കെഎസ് ആര്‍ടിസിയില്‍ പതിവായി ശമ്പളം എല്ലാ മാസത്തിന്റേയും അവസാന ദിവസം കൊടുക്കുകയാണ് പതിവായിരുന്നത്. പക്ഷെ വര്‍ഷങ്ങളായി ശമ്പളം കൃത്യമായി ജീവനക്കാര്‍ക്ക് കിട്ടാറില്ല. മിക്കവാറും 15 ദിവസത്തോളമെല്ലാം വൈകാറുണ്ടായിരുന്നു. പക്ഷെ ഈ മാസം ജീവനക്കാരെയെല്ലാം ഞെട്ടിച്ച് കെ.എസ്.ആര്‍.ടി.സിയില്‍ കൃത്യദിനത്തില്‍ ശമ്പളം ലഭ്യമായി. വേതനം മുടങ്ങുന്നത് പുതുമയല്ലാതായ കോര്‍പറേഷനില്‍ വര്‍ഷങ്ങള്‍ക്കുശേഷമാണ് കാത്തിരിപ്പില്ലാതെ ജീവനക്കാര്‍ക്ക് ശമ്പളം ലഭിക്കുന്നത്.

ഒക്‌ടോബറിലെ വേതനം 31ന് രാവിലെ ജീവനക്കാരുടെ അക്കൗണ്ടിലെത്തി. മാസാവസാനത്തെ പ്രവൃത്തിദിനമായിരുന്നു ശമ്പള തീയതി. എന്നാല്‍, സാമ്പത്തിക പ്രതിസന്ധി രൂക്ഷമായതോടെ ഇത് താളംതെറ്റി. മൂന്നുവര്‍ഷത്തിലധികമായി ശമ്പളം വൈകുന്നത് പതിവായിരുന്നു. പുതിയ എം.ഡി ചാര്‍ജെടുത്ത ആദ്യ മാസം ശമ്പളം വൈകുന്നത് ഒഴിവാക്കാന്‍ എടുത്ത മുന്‍കരുതലാണ് വിതരണം സുഗമമാക്കിയതെന്നാണ് വിവരം. ഒക്‌ടോബറില്‍ പെന്‍ഷന്‍ കുടിശ്ശിക നല്‍കാന്‍ സര്‍ക്കാര്‍ അനുവദിച്ച 120 കോടിയില്‍നിന്നൊരുവിഹിതവും ഇതിനായി ഉപയോഗിച്ചതായാണ് സൂചന. സെപ്റ്റംബറില്‍ ഒരാഴ്ച വൈകിയായിരുന്നു വേതനം ലഭിച്ചത്. മുന്‍മാസങ്ങളില്‍ ഇതിലും ഏറെ വൈകിയിരുന്നു. ജൂണില്‍ 15 ദിവസമാണ് ശമ്പളം വെകിയത്.

പ്രതിഷേധം കനക്കുന്നതോടെ സഹകരണ ബാങ്കുകളില്‍നിന്നടക്കം വായ്പ എടുത്തായിരുന്നു ശമ്പളം വിതരണം. ചില ഘട്ടങ്ങളില്‍ സര്‍ക്കാറും തുക അനുവദിച്ചിരുന്നു. കഴിഞ്ഞ യു.ഡി.എഫ് സര്‍ക്കാറിന്റെ കാലത്ത് ഇടക്കിടെ ശമ്പളം വൈകല്‍ പതിവായിരുന്നു. എല്‍.ഡി.എഫ് അധികാരത്തിലെത്തിയതോടെ കാര്യങ്ങള്‍ക്ക് മാറ്റം വരുമെന്ന് പ്രഖ്യാപനമുണ്ടായെങ്കിലും കൂടുതല്‍ വൈകുന്ന സ്ഥിതിയായിരുന്നു.

കെ.എസ്.ആര്‍.ടി.സി പരിഷ്‌കരണ നടപടിയുമായി മുന്നോട്ടുപോയ എം.ഡി എം.ജി. രാജമാണിക്യത്തെ മാറ്റിയതോടെ ശമ്പളവിതരണം കൂടുതല്‍ താറുമാറാകുമെന്ന് കരുതിയിരിക്കെയാണ് അപ്രതീക്ഷിതമായി കേരളപ്പിറവി തലേന്ന് ശമ്പളം വിതരണം നടന്നത്. രാജമാണിക്യം നടപ്പാക്കിയ പരിഷ്‌കാരങ്ങളിലൂടെ പ്രതിദിന വരുമാനത്തില്‍ വര്‍ധനയുണ്ടായിരുന്നു. ഇതും ഗുണകരമായി.

അടുത്തിടെയാണ് രാജമാണിക്യത്തെ മാറ്റി എ. ഹേമചന്ദ്രനെ എം.ഡിയായി നിയമിച്ചത്. അതിനിടെ, സാമ്പത്തിക പ്രതിസന്ധി മറികടക്കാന്‍ ബാങ്ക് കണ്‍സോര്‍ട്യത്തില്‍നിന്ന് 3200കോടി ദീര്‍ഘകാല വായ്പ എടുക്കാനുള്ള നടപടിയും പുരോഗമിക്കുകയാണ്. ഇതിലൂടെ പലിശയിനത്തില്‍ പ്രതിമാസം 68 കോടി ലാഭിക്കാനാകും. 70 കോടിയാണ് ശമ്പളത്തിനായി വേണ്ടിവരുന്നത്. നവംബറില്‍ ഈ തുക ലഭിച്ചാല്‍ ഡിസംബര്‍ മുതല്‍ മാസാവസാനം തന്നെ ശമ്പളം നല്‍കാന്‍ കഴിയുന്ന സ്ഥിതിയുണ്ടാകുമെന്ന് അധികൃതര്‍ പറയുന്നു. അതേസമയം, പെന്‍ഷന്‍ വിതരണം മുടങ്ങിയിരിക്കുകയാണ്.