പ്രതിപക്ഷനേതാവ് രമേശ് ചെന്നിത്തല കാസര്‍കോട് നിന്ന് നവംബര്‍ ഒന്നിന് ആരംഭിച്ച പടയൊരുക്കം യാത്രയുടെ പോസ്റ്ററില്‍ നിന്നും ഫഌക്‌സില്‍ നിന്നും മുതിര്‍ന്ന കോണ്‍ഗ്രസ് നേതാവ് ഉമ്മന്‍ചാണ്ടി ഔട്ട്. തലസ്ഥാനത്ത് ഐ ഗ്രൂപ്പ് നേതാക്കള്‍ സ്ഥാപിച്ച പോസ്റ്ററുകളിലും ഫഌക്‌സുകളിലും ചെന്നിത്തല മാത്രമാണ് നിറഞ്ഞ് നില്‍ക്കുന്നത്. യു.ഡി.എഫ് നേതൃത്വത്തിലാണ് യാത്ര നടത്തുന്നതെങ്കിലും ഘടകക്ഷിനേതാക്കള്‍ക്കും പോസ്റ്ററുകളില്‍ വേണ്ടത്ര പ്രാധാന്യം നല്‍കിയിട്ടില്ല. അങ്ങനെ യാത്ര മൊത്തത്തില്‍ ചെന്നിത്തലയുടെയും ഐ ഗ്രൂപ്പിന്റെയും തേരോട്ടമായി മാറുകയാണ്. സോളാര്‍ പുനരന്വേഷണത്തില്‍ പ്രതിരോധത്തിലായ ഉമ്മന്‍ചാണ്ടിയെ ഒതുക്കി പാര്‍ട്ടിയിലും മുന്നണിയിലും ഹൈക്കാന്‍ഡിലും മേല്‍ക്കൈ നോടുകയാണ് ചെന്നിത്തലയുടെ ലക്ഷ്യം. 

ജാഥയുടെ തുടക്കത്തില്‍ ഉമ്മന്‍ചാണ്ടിയെ ക്ഷണിച്ചിട്ടുണ്ട്. പക്ഷെ, പനിയായതിനാല്‍ അദ്ദേഹം പങ്കെടുക്കുമോ എന്നറിയില്ല. ജാഥ കൊച്ചിയിലെത്തുമ്പോള്‍ മുന്‍പ്രധാനമന്ത്രി മന്‍മോഹന്‍സിംഗും കോണ്‍ഗ്രസ് അധ്യക്ഷ സോണിയാ ഗാന്ധിയും ഉപാധ്യക്ഷന്‍ രാഹുല്‍ ഗാന്ധിയും മറ്റും അഭിസംബോധന ചെയ്യുന്നുണ്ട്. ആ സമ്മേളനത്തില്‍ ഉമ്മന്‍ചാണ്ടി പങ്കെടുക്കുമെങ്കിലും അദ്ദേഹത്തിന് വേണ്ടത്ര പ്രാധാന്യം ലഭിക്കില്ല. ഉദ്ഘാടന സമ്മേളനം മുതിര്‍ന്ന കോണ്‍ഗ്രസ് നേതാവ് എ.കെ ആന്റണിയാണ് ഉദ്ഘാടനം ചെയ്യുന്നത്. കോഴിക്കോട് മുസ് ലിംലീഗ് അധ്യക്ഷന്‍ പാണക്കാട് ഹൈദരലി തങ്ങളാണ് ജാഥയോടുബന്ധിച്ച സമ്മേളനം ഉദ്ഘാടനം ചെയ്യുന്നത്. 

നിയമസഭാ തെരഞ്ഞെടുപ്പില്‍ പാര്‍ട്ടിക്കുണ്ടായ തോല്‍വിയെ തുടര്‍ന്ന് പ്രതിപക്ഷ നേതൃസ്ഥാനം പോലും ഉപേക്ഷിച്ച ഉമ്മന്‍ചാണ്ടിയുടെ ജനസമ്മതിക്ക് കോട്ടംവരുത്തുകയാണ് ഐ ഗ്രൂപ്പിന്റെ ലക്ഷ്യം. അടുത്ത നിയമസഭാ തെരഞ്ഞെടുപ്പിന് ശേഷം യു.ഡി.എഫ് അധികാരത്തിലെത്തിയാല്‍ ഐ ഗ്രൂപ്പില്‍ നിന്ന് മുഖ്യമന്ത്രി വേണമെന്നാണ് ഇവരുടെ ആഗ്രഹം. അതിനായുള്ള ചരടുവലികളുടെ തുടക്കം കൂടിയാണ് പടയൊരുക്കം. സാധാരണ ഒരു സര്‍ക്കാരിന്റെ അവസാന കാലത്താണ് ജാഥകള്‍ നടത്തുക. എന്നാല്‍ ബി.ജെ.പി സംസ്ഥാന അധ്യക്ഷന്‍ നടത്തിയ ജനരക്ഷായാത്രയ്ക്ക് പിന്നാലെ സി.പി.എം ജനജാഗ്രതാ യാത്ര നടത്തുകയാണ്. ഇത് രണ്ടും കൂടി കണക്കിലെടുത്താണ് യാത്ര നടത്താന്‍ ചെന്നിത്തല തീരുമാനിച്ചത്.