ഗതാഗതമന്ത്രി തോമസ് ചാണ്ടിയെ സി.പി.ഐ സംസ്ഥാന നേതൃത്വത്തിന് പിന്നാലെ ദേശീയ നേതൃത്വവും വളഞ്ഞിട്ടാക്രമിക്കുന്നു. തോമസ് ചാണ്ടി അധികാര ദുര്‍വിനിയോഗം നടത്തിയെന്നും അഴിമതിക്കാര്‍ക്ക് ഇടത് മുന്നണിയില്‍ സ്ഥാനമില്ലെന്നും ദേശീയ ജനറല്‍ സെക്രട്ടറി സുധാകര്‍ റെഡ്ഡി വ്യക്തമാക്കി. സംസ്ഥാന സര്‍ക്കാര്‍ ഉചിതമായ തീരുമാനം എടുക്കണമെന്നും റവന്യൂമന്ത്രിയുടെ നിര്‍ദ്ദേശം പാലിക്കാന്‍ എ.ജി ബാധ്യസ്ഥനാണെന്നും അദ്ദേഹം ആവശ്യപ്പെട്ടു. ഇതോടെ റവന്യൂമന്ത്രിയും എ.ജിയും തമ്മിലുള്ള അഭിപ്രായഭിന്നത സി.പി.എമ്മിലേക്കും സി.പി.ഐയിലേക്കും നീണ്ടിരിക്കുകയാണ്. 

അതേസമയം തോമസ് ചാണ്ടി വീണ്ടും നിലം നികത്തിയാല്‍ കേസ് എടുക്കേണ്ടി വരുമെന്ന് സംസ്ഥാന സെക്രട്ടറി കാനം രാജേന്ദ്രന്‍ അറിയിച്ചു. ഓരോരുത്തരും തെറ്റ് ചെയ്തവര്‍ ആരായാലും ശിക്ഷിക്കപ്പെടണം. ഓരോരുത്തരും അവരവരുടെ നിലപാടിനനുസരിച്ചാണ് പ്രതികരിക്കുന്നതെന്നും തോമസ് ചാണ്ടിയുടെ കുട്ടനാട്ടിലെ പ്രസംഗത്തെ കുറിച്ച് കാനം മറുപടി നല്‍കി. കാനം നേതൃത്വം നല്‍കുന്ന തെക്കന്‍മേഖല ജനജാഗ്രത യാത്ര വേദിയിലാണ് തോമസ് ചാണ്ടി വെല്ലുവിളി നടത്തിയത്. ഇത് യാത്രയുടെ ലക്ഷ്യത്തെ തന്നെ തകിടംമറിക്കുന്നതാണെന്നാണ് സി.പി.ഐയുടെ വിലയിരുത്തല്‍. 

വിഷയം ചര്‍ച്ച ചെയ്യാന്‍ സി.പി.ഐ- സി.പി.എം ഉഭയകക്ഷി ചര്‍ച്ചയും എല്‍.ഡി.എഫും വിളിച്ചിട്ടുണ്ട്. എന്നാല്‍ അതിനിടെ സി.പി.ഐ ദേശീയ, സംസ്ഥാന നേതൃത്വങ്ങള്‍ പരസ്യപ്രതികരണവുമായി രംഗത്ത് എത്തിയത് പ്രശ്‌നത്തിന്റെ രൂക്ഷത വെളിപ്പെടുത്തുന്നു. കയ്യേറ്റക്കാര്‍ക്കും അഴിമതിക്കാര്‍ക്കും യാതൊരുവിധ പിന്തുണയും നല്‍കേണ്ടെന്ന ഉറച്ചനിലപാടിലാണ് സി.പി.ഐ. റവന്യൂ മന്ത്രിയെ അപമാനിക്കുന്ന തരത്തില്‍ എ.ജിയും സംസ്ഥാന സെക്രട്ടറി കാനംരാജേന്ദ്രനെ വെല്ലുവിളിച്ച് തോമസ് ചാണ്ടിയും സംസാരിച്ചത് സി.പി.ഐ നേതൃത്വത്തെ വല്ലാതെ ചൊടിപ്പിച്ചിട്ടുണ്ട്. ഇത്തരം സംഭവങ്ങള്‍ ആവര്‍ത്തിക്കാതിരിക്കുകയാണ് വേണ്ടതെന്ന് അവര്‍ എല്‍.ഡി.എഫില്‍ ആവശ്യപ്പെടും.