രാജീവ് വധക്കേസില് അഡ്വ. സിപി ഉദയഭാനു അറസ്റ്റില്...ചോദ്യം ചെയ്തശേഷം നാളെ ഉദയഭാനുവിനെ കോടതിയില് ഹാജരാക്കും, കസ്റ്റഡിയില് വാങ്ങി കൂടുതല് ചോദ്യംചെയ്യാനാണ് പൊലീസ് നീക്കം
ചാലക്കുടി രാജീവ് വധക്കേസില് ഏഴാം പ്രതിയായ അഡ്വ. സിപി ഉദയഭാനു അറസ്റ്റില്. തൃപ്പൂണിത്തുറയിലെ സഹോദരന്റെ വീട്ടില് എത്തിയാണ് സിപി ഉദയഭാനുവിനെ പൊലീസ് അറസ്റ്റ് ചെയ്തത്. തൃശൂരില് നിന്നുള്ള പൊലീസ് സംഘമാണ് ഉദയഭാനുവിനെ അറസ്റ്റുചെയ്തത്. ഇന്ന് രാത്രി അന്വേഷണ സംഘം ചോദ്യം ചെയ്തശേഷം നാളെ ഉദയഭാനുവിനെ കോടതിയില് ഹാജരാക്കുമെന്നാണ് അന്വേഷണ സംഘം വ്യക്തമാക്കിയിരിക്കുന്നത്.
നാളെ കോടതിയില് ഹാജരാക്കിയാലും കസ്റ്റഡിയില് വാങ്ങി കൂടുതല് ചോദ്യംചെയ്യാനാവും പൊലീസ് ശ്രമിക്കുകയെന്നാണ് സൂചന. ജാമ്യം നിഷേധിച്ചുകൊണ്ടുള്ള ഉത്തരവില് തന്നെ കേസില് അഭിഭാഷകന്റെ പങ്ക് വ്യക്തമാകാന് അന്വേഷണ സംഘത്തിന് ചോദ്യംചെയ്യല് അനിവാര്യമാണെന്ന് കോടതി വ്യക്തമാക്കിയിരുന്നു.
ഇതിനാല് ഉദയഭാനുവിനെ കസ്റ്റഡിയില് കിട്ടാന് തടസ്സമുണ്ടാകില്ലെന്ന നിഗമനത്തിലാണ് അന്വേഷണ സംഘം. ഇന്നലെയാണ് അഡ്വ. സിപി ഉദയഭാനുവിന്റെ മുന്കൂര് ജാമ്യാപേക്ഷ ഹൈക്കോടതി തള്ളിയത്. രാജീവ് വധക്കേസുമായി ബന്ധപ്പെട്ട് അഭിഭാഷകന് എതിരെ നിരവധി തെളിവുകള് ലഭിച്ചതിനാല് കസ്റ്റഡിയില് എടുത്ത് ചോദ്യംചെയ്തേ മതിയാകൂ എന്ന് വ്യക്തമാക്കിയാണ് കോടതി ജാമ്യം നിഷേധിച്ചത്. കീഴടങ്ങാന് കൂടുതല് സമയം അനുവദിക്കണമെന്ന ആവശ്യം അനുവദിക്കാന് ആവില്ലെന്ന് വ്യക്തമാക്കിയാണ് കോടതി ഉദയഭാനുവിന്റെ ജാമ്യാപേക്ഷ തള്ളിയത്.
നേരത്തെ ജസ്റ്റീസ് ഉബൈദ് പുറപ്പെടുവിച്ച ഇടക്കാല ഉത്തരവിനേയും ഹൈക്കോടതി വിമര്ശിച്ചിരുന്നു. അന്വേഷണത്തെ തടസ്സപ്പെടുത്തുന്നതാണ് ഇടക്കാല ഉത്തരവെന്നും ഹൈക്കോടതി ഇന്ന് നിരീക്ഷിച്ചു. ഈ കേസില് വാദം കേള്ക്കുന്നതില് നിന്ന് ജസ്റ്റീസ് ഉബൈദ് പിന്മാറിയതിനെ തുടര്ന്നാണ് പുതിയ ബഞ്ച് കേസ് പരിഗണിച്ചത്. കൊലപാതകവുമായി ബന്ധമില്ലെന്നും കൊലക്കേസില് പിടിയിലായവരുമായി ഫോണില് ബന്ധപ്പെട്ടതിന് താന് ഗൂഢാലോചന നടത്തിയെന്ന വാദം നിലനില്ക്കില്ലെന്ന ഉദയഭാനുവിന്റെ വാദം കോടതി നിരാകരിച്ചു.
കീഴടങ്ങാന് സമയം വേണമെന്ന ഉദയഭാനുവിന്റെ ആവശ്യത്തോട് കോടതി പ്രതികരിച്ചില്ല. ഉദയഭാനുവിന് കൊലപാതക ഗൂഢാലോചനയില് നേരിട്ട് പങ്കുണ്ടെന്ന് പ്രോസിക്യൂഷന് വ്യക്തമാക്കി. മുന്കൂര് ജാമ്യാപേക്ഷയിലെ ഇടക്കാല വിധി കേസന്വേഷണം നിലയ്ക്കാന് കാരണമായെന്ന് കാണിച്ച് രാജീവിന്റെ അമ്മ സുപ്രീം കോടതി ചീഫ് ജസ്റ്റിസിന് പരാതി നല്കിയിരുന്നു. ഈ സാഹചര്യത്തിലാണ് ഹൈക്കോടതി മുന്കൂര് ജാമ്യം നിഷേധിക്കുകയും അഭിഭാഷകന്റെ അറസ്റ്റിന് വഴിയൊരുക്കുകയും ചെയ്തത്.
പരിയാരം തവളപ്പാറയില് കോണ്വന്റിന്റെ ഉടമസ്ഥതയിലുള്ള ഒഴിഞ്ഞ കെട്ടിടത്തില് സെപ്റ്റംബര് 29ന് രാവിലെയാണു റിയല് എസ്റ്റേറ്റ് ഇടപാടുകാരനായ രാജീവിന്റെ മൃതദേഹം കണ്ടെത്തിയത്. രണ്ടാഴ്ചത്തെ ആസൂത്രണത്തിനുശേഷം രാജീവിനെ നാലംഗ ക്വട്ടേഷന് സംഘം തട്ടിക്കൊണ്ടുപോയി ആളൊഴിഞ്ഞ കെട്ടിടത്തില് വച്ച് വസ്തു ഇടപാടു രേഖകളില് ബലമായി ഒപ്പുവയ്പിക്കാന് ശ്രമിക്കുന്നതിനിടെ കൊലപ്പെടുത്തുകയായിരുന്നു എന്നാണു പൊലീസ് കേസ്.
https://www.facebook.com/Malayalivartha
