ ഡ്യൂട്ടിക്കിടെ വാഹനാപകടത്തില്‍ മരിച്ചത് ബന്ധുക്കളെ സമയത്തിന് അറിയിക്കുന്നതില്‍ സഹപ്രവര്‍ത്തകര്‍ക്ക് വീഴ്ച സംഭവിച്ചതായി പൊലീസ് മേധാവി കത്തില്‍ പറയുന്നു. സാമൂഹ്യമാധ്യമങ്ങളിലൂടെയും ചാനലുകളിലൂടെയുമാണ് മരണവിവരം ബന്ധുവറിഞ്ഞത്. ഇങ്ങനെ ദുരന്തവിവരം പരോക്ഷമായി അറിയുന്നത് ഭാര്യ, ഭര്‍ത്താവ് ഉള്‍പ്പെടെയുള്ള കുടുംബാംഗങ്ങള്‍ക്ക് താങ്ങാനാകില്ല. ഇത് ഒഴിവാക്കാന്‍ സമയത്തിന്, കൃത്യതയോടെ, സമചിത്തതയോടെ വിവരം അറിയിക്കുന്നതിന് ഉദ്യോഗസ്ഥര്‍ നേരിട്ട് വീട്ടിലെത്തുന്നത് നല്ലതാണ്. ഭാര്യ, ഭര്‍ത്താവ്, അച്ഛന്‍, മക്കള്‍ തുടങ്ങിയ അടുത്ത ബന്ധുക്കളെ നേരിട്ട് കണ്ട് അറിയിക്കണം. ആവശ്യമെങ്കില്‍ വനിതാ പൊലീസ് ഉദ്യോഗസ്ഥയെ ഒപ്പംകൂട്ടണം.

മരണമോ ഗുരുതരപരിക്കോ സംഭവിക്കുന്നത് പൊലീസ് ഉദ്യോഗസ്ഥനാണെങ്കില്‍ അറിയിക്കുന്നതിനുള്ള ഉത്തരവാദിത്തം ജില്ലാപൊലീസ് മേധാവിക്കോ ഡിവൈഎസ്പിക്കോ ആകും. ഇവരുടെ അസാന്നിധ്യത്തില്‍ സിഐയെ ചുമതലപ്പെടുത്താം. ബന്ധുക്കള്‍ താമസിക്കുന്നത് ദൂരെയാണെങ്കില്‍ അതതിടത്തെ ജില്ലാ പൊലീസ് മേധാവിയെ വിവരം അറിയിക്കണം. തുടര്‍ന്ന് അടുത്ത സ്‌റ്റേഷനിലെ ഉദ്യോഗസ്ഥരെ വിവരം കൈമാറാന്‍ ചുമതലപ്പെടുത്തണം.

മറ്റുള്ളവരുടെ കാര്യത്തില്‍ അതത് സ്‌റ്റേഷനുകളിലെ എസ്എച്ച്ഒമാര്‍ ക്രമീകരണം ഏര്‍പ്പെടുത്തണം. നിലവില്‍ ഫോണ്‍വഴിയാണ് വിവരങ്ങള്‍ കൈമാറുന്നത്. എന്നാല്‍, ഇത് പലപ്പോഴും വൈകാരികത സൃഷ്ടിക്കും. മാത്രമല്ല, ഫോണ്‍വഴി വിവരം അറിയിക്കുമ്പോള്‍ അനുകമ്പയും സമചിത്തതയും ഇല്ലാതാകുന്നതായും പരാതിയുണ്ടാകാറുണ്ട്. ഇതൊഴിവാക്കാന്‍ കൂടിയാണ് ഉദ്യോഗസ്ഥര്‍ വീടുകളില്‍ നേരിട്ടെത്തി വിവരം കൈമാറണമെന്ന നിര്‍ദേശം.