ചവറയില്‍ തൊഴിലാളികള്‍ മരിച്ചത് തൊഴില്‍ തര്‍ക്കത്തെ തുടര്‍ന്നായിരുന്നു. പട്ടിണിയും ദാരിദ്ര്യത്തിനും നടുവിലാണ് ഈ തൊഴിലാളികള്‍ തൊളില്‍ പ്രശ്‌നം ഉന്നയിച്ച് കെഎംഎംഎല്‍ എംഎസ് പ്ലാന്റിലേക്ക് സമരം നയിച്ചത്.
കൊല്ലം ചവറയില്‍ കെഎംഎംഎല്‍ എംഎസ് പ്ലാന്റിലേക്കുള്ള ഇരുമ്പു പാലം തകര്‍ന്ന് മരിച്ചവരുടെ ആശ്രിതര്‍ക്ക് പത്ത് ലക്ഷം രൂപ സര്‍ക്കാര്‍ ധനസഹായം നല്‍കും. അപകടത്തില്‍ പരിക്കേറ്റവരുടെ ചികിത്സാ ചിലവും സര്‍ക്കാര്‍ ഏറ്റെടുക്കും. സംഭവസ്ഥലം സന്ദര്‍ശിച്ച ശേഷം മന്ത്രി ജെ. മേഴിസിക്കുട്ടിയമ്മയാണ് ഇക്കാര്യം അറിയിച്ചത്. സര്‍ക്കാര്‍ ഈ പ്രതിഫലതുകയ്ക്കു പകരം നേരത്തെ ഉണര്‍ന്നിരുന്നുവെങ്കില്‍ ഈ മൂന്നു പേരുടെ ജീവന്‍ രക്ഷപ്പെടുത്താമായിരുന്നു.

തിങ്കളാഴ്ച രാവിലെയാണ് ഇരുമ്പു നടപ്പാലം തകര്‍ന്ന് വീണത്. പന്മന കൊല്ലക കൈരളിയില്‍ പരേതനായ പി.ആര്‍. ചന്ദ്രശേഖരപിള്ളയുടെ ഭാര്യ ശ്യാമളാ ദേവിയമ്മ (57), പന്മന മേക്കാട് ഫിലോമിന മന്ദിരത്തില്‍ പരേതനായ ക്രിസ്റ്റഫറുടെ ഭാര്യ റെയ്ച്ചല്‍ എന്നു വിളിക്കുന്ന ആഞ്ചലീന (45), പന്മന മേക്കാട് ജിജിവിന്‍ വില്ലയില്‍ ഡോ. ഷിബുവിന്റെ ഭാര്യ അന്നമ്മ (ഷീന45) എന്നിവരാണു മരിച്ചത്.

പൊന്മനയിലെ കുടിയൊഴിപ്പിക്കപ്പെട്ട മൈനിംഗ് തൊഴിലാളി കുടുംബങ്ങള്‍ തൊഴില്‍ പ്രശ്‌നമുന്നയിച്ച് കന്പനിക്കു മുന്നില്‍ സമരം നടത്തിയിരുന്നു. ഇതിനുശേഷം പാലത്തില്‍ കയറി തിരിച്ചുപോകാനൊരുങ്ങി. ഇതേസമയം തന്നെ കന്പനിയിലേക്കു പ്രവേശിക്കാനായി ജീവനക്കാരും പാലത്തില്‍ കയറി. ഇതോടെ പാലത്തിന്റെ പടിഞ്ഞാറു വശത്തെ ഇരുമ്പു തൂണ്‍ ഇളകി ചെരിയുകയായിരുന്നു. ആളുകള്‍ ഒരു വശത്തേക്കു മാറിയതോടെ പാലത്തിന്റെ നടുഭാഗം ഒടിഞ്ഞ് കനാലിലേക്കു പതിക്കുകയായിരുന്നു.