കേരളത്തില്‍ ബിജെപിയെ വളര്‍ത്തുകയാണ് സിപിഐഎമ്മിന്റെ ലക്ഷ്യമെന്ന് കോണ്‍ഗ്രസ് പ്രവര്‍ത്തകസമിതി അംഗം എകെ ആന്റണി കുറ്റപ്പെടുത്തി. ഇതിന് സമാനമായി കേരളത്തില്‍ കോണ്‍ഗ്രസിനെതിരെ സിപിഐഎമ്മിനെ സഹായിക്കുകയാണ് ബിജെപി കേന്ദ്ര നേതൃത്വത്തിന്റെ ലക്ഷ്യമെന്നും ആന്റണി പറഞ്ഞു. പ്രതിപക്ഷനേതാവ് രമേശ് ചെന്നിത്തല നയിക്കുന്ന പടയൊരുക്കം യാത്ര ഉപ്പളയില്‍ ഉദ്ഘാടനം ചെയ്ത് സംസാരിക്കുകയായിരുന്നു ആന്റണി.

പടയൊരുക്കം ഒരു മുന്നറിയിപ്പ് മാത്രമാണെന്നും കേന്ദ്ര-സംസ്ഥാന സര്‍ക്കാരുകള്‍ക്കുള്ള താക്കീതും നോട്ടീസുമാണ് യാത്രയെന്നും ആന്റണി ചൂണ്ടിക്കാട്ടി. പടയൊരുക്കത്തിലൂടെ കേരളത്തിലെ സിപിഐഎമ്മിന്റെയും ബിജെപിയുടെയും രാഷ്ട്രീയ കപടനാടകം യുഡിഎഫ് നേതാക്കള്‍ ജനങ്ങള്‍ക്ക് മുന്നില്‍ തുറന്ന് കാണിക്കണമെന്ന് ആന്റണി ആവശ്യപ്പെട്ടു. കേന്ദ്രത്തില്‍ പ്രതിപക്ഷ ഐക്യ നീക്കങ്ങളെ തകര്‍ക്കുകയാണ് സിപിഐഎം ലക്ഷ്യമെന്നും മലയാളികളായ പിബി അംഗങ്ങളാണ് ഇതിന് പിന്നിലെന്നും ആന്റണി ആരോപിച്ചു.
കേന്ദ്രത്തിലെ ബിജെപി സര്‍ക്കാരിനെതിരെ രാഹുല്‍ ഗാന്ധി രാജ്യം മുഴുവന്‍ പടയോട്ടം നടത്തുകയാണെന്നും അതിന് ശക്തി പകരാന്‍ ഈ കേരള യാത്രയ്ക്ക് കഴിയണമെന്നും എകെ ആന്റണി അഭിപ്രായപ്പെട്ടു. അടുത്ത ലോക്സഭാ തെരഞ്ഞെടുപ്പില്‍ യുപിഎ അധികാരത്തിലെത്തിയാല്‍ ജിഎസ്ടിയില്‍ മാറ്റം വരുത്തുമെന്ന് ആന്റണി വ്യക്തമാക്കി. കോണ്‍ഗ്രസ് നിര്‍ദ്ദേശം അവഗണിച്ചതാണ് ജിഎസ്ടി ഇന്നത്തെ നിലയിലെത്താന്‍ കാരണമെന്ന് ആന്റണി കുറ്റപ്പെടുത്തി.
പാചകവാതകവില വര്‍ധന കേരളപ്പിറവിക്ക് കിട്ടിയസമ്മാനമാണെന്ന് ആന്റണി പരിഹസിച്ചു. രാജ്യത്തെ ഇന്ധന വിലവര്‍ധനക്ക് മാറ്റം വരണമെങ്കില്‍ ബിജെപി സര്‍ക്കാര്‍ ഭരണത്തില്‍ നിന്ന് മാറണമെന്ന് ആന്റണി പറഞ്ഞു. നോട്ട് നിരോധനം കൊണ്ട് എന്ത് നേടിയെന്ന് കേന്ദ്രസര്‍ക്കാര്‍ വ്യക്തമാക്കണമെന്ന് ആവശ്യപ്പെട്ട ആന്റണി നരേന്ദ്ര മോദിയെ കൊണ്ട് ജനകീയ കോടതിയില്‍ ഇതിന് ഉത്തരം പറയിക്കണമെന്നും അഭിപ്രായപ്പെട്ടു.