മദ്യലഹരിയില്‍ ഔദ്യോഗിക വാഹനത്തില്‍ ഡ്രൈവര്‍ക്കൊപ്പം കറങ്ങിയ ക്രൈംബ്രാഞ്ച് ഐ.ജി: ഇ.ജെ.ജയരാജിനെ സസ്‌പെന്‍ഡ് ചെയ്തു. ഉത്തരവില്‍ മുഖ്യമന്ത്രി പിണറായി വിജയന്‍ ഇന്ന് ഒപ്പുവച്ചു. ഐ.ജിക്കെതിരെ നടപടി വേണമെന്ന് ഡി.ജി.പി ലോക്‌നാഥ് ബെഹ്‌റ ശുപാര്‍ശ ചെയ്തിരുന്നു. ഐ.ജിക്കൊപ്പമുണ്ടായിരുന്ന ഡ്രൈവര്‍ സന്തോഷിനെ നേരത്തെ സസ്‌പെന്‍ഡ് ചെയ്തിരുന്നു.

കഴിഞ്ഞ ബുധനാഴ്ചയാണു മദ്യപിച്ചശേഷം ജയരാജും ഡ്രൈവര്‍ സന്തോഷും അമിതവേഗത്തില്‍ ജീപ്പില്‍ സഞ്ചരിച്ചത്. കൊല്ലം അഞ്ചലില്‍ വച്ച് നാട്ടുകാര്‍ ഈ വാഹനം തടയുകയും പൊലീസിനെ വിവരം അറിയിക്കുകയുമായിരുന്നു. തുടര്‍ന്ന് ഇരുവരെയും കസ്റ്റഡിയിലെടുത്തു പുനലൂര്‍ ഡിവൈ.എസ്പി ഓഫീസില്‍ കൊണ്ടുപോയി. പിന്നീട് നടത്തിയ വൈദ്യപരിശോധനയില്‍ മദ്യപിച്ചതായി സ്ഥിരീകരിച്ചു.

മദ്യപിച്ചു വാഹനമോടിച്ചതിനു ഡ്രൈവര്‍ സന്തോഷിനെതിരെയും മദ്യപിച്ച ഡ്രൈവറെ വാഹനമോടിക്കാന്‍ പ്രേരിപ്പിച്ചതിനു ജയരാജിനെതിരെയും കേസെടുത്തിരുന്നു. സംഭവം പൊലീസ് സേനയ്ക്ക് അവമതിപ്പുണ്ടാക്കിയെന്നും ഐജിക്കെതിരെ കര്‍ശന നടപടി വേണമെന്നും കൊല്ലം റൂറല്‍ എസ്.പി ഡി.ജിപി.ക്ക് റിപ്പോര്‍ട്ട് നല്‍കിയിരുന്നു. ഇതിന്റെ അടിസ്ഥാനത്തിലാണു നടപടിക്ക് ഡി.ജി.പി മുഖ്യമന്ത്രിയോട് ശുപാര്‍ശ ചെയ്തത്.

മദ്യപിച്ചു വാഹനത്തില്‍ കറങ്ങിയതിനൊപ്പം ഔദ്യോഗിക വാഹനം ദുരുപയോഗം ചെയ്തതും ഐജിയുടെ ഭാഗത്തുണ്ടായ ഗുരുതര വീഴ്ചയാണെന്നു ഡി.ജി.പി റിപ്പോര്‍ട്ടില്‍ വ്യക്തമാക്കിയിരുന്നു.