കായല്‍ കയ്യേറി നികത്തിയ മന്ത്രി തോമസ് ചാണ്ടിക്കെതിരായ നിലപാട് പ്രതിപക്ഷം ശക്തമാക്കുന്നു. യൂത്ത് കോണ്‍ഗ്രസ് സംസ്ഥാന നേതാക്കള്‍ വ്യാഴാഴ്ച മന്ത്രിയുടെ ഔദ്യോഗിക വസതിക്ക് മുന്നില്‍ കരിങ്കൊടി കെട്ടി. വനിതാ പ്രവര്‍ത്തകര്‍ ഉള്‍പ്പെടെയാണ് ഉച്ചയോടെ പ്രതിഷേധവുമായി രംഗത്തെത്തിയത്. മുദ്രാവാക്യംവിളികളുമായി ഗേറ്റിന് മുന്നില്‍ തമ്പടിച്ച ഇവരെ പൊലീസ് അറസ്റ്റ് ചെയ്തു നീക്കി. ഇതുവരെ മന്ത്രി കായല്‍ നികത്തിയ ആലപ്പുഴയില്‍ നടത്തിവന്ന സമരം തലസ്ഥാനത്തേക്കും വ്യാപിച്ചിരിക്കുകയാണ്. പ്രതിപക്ഷനേതാവ് രമേശ് ചെന്നിത്തലയുടെ നേതൃത്വത്തില്‍ കാസര്‍കോട് നിന്ന് ജാഥ നടത്തുകയാണ്. ഇതിന്റെ കൂടി പശ്ചാത്തലത്തിലാണ് പ്രതിഷേധം തലസ്ഥാനത്തേക്ക് നീട്ടിയത്.

വരുംദിവസങ്ങളില്‍ വിവിധ പ്രതിപക്ഷ സംഘടനകളുടെ നേതൃത്വത്തില്‍ സംസ്ഥാനത്തുടനീളം വ്യാപക പ്രതിഷേധങ്ങളും സമരപരിപാടികളും സംഘടിപ്പിക്കുമെന്നറിയുന്നു. രാഷ്ട്രീയ കേരളത്തിന്റെ ശ്രദ്ധമുഴുവന്‍ ജാഥയ്ക്കും യു.ഡി.എഫിനും കിട്ടികയാണ് ലക്ഷ്യം. ഇതിലൂടെ മുതിര്‍ന്ന നേതാവ് ഉമ്മന്‍ചാണ്ടി അടക്കമുള്ളവര്‍ക്ക് എതിരെ സര്‍ക്കാര്‍ പ്രഖ്യാപിച്ചിരിക്കുന്ന ബലാല്‍സംഗ, വിജിലന്‍സ് കേസുകളുടെ മുനയൊടിക്കാനാവുമെന്ന് യു.ഡി.എഫ് കരുതുന്നു. മാത്രമല്ല സ്വര്‍ണക്കടത്ത് കേസിലെ പ്രതികളായ കാരാട്ട് ഫൈസലും അബുലെയ്‌സും പാണക്കാട് തങ്ങളും മറ്റ് യു.ഡി.എഫ് നേതാക്കളും തമ്മില്‍ ബന്ധമുണ്ടെന്ന ഫോട്ടോകള്‍ പുറത്ത് വന്നിട്ടുണ്ട്. ഇതില്‍ നിന്നൊക്കെ ജനശ്രദ്ധതിരിയണമെങ്കില്‍ തോമസ് ചാണ്ടിയുടെ രാജി അനിവാര്യമാണ്. 

മന്ത്രിയുടെ രാജിക്കായി പ്രതിഷേധം നടത്തുന്നവരെ പൊലീസ് മര്‍ദ്ദിച്ചാല്‍ അത് രാഷ്ട്രീയ ആയുധമാക്കാനും അതുവഴി ചെന്നിത്തലയുടെ ജാഥ ലൈവാക്കി നിര്‍ത്താനും കഴിയും. കുമ്മനം യാത്ര നടത്തിയപ്പോള്‍ നടന്‍ ദിലീപിന്റെ ജാമ്യം ഉള്‍പ്പെടെ നിരവധി സംഭവങ്ങളുണ്ടായി എല്ലാം മുങ്ങിപ്പോയി ആ സ്ഥിതി ഉണ്ടാകരുതെന്നും കോടിയേരിയുടെ യാത്രയിലുണ്ടായ പോലെ വിവാദങ്ങള്‍ സൃഷ്ടിക്കരുതെന്നും ചെന്നിത്തല യു.ഡി.എഫ് നേതാക്കള്‍ക്ക് കര്‍ശന നിര്‍ദ്ദേശം നല്‍കിയിട്ടുണ്ട്. അതിനാല്‍ വരുംദിവസങ്ങളില്‍ കേരള രാഷ്ട്രീയം ചൂട്പിടിക്കുമെന്നുറപ്പാണ്.