കൊല്ലത്ത് മരിച്ച പത്താംക്ലാസ് വിദ്യാര്‍ത്ഥിനി ഗൗരിയുടെ മരണത്തിന് പിന്നാലെ അടച്ചുപൂട്ടിയ ട്രിനിറ്റി ലൈസിയം സ്‌കൂളില്‍ നടന്ന അടിയന്തര പിടിഎ യോഗത്തില്‍ ബഹളം.

കൊല്ലം ട്രിനിറ്റി ലൈസിയം സ്‌കൂളില്‍ ജില്ലാ ഭരണകൂടത്തിന്റെ നേതൃത്വലായിരുന്നു യോഗം. സംഭവത്തെ തുടര്‍ന്ന് അടഞ്ഞു കിടക്കുകയായിരുന്ന സ്‌കൂള്‍ തുറക്കുന്നത് സംബന്ധിച്ച് ചര്‍ച്ച ചെയ്യാനായിരുന്നു യോഗം ചേര്‍ന്നത്. പൊലീസിന്റെ സാന്നിദ്ധ്യത്തിലായിരുന്നു ചര്‍ച്ച.

സ്‌കൂള്‍ തുറക്കണമെന്ന് യോഗത്തില്‍ ഒരു വിഭാഗം രക്ഷിതാക്കള്‍ ആവശ്യപ്പെട്ടു. എന്നാല്‍, ഹൈക്കോടതിയെ സമീപിക്കണമെന്നായിരുന്നു മറ്റൊരു വിഭാഗത്തിന്റെ ആവശ്യം. ഇതോടെയാണ് ബഹളം ഉടലെടുത്തത്. സ്കൂള്‍ അനിശ്ചിതമായി അടച്ചിട്ടാല്‍ മറ്റു വിദ്യാര്‍ത്ഥികളുടെ പഠനം മുടങ്ങുമെന്ന് സ്‌കൂള്‍ തുറക്കുന്നതിനെ അനുകൂലിക്കുന്ന വിഭാഗം നിലപാടെടുത്തു. ഇതിനെ മറുവിഭാഗം എതിര്‍ത്തതോടെയാണ് ബഹളം രൂക്ഷമായത്. കുറ്റക്കാരായ അദ്ധ്യാപികമാരെ അറസ്റ്റു ചെയ്ത ശേഷം മതി സ്‌കൂള്‍ തുറക്കുന്നതെന്നും അവര്‍ ആവശ്യപ്പെട്ടു. പൊലീസ് ഇടപെട്ട് രക്ഷിതാക്കളെ ശാന്തരാക്കാന്‍ ശ്രമിച്ചെങ്കിലും ഫലം കണ്ടില്ല.

ഗൗരിയുടെ മരണത്തിന് പിന്നാലെ കഴിഞ്ഞ 12 ദിവസമായി സ്‌കൂള്‍ അടഞ്ഞു കിടക്കുകയാണ്. അതേസമയം, ഗൗരിയുടെ മരണത്തിന് കാരണക്കാരായവരെ അറസ്റ്റു ചെയ്യാതെ സ്‌കൂള്‍ തുറക്കാന്‍ അനുവദിക്കില്ലെന്നാണ് വിദ്യാര്‍ത്ഥി സംഘടനകളുടെ നിലപാട്.

ഒക്ടോബര്‍ ഇരുപത് വെള്ളിയാഴ്ച ഉച്ചയ്ക്കാണ് ട്രിനിറ്റി സ്‌കൂളിന്റെ മൂന്നാം നിലയില്‍ നിന്നും ചാടി ഗൗരി ആത്മഹത്യക്ക് ശ്രമിച്ചത്. തിങ്കളാഴ്ച പുലര്‍ച്ചെ ഗൗരി മരിച്ചു. ഇതിന് പിന്നാലെ എസ്എഫ്‌ഐ, കെഎസ്‌യു ഉള്‍പ്പെടെയുള്ള വിദ്യാര്‍ത്ഥി സംഘടനകള്‍ സ്‌കൂളിലേക്ക് പ്രതിഷേധ മാര്‍ച്ച് സംഘടിപ്പിച്ചിരുന്നു. ഇത് സംഘര്‍ഷത്തില്‍ കലാശിക്കുകയും ചെയ്തിരുന്നു.

സ്‌കൂള്‍ തുറക്കുന്നതുമായി ബന്ധപ്പെട്ട് ചര്‍ച്ചചെയ്യാന്‍ കളക്ടറുടെ നേതൃത്വത്തില്‍ കഴിഞ്ഞ ദിവസം വിളിച്ചു ചേര്‍ത്ത യോഗം കെഎസ്‌യു പ്രവര്‍ത്തകര്‍ ഇടപെട്ട് അലങ്കോലപ്പെടുത്തിയിരുന്നു. തങ്ങളെ ചര്‍ച്ചയ്ക്ക് ക്ഷണിച്ചില്ല എന്നു പറഞ്ഞ് പ്രവര്‍ത്തകര്‍ ചര്‍ച്ച നടന്ന സ്ഥലത്തേക്ക് തള്ളിക്കയറുകയായിരുന്നു.

അതിനിടെ ഗൗരിയുടെ മരണവുമായി ബന്ധപ്പെട്ട കേസ് ഡയറി പൊലീസ് ഇന്ന് കോടതിയില്‍ സമര്‍പ്പിക്കും. പ്രതികളായ അധ്യാപികമാരുടെ മുന്‍കൂര്‍ ജാമ്യാപേക്ഷ ഹൈക്കോടതി നാളെ പരിഗണിക്കാനിരിത്തെയാണ് കേസ് ഡയറി പൊലീസ് ഇന്ന് സമര്‍പ്പിക്കുക.