സിനിമ സീരിയല്‍ ലൊക്കേഷനുകളില്‍ വില്പനയ്ക്കായി എത്തിച്ച ഏഴുകിലോ കഞ്ചാവുമായി വയനാട് കല്‍പ്പറ്റ സ്വദേശികളായ ഇജാസ് (29), നൗഷീര്‍ (26), ചേര്‍ത്തല അരീപ്പറപ്പ് സ്വദേശി അനസ് (25) എന്നിവരെ ഷാഡോ പൊലീസ് പിടികൂടി. ഒഡീഷയില്‍ നിന്ന് കേരളത്തിലേക്ക് കഞ്ചാവ് എത്തിക്കുന്ന സംഘത്തിലെ പ്രധാനികളാണ് ഇവരെന്ന് പൊലീസ് അറിയിച്ചു.

പൊലീസ് സാന്നിദ്ധ്യം കുറവായ ആന്ധ്ര ഒഡീഷ അതിര്‍ത്തി ജില്ലയായ റായഗഡയിലെ മട്ടികോണ, ലക്ഷ്മിപൂര്‍, കണ്ടേശു തുടങ്ങി വനപ്രദേശ ഗ്രാമങ്ങളില്‍ മാവോയിസ്റ്റ് പിന്തുണയോടെ കൃഷി ചെയ്യുന്ന കഞ്ചാവ് ഇടനിലക്കാരില്ലാതെ ഇവര്‍ നേരിട്ടാണ് ശേഖരിച്ചിരുന്നത്. റായഗഡയില്‍ നിന്ന് ബസ് മാര്‍ഗം കഞ്ചാവ് വിശാഖപട്ടണത്ത് എത്തിക്കും. പൊലീസ് പരിശോധന ഒഴിവാക്കാന്‍ കാര്‍ കയറ്റുന്ന ട്രെയിലറിലാണ് പിന്നീട് കേരളത്തിലേക്ക് കടത്ത്. ഇത്തരത്തില്‍ മൂന്ന് മാസത്തിനുള്ളില്‍ ഏഴുതവണ കഞ്ചാവ് കടത്തി. കിലോഗ്രാമിന് നാലായിരം രൂപയ്ക്ക് ലഭിക്കുന്ന ശീലാവതി ഇനത്തില്‍പ്പെട്ട കഞ്ചാവ് ഇടുക്കി ഗോള്‍ഡെന്ന പേരില്‍ 20,000 രൂപയ്ക്കാണ് വിറ്റിരുന്നത്. ഇടനിലക്കാര്‍ വഴിയായിരുന്നു ഷൂട്ടിംഗ് ലൊക്കേഷനുകളില്‍ വില്‍പ്പന. അനസ് എറണാകുളം നോര്‍ത്ത് റെയില്‍വേ സ്‌റ്റേഷന് സമീപം നടത്തുന്ന കാറ്റിറിംഗ് സ്ഥാപനത്തിന്റെ മറവിലാണ് കഞ്ചാവ് സുഗമമായി ലൊക്കേഷനുകളില്‍ എത്തിച്ചിരുന്നത്. ഇവര്‍ക്ക് കഞ്ചാവ് നല്‍കുന്ന റായഗഡയിലെ ഒരു സ്ത്രീ, ലൊക്കേഷനുകളിലെ ഇടനിലക്കാര്‍ എന്നിവരെക്കുറിച്ച് വിശദമായി അന്വേഷണം നടത്തുമെന്ന് പൊലീസ് അറിയിച്ചു.

പൊലീസിനെ ഭയന്ന് ഇടുക്കിയില്‍ നിന്ന് ഒഡീഷയിലെത്തി കഞ്ചാവ് കൃഷി ചെയ്യുന്നവര്‍ക്ക് സായുധ മാവോയിസ്റ്റുകളുട സഹായമുണ്ട്. ഭൂമി പാട്ടത്തിനെടുത്താണ് കൃഷി. കേരളത്തില്‍ നിന്ന് മൂന്നു സ്ത്രീകള്‍ മൊത്തമായി കഞ്ചാവ് വാങ്ങാറുണ്ടെന്ന് പിടിയിലായവര്‍ മൊഴി നല്‍കി. ഷാഡോ എസ്.ഐ. ഹണി. കെ. ദാസിന്റെ നേതൃത്വത്തിലുള്ള സംഘമാണ് പ്രതികളെ പിടികൂടിയത്.