നാളെ നടക്കുന്ന മന്ത്രിസഭാ യോഗത്തില്‍ റവന്യം സെക്രട്ടറി പി എച്ച് കുര്യനെ മാറ്റണമെന്ന് റവന്യുമന്ത്രി ആവശ്യപ്പെടും. ആവശ്യം മുഖ്യമന്ത്രി അംഗീകരിച്ചില്ലെങ്കില്‍ സി പി ഐ മന്ത്രിമാര്‍ ഒന്നടങ്കം രാജിവച്ച് സര്‍ക്കാരിനെ പുറത്തു നിന്നും പിന്തുണക്കുന്നതിനെ കുറിച്ച് ആലോചനകള്‍ സജീവമാകുന്നു. റവന്യൂ മന്ത്രി മാത്രം രാജി വച്ചാല്‍ മതിയോ എന്നും ആലോചനയുണ്ട്.

സംസ്ഥാനത്തെ രണ്ടാമത്തെ മന്ത്രി ആവശ്യപ്പെട്ടിട്ടും അദ്ദേഹത്തിന്റെ വകുപ്പിലെ കേസ് വാദിക്കാന്‍ അഡീഷണല്‍ എ.ജി. രഞ്ജിത്ത് തമ്പാനെ അനുവദിക്കാത്തതും സി പി ഐ സംസ്ഥാന നേതൃത്വത്തെ പൊട്ടിത്തെറിയുടെ വക്കിലെത്തിച്ചിരിക്കുന്നു. 

സി പി ഐ ഇത്തരത്തില്‍ സര്‍ക്കാരില്‍ തുടരുന്നതില്‍ അര്‍ത്ഥമില്ലെന്നാണ് കരുതുന്നത്. കാനം രാജേന്ദ്രനുമായി ഇക്കാര്യം റവന്യു മന്ത്രി സംസാരിച്ച് കഴിഞ്ഞു. തത്കാലം മന്ത്രി സഭക്ക് ഭീഷണി കാണില്ല. സി പി ഐ മുന്നണി വിടുകയുമില്ല. എന്നാല്‍ സി പി എം ഒറ്റയ്ക്ക് ഭരിച്ചാല്‍ മതിയെന്നാണ് സി പി ഐ മന്ത്രിമാരുടെ അഭിപ്രായം. മന്ത്രി ചന്ദ്രശേഖരന് മാത്രമല്ല ഇത്തരമൊരു അഭിപ്രായമുള്ളത്. മറ്റ് സി പി ഐ മന്ത്രിമാരും രോഷാകുലരാണ്. സ്വന്തം വകുപ്പുകളില്‍ അവര്‍ക്ക് സ്വാതന്ത്ര്യം ലഭിക്കുന്നില്ല. ഭരിക്കാന്‍ അനുവദിക്കുന്നില്ല. ഉദ്യോഗസ്ഥര്‍ മുഖ്യമന്ത്രിയോടാണ് റിപ്പോര്‍ട്ട് ചെയ്യുന്നത്. സി പി എം സംസ്ഥാന നേതൃത്വം തങ്ങളുടെ വകുപ്പുകളില്‍ തങ്ങള്‍ അറിയാതെ ഇടപെടുന്നു.

ലോ അക്കാദമി ഭൂമിപ്രശ്‌നം മുതല്‍ തോമസ് ചാണ്ടിയുടെ കായല്‍ കൈയേറ്റം വരെയുള്ള കാര്യങ്ങളില്‍ റവന്യൂ സെക്രട്ടറി കുര്യന്‍ തങ്ങള്‍ പറയുന്നത് കേള്‍ക്കുന്നില്ലെന്നാണ് മന്ത്രിയുടെ അഭിപ്രായം. അക്കാദമി ഭൂമിപ്രശ്‌നത്തില്‍ റിപ്പോര്‍ട്ട് കിട്ടിയിട്ടും നടപടിയെടുക്കാന്‍ കഴിയാത്തത് റവന്യു സെക്രട്ടറിയുടെ നിലപാട് കാരണമാണ്. ഉദ്യോഗസ്ഥരെ മാറ്റാമെന്ന് കരുതിയാല്‍ ചെയ്യാനാവില്ല. കാരണം മന്ത്രിയെക്കാള്‍ പിടുത്തം ഉദ്യോഗസ്ഥര്‍ക്ക് സര്‍ക്കാരിലുണ്ട്. ഒരു കീഴുദ്യോഗസ്ഥനെ മാറ്റാന്‍ പോലും കഴിയാത്ത തരത്തില്‍ സി പി ഐ മന്ത്രിമാര്‍ അശക്തരാണ്. 

മൂന്നാര്‍ കൈയേറ്റം ഒഴിപ്പിക്കലില്‍ കുര്യന്‍ പ്രവര്‍ത്തിച്ചത് സി പി എം നിര്‍ദ്ദേശാനുസരണമാണെന്ന് റവന്യുമന്ത്രിക്ക് ആക്ഷേപമുണ്ട്. ഇതിന്റെ ഫലമായി കൈയേറ്റം ഒഴിപ്പിക്കല്‍ നടപടികള്‍ നിര്‍ത്തിവയ്‌ക്കേണ്ടി വന്നു. റവന്യു മന്ത്രി എന്ത് ചോദിച്ചാലും അത് മുഖ്യമന്ത്രി പറഞ്ഞിട്ടാണെന്ന് പറയും. മൂന്നാറുമായി ബന്ധപ്പെട്ട് ഹരിത െ്രെടബ്യൂണലിലുള്ള കേസില്‍ നിന്നും രഞ്ജിത്ത് തമ്പാനെ മാറ്റാനും സി പി എം ശ്രമിച്ചതായി റവന്യുമന്ത്രി ആരോപിക്കുന്നു.

കഴിഞ്ഞ സര്‍ക്കാരിന്റെ കാലത്ത് കുര്യന്‍ ഇറക്കിയ വിവാദ ഉത്തരവുകള്‍ക്കെതിരെ ഇന്നും സംസാരിക്കന്ന പാര്‍ട്ടിയാണ് സി പി ഐ . കുര്യനെ പോലൊരു ഉദ്യാഗസ്ഥന്‍ തങ്ങള്‍ക്ക് ബാധ്യതയാണെന്ന് മനസിലാക്കിയ കാലം മുതല്‍ അദ്ദേഹത്തെ മാറ്റണമെന്ന് ആവശ്യപ്പെടുകമാണ്. എന്നാല്‍ ഐ.എ.എസുകാരുടെ സ്ഥലംമാറ്റം തീരുമാനിക്കുന്നത് തങ്ങളല്ല. അവര്‍ ഇതിന് തയ്യാറാവുന്നില്ലെന്നാണ് സി പി ഐ യുടെ അഭിപ്രായം. അപ്പോള്‍ സര്‍ക്കാരില്‍ നിന്നും ഇറങ്ങി നില്‍ക്കുന്നതാണ് തങ്ങള്‍ക്ക് നല്ലതെന്ന് അവര്‍ കരുതുന്നു. ഇല്ലെങ്കില്‍ ചാണ്ടി കേസില്‍ രഞ്ജിത്ത് തമ്പാനെ നിയമിക്കണം. പി എച്ച് കുര്യനെ റവന്യംവില്‍ നിന്നും മാറ്റണം.

സി പി ഐ യുടെ പിണക്കം സി പി എം ഗൗരവമായെടുക്കുമോ എന്നറിയില്ല. ഇല്ലെങ്കില്‍ സി പി ഐ മന്ത്രിമാര്‍ പുറത്തിറങ്ങും. അങ്ങനെ സംഭവിച്ചാല്‍ അത് സര്‍ക്കാരിന് കളങ്കമായി തീരും. ഇക്കാര്യത്തില്‍ ഇടപെടാന്‍ സമര്‍ത്ഥന്‍ കോടിയേരി ബാലകൃഷ്ണനാണ്. എന്നാല്‍ അദ്ദേഹം ഇടപെടുമോ എന്നറിയില്ല. കാരണം തോമസ് ചാണ്ടി വിവാദത്തില്‍ സി പി ഐ യില്‍ നിന്നും വ്യത്യസ്തമായ നിലപാടാണ് കോടിയേരി പിന്തുടരുന്നത്.

സര്‍ക്കാരിനെ പ്രതിസന്ധിയിലാക്കാന്‍ സി പി ഐ ശ്രമിക്കുന്നു എന്ന വിശ്വാസമാണ് കോടിയേരിക്കുള്ളത്. തങ്ങള്‍ ആദര്‍ശധീരന്‍മാരാണെന്ന് വരുത്തി തീര്‍ക്കാര്‍ മനപൂര്‍വം ശ്രമിക്കുന്നു. ഇത് ജനാധിപത്യ പാര്‍ട്ടിക്ക് ചേര്‍ന്നതല്ലെന്ന് കോടിയേരി വിശ്വസിക്കുന്നു. കുര്യന്‍ റവന്യു വകുപ്പിലുള്ള സി പി എമ്മിന്റെ ചാരനാണ്. പല തീരുമാനങ്ങളും റവന്യു വില്‍ സി പി എം നടപ്പിലാക്കുന്നത് കുര്യന്‍ വഴിയാണ്. അതു കൊണ്ടു തന്നെ അദ്ദേഹത്തെ അവര്‍ രക്ഷിക്കും.