തന്റെ ക്ഷേത്ര പ്രവേശനം വിവാദമാക്കിയവരെ സൂര്യയുടെ വേദിയില്‍ ഗാനഗന്ധര്‍വ്വന്‍ യേശുദാസ് കടന്നാക്രമിച്ചു. സൂര്യയുടെ യോഗം തുടങ്ങുമ്പോള്‍ തന്നെ യേശുദാസ് തന്റെ നിലപാട് വിശദീകരിച്ചിരുന്നു. എന്നാല്‍ തന്റെ കച്ചേരി കഴിഞ്ഞ ശേഷം മാധ്യമങ്ങളേയും വിവാദമുണ്ടാക്കുന്നവരേയും കടന്നാക്രമിക്കുകയാണ് യേശുദാസ് ചെയ്തത്. തനിക്ക് ജാതിയില്ലെന്നും ജാതിയില്ലാത്ത താനെന്തിന് ജാതി മാറണമെന്നും യേശുദാസ് ചോദിച്ചു. പത്മനാഭ സ്വാമീക്ഷേത്രത്തിന് ഒരു നിയമം ഉണ്ട്. അത് അനുസരിക്കുക മാത്രമാണ് താന്‍ ചെയ്തതെന്നും അദ്ദേഹം വിശദീകരിച്ചു. ഗുരുവായൂരില്‍ കയറ്റുമ്പോള്‍ കയറുമെന്നും എല്ലാം ഈശ്വരന് അറിയാമെന്നുമായിരുന്നു യേശുദാസിന്റെ പ്രതികരണം. മുമ്പ് ചന്ദ്രികയ്ക്ക് കൊടുത്ത മറുപടി എടുത്തു പറഞ്ഞ് സൂര്യമേളയിലെത്തിയവരുടെ കൈയടി യേശുദാസ് വാങ്ങുകയും ചെയ്തു.

കച്ചേരി തുടങ്ങും മുമ്പ് യേശുദാസ് മാധ്യമങ്ങളോട് പ്രതികരിച്ചപ്പോള്‍ വിവാദവിഷയങ്ങളെക്കുറിച്ച് പരാമര്‍ശിച്ചതേയില്ല. ശ്രീ പത്മനഭസ്വാമി ക്ഷേത്രത്തില്‍ പ്രവേശിക്കുവാന്‍ സമയമായിട്ടില്ലെന്ന് പറഞ്ഞ ഗാനഗന്ധര്‍വന്‍ ഇതിന്റെ പേരില്‍ വിവാദങ്ങള്‍ സൃഷ്ടിക്കേണ്ടകാര്യമില്ലെന്നും കൂട്ടിച്ചേര്‍ത്തു. ക്ഷേത്രത്തിലേക്ക് വലിഞ്ഞു കയറേണ്ട ആവശ്യമില്ലെന്നും അദ്ദേഹം പറഞ്ഞു. ക്ഷേത്ര ദര്‍ശനത്തിന് അനുമതി കിട്ടിയതോടെ എന്നാണ് അദ്ദേഹം എത്തുക എന്നാണ് എല്ലാവരും ഉറ്റുനോക്കിയിരുന്നത്. സൂര്യ സംഗീതോത്സവത്തില്‍ പങ്കെടുക്കുവാന്‍ അദ്ദേഹം തിരുവനന്തപുരത്ത് എത്തിയിരുന്നു. നവരാത്രി ദിനത്തില്‍ അദ്ദേഹം സന്ദര്‍ശനം നടത്തുമെന്ന് പ്രതീക്ഷിച്ചിരുന്നെങ്കിലും അതുണ്ടായിരുന്നില്ല. യേശുദാസിന് ക്ഷേത്രത്തില്‍ പ്രവേശിക്കാന്‍ അനുമതി നല്‍കുന്ന കത്ത് അദ്ദേഹത്തിന്റെ സുഹൃത്തുക്കള്‍ ക്ഷേത്രം എക്‌സിക്യൂട്ടീവ് ഓഫീസര്‍ക്ക് കൈമാറിയിരുന്നു. താന്‍ ഹിന്ദു മതത്തില്‍ വിശ്വസിക്കുന്നുവെന്നും ക്ഷേത്രത്തില്‍ തൊഴാന്‍ അനുവദിക്കണമെന്ന അപേക്ഷയെത്തുടര്‍ന്നായിരുന്നു ഇത്. ഇതോടെയാണ് സൂര്യമേളയിലെ പരിപാടിക്ക് മാധ്യമശ്രദ്ധ കൂടിയത്. തുടക്കത്തില്‍ മയത്തില്‍ പറഞ്ഞ യേശുദാസ് ഒടുക്കം വിമര്‍ശകര്‍ക്ക് ചുട്ട മറുപടി നല്‍കി. ക്യാമറകളും മാധ്യങ്ങളും എല്ലാം അപ്പോള്‍ വേദി വിട്ടു പോയിരുന്നു. ഇത് കൂടി മനസ്സില്‍ വച്ചായിരുന്നു തന്റെ പ്രേക്ഷകര്‍ക്ക് മുമ്പില്‍ യേശുദാസ് മനസ്സ് തുറന്നത്.

സൂര്യയില്‍ മംഗളം പാടി യേശുദാസ് കച്ചേരി അവസാനിച്ചതോടെ നീണ്ട കരഘോഷം ഉയര്‍ന്നു. എല്ലാവരും പുറത്തേക്ക് പോകാന്‍ എഴുന്നേറ്റു. അപ്പോഴായിരുന്നു ഗാനഗന്ധര്‍വ്വന്റെ ഇടപെടല്‍. എവിടെ പോകുന്നു. എനിക്ക് കുറിച്ച് കാര്യങ്ങള്‍ കൂടി പറയാനുണ്ട് എന്ന ആമുഖത്തോടെയാണ് വിവാദത്തിലേക്ക് കടന്നത്. ക്ഷേത്ര പ്രവേശനത്തെ വിവാദമാക്കുന്നവരേയും സെന്‍സേഷന്‍ സൃഷ്ടിക്കാന്‍ ശ്രമിക്കുന്നവരേയും യേശുദാസ് കടന്നാക്രമിച്ചു. പത്മനാഭ സ്വാമി ക്ഷേത്രത്തിന് ഒരു നിയമം ഉണ്ട്. അത് അനുസരിക്കുക മാത്രമാണ് താന്‍ ചെയ്യുന്നത്. ഇക്കാര്യത്തില്‍ മുന്‍ പ്രസിഡന്റ് അബ്ദുള്‍ കലാമിനെയാണ് താന്‍ മാതൃകായാക്കുന്നതെന്നും യേശുദാസ് പറഞ്ഞു.

അമേരിക്കയില്‍ എല്ലാവരേയും ചെക്ക് ചെയ്തിട്ടേ വിടൂ. അത് പ്രസിഡന്റായാലും അങ്ങനെ തന്നെയാണ്. ഇത് തന്നെയാണ് അബ്ദുള്‍ കലാമും ചെയ്തത്. അത് ഇവിടെ അടിയനും പിന്തുടരുന്നു. പത്മനാഭ സ്വാമി ക്ഷേത്രത്തില്‍ പ്രവേശിക്കാന്‍ ഒരു ഫോമുണ്ടെന്ന് പറഞ്ഞു. അത് ഒപ്പിട്ടു കൊടുക്കുകയാണ് ചെയ്തത്. അതില്‍ ഒപ്പിട്ടാല്‍ ഒരു പ്രശ്‌നമില്ല. ആര്‍ക്ക് വേണമെങ്കിലും ക്ഷേത്രത്തില്‍ കയറാമെന്നാണ് പറഞ്ഞത്. സത്യത്തോടു കൂടിയും വിശ്വാസത്തോടു കൂടിയും അവിടെ പ്രവേശിക്കാന്‍ വേണ്ടിയാണ് ഒപ്പിട്ട് കൊടുത്തത്. അല്ലാതെ അവിടെ കേറി പ്രശ്‌നമുണ്ടാക്കാനല്ല.

ഇന്നലെ നമ്മുടെ അവിടെ ചെറിയൊരു പരിപാടി ഉണ്ടായിരുന്നു. സാധാരണ മാധ്യമങ്ങളെ വിളിച്ചാല്‍ നല്ലകാര്യങ്ങള്‍ക്ക് ആരും വരാറില്ല. ഇന്നലെ വലിയ ആളായിരുന്നു. ഇരിക്കാന്‍ പോലും സ്ഥലമില്ലായിരുന്നു. ഇതിന് കാരണം അവര്‍ക്ക് എന്നെ കൊണ്ട് ഇക്കാര്യത്തില്‍ എന്തെങ്കിലും പറയിക്കണമായിരുന്നു. അതിന് ശേഷം അതിനെ വിലച്ചു കീറി എന്നേയും കീറി, എന്റെ വസ്ത്രത്തേയും എന്തെങ്കിലുമൊക്കെ ആക്കണം. എന്റെ ഈശ്വരാ ഇവര്‍ക്ക് നല്ല ബുദ്ധികൊടുക്കണം. നല്ലത് ചിന്തിച്ചാല്‍ അവരുടെ പേനയില്‍ നിന്ന് നല്ലത് വരും. അതിന് വേണ്ടി ജഗദീശ്വരനോട് പ്രാര്‍ത്ഥിക്കുന്നു.

എന്റെ ഈശ്വരന്‍ എന്റെ ഹൃദയത്തിലുണ്ട്. ഇത് മനസ്സിലാക്കിയാല്‍ പ്രശ്‌നമില്ല. എല്ലാവരുടെ മനസ്സിലുമുണ്ട്. ഇത് മനസ്സിലാക്കിയാല്‍ എവിടേയും പോകും. വളരെ വര്‍ഷങ്ങള്‍ക്ക് മുമ്പ് ചന്ദ്രികയുടെ ലേഖകന്‍ ചോദിച്ചു. നിങ്ങളെ എന്തുകൊണ്ട് ഗുരുവായൂരില്‍ കയറ്റുന്നില്ലെന്ന്. അപ്പോള്‍ ദൈവം ബുദ്ധി തന്നു. ഞാന്‍ തിരിച്ചൊരു ചോദ്യം ചേദിച്ചു. ഞാന്‍ നിങ്ങളെ പോലെ മാര്‍ഗ്ഗം കൂടിയിട്ട് സുന്നത്തൊന്നും കഴിക്കാതെ മക്കയില്‍ പോകണമെന്ന് ആഗ്രഹമുണ്ട്? അതു കേട്ടപ്പോള്‍ അതെങ്ങനെ എന്നായിരുന്നു മറുചോദ്യം. അതിന് ഞാന്‍, അപ്പോഴിവിടെ ഇതിങ്ങനെയെന്നും മറുപടി നല്‍കി. അത്രയേ കാര്യമുള്ളൂ.

വെറുതെ വലിഞ്ഞു കയറി പ്രശ്‌നമുണ്ടാക്കാന്‍ ഞാനില്ല. കയറ്റുമ്പോള്‍ കയറാം. അത്രമാത്രം. എല്ലാം അറിയുന്ന ആളാണ് അവിടെയുള്ളത്. ഇത് അറിയാമെങ്കില്‍ ഒന്നും മിണ്ടില്ല വാമൂടി ഇരിക്കുകയേ ഉള്ളൂ യേശുദാസ് പറഞ്ഞു നിര്‍ത്തി.