ഗൗരിയുടെ മരണം ഫലപ്രദമായി അന്വേഷിക്കണമെന്നാവശ്യപ്പെട്ട് മാതാപിതാക്കള് മുഖ്യമന്ത്രിക്ക് പരാതി നല്കും, ഉത്തരവാദികളായവര്ക്കെതിരെ കര്ശന നടപടി സ്വീകരിച്ചില്ലെങ്കില് സ്കൂളിനു മുന്നില് കുടുംബത്തോടൊപ്പം മരണം വരെ സത്യഗ്രഹം നടത്തുമെന്ന് ഗൗരിയുടെ മാതാവ്
ട്രിനിറ്റി ലൈസിയം സ്കൂളിലെ പത്താം ക്ലാസ് വിദ്യാര്ത്ഥി ഗൗരി നേഘയുടെ മരണവുമായി ബന്ധപ്പെട്ട കേസ് ഫലപ്രദമായി അന്വേഷിക്കണം എന്നാവശ്യപ്പെട്ട് മാതാപിതാക്കള് മുഖ്യമന്ത്രി പിണറായി വിജയന് പരാതി നല്കും. ഇന്ന് പതിനൊന്ന് മണിയോടെ മുഖ്യമന്ത്രിയെ ഓഫീസിലെത്തിയാണ് ഇവര് പരാതി നല്കുന്നത്.
അതേസമയം, തന്റെ മകളുടെ മരണത്തിന് ഉത്തരവാദികളായവര്ക്കെതിരെ കര്ശന നടപടി സ്വീകരിച്ചില്ലെങ്കില് സ്കൂളിന് മുന്നില് കുടുംബത്തോടൊപ്പം മരണം വരെ സത്യഗ്രഹം നടത്തുമെന്ന് ഗൗരിയുടെ മാതാവ് ശാലി പറഞ്ഞു. തന്റെ ഇളയകുട്ടിക്ക് സ്കൂള് അധികൃതര് നല്കിയ തെറ്റായ ശിക്ഷയെ ചോദ്യം ചെയ്തതിന് മൂത്തമകള്ക്ക് വലിയ ശിക്ഷയാണ് സ്കൂള് അധികൃതര് നല്കിയതെന്നും ഇവര് പറഞ്ഞു.
ഒരു കുഞ്ഞിനും ഈ അവസ്ഥയുണ്ടാകരുത്. ഒരു അച്ഛനും അമ്മയ്ക്കും ഇതേ സാഹചര്യമുണ്ടാകരുതെന്നും ശാലി പറഞ്ഞു. അദ്ധ്യാപികയുടെ മാനസിക പീഡനത്തെ തുടര്ന്ന് ഗൗരി സ്കൂള് കെട്ടിടത്തില് നിന്ന് ചാടിയ വിവരം സ്കൂള് അധികൃതര് വൈകിയാണ് നമ്മളെ അറിയിച്ചത്. ആദ്യം പടിയില് കാല് വഴുതി വീണെന്നാണ് തെറ്റിദ്ധരിപ്പിച്ചത്. ഗൗരിയെ രണ്ടു മണിക്കൂര് മുമ്പ് തിരുവനന്തപുരത്ത് എത്തിക്കാന് സാധിച്ചിരുന്നെങ്കില് ഇന്നും എന്റെ പൊന്നുമോള് ജീവനോടെ ഉണ്ടാകുമായിരുന്നുവെന്നും അവര് കൂട്ടിച്ചേര്ത്തു.
കഴിഞ്ഞ വെള്ളിയാഴ്ചയാണ് കൊല്ലം ട്രിനിറ്റി ലൈസിയം സ്കൂളിലെ പത്താംക്ലാസ് വിദ്യാര്ത്ഥിനിയായ ഗൗരി നേഘ സ്കൂള് കെട്ടിടത്തിന് മുകളില് നിന്ന് ചാടിയത്. ഗുരുതരാവസ്ഥയില് തിരുവനന്തപുരത്തെ ആശുപത്രിയില് ചികിത്സയിലിരിക്കെ തിങ്കളാഴ്ച അതിരാവിലെ കുട്ടി മരണത്തിന് കീഴടങ്ങി. സ്കൂളിലെ രണ്ട് അദ്ധ്യാപകര് നടത്തിയ പീഡനമാണ് മരണത്തില് കലാശിച്ചതെന്ന് ബന്ധുക്കള് പൊലീസില് പരാതി നല്കിയിരുന്നു. കുട്ടി സ്കൂള് കെട്ടിടത്തില് നിന്ന് ചാടിയ സംഭവത്തില് ആരോപണ വിധേയരായ അദ്ധ്യാപികമാരായ ക്രസന്റ്, സിന്ധു എന്നിവര് ഒളിവിലാണ്. കുട്ടി മരിച്ചതോടെ ഇരുവര്ക്കുമെതിരെ പൊലീസ് ശക്തമായ വകുപ്പുകള് ചേര്ത്ത് കേസ് രജിസ്റ്റര് ചെയ്തിരിക്കുകയാണ്. ഹൈക്കോടതിയില് ഇരുവരും മുന്കൂര് ജാമ്യാപേക്ഷ നല്കിയിട്ടുണ്ട്.
https://www.facebook.com/Malayalivartha
