കോഴിക്കോട് ഗെയില്‍ സമരത്തെ കുറിച്ച് ചാനല്‍ ചര്‍ച്ചയില്‍ ചോദ്യം ചോദിച്ച മാധ്യമപ്രവര്‍ത്തകനെ സി.പി.എം തിരുവമ്പാടി എം.എല്‍.എ ജോര്‍ജ്് എം. തോമസ് ഭീഷണിപ്പെടുത്തി. എന്നാല്‍ അതേ നാണയത്തില്‍ മാധ്യമപ്രവര്‍ത്തകന്‍ മറുപടി പറഞ്ഞതോടെ എം.എല്‍.എ നിലപാട് തണുപ്പിച്ചു. ഗെയില്‍ സമരത്തില്‍ പാര്‍ട്ടി അംഗങ്ങളാരും പങ്കെടുക്കുന്നില്ലെന്നാണ് എം.എല്‍.എ ചര്‍ച്ചയില്‍ പറഞ്ഞത്. പാര്‍ട്ടി പറയുന്ന കാര്യങ്ങള്‍ അവര്‍ക്ക് ബോധ്യമായതിന്റെ അടിസ്ഥാനത്തിലാണോ, അതോ അച്ചടക്ക ലംഘനമാകുമെന്ന് കരുതിയാണോ പ്രവര്‍ത്തകര്‍ സമരത്തില്‍ പങ്കെടുക്കാത്തതെന്ന് ചോദിച്ചപ്പോഴാണ് എം.എല്‍.എ തന്റെ ധാര്‍ഷ്ട്യം പുറത്തെടുത്തത്. 

'അപ്പം തിന്നാ മതി കുഴിയെണ്ണണ്ട' എന്ന് പറഞ്ഞാണ് ജോര്‍ജ് എം.തോമസ് ചൂടായത്. എന്നാല്‍ അങ്ങനെയോന്നും പറഞ്ഞ് വിരട്ടണ്ടെന്ന് മാധ്യമ പ്രവര്‍ത്തകന്‍ ചൂണ്ടിക്കാട്ടി. ഈ നാട്ടില്‍ സി.പി.എം പ്രവര്‍ത്തന ഫണ്ട് വിജയിപ്പിക്കണമെന്ന് കാട്ടി പോസ്റ്റര്‍ ഒട്ടിക്കുകയും ജനങ്ങളില്‍ നിന്ന് പണം പിരിക്കുകയും അത് ഉപയോഗിച്ച് പ്രവര്‍ത്തിക്കുകയും ചെയ്യുന്ന സംഘടനയല്ലേ നിങ്ങളുടേത്. ജനങ്ങളുടെ കയ്യില്‍ നിന്ന് പണം പിരിച്ച് നടത്തുന്ന സംഘടന നിങ്ങളുടെ ഇഷ്ടത്തിനനുസരിച്ച് പ്രവര്‍ത്തിക്കാനുള്ളതല്ലെന്നും മാധ്യമപ്രവര്‍ത്തകന്‍ ചൂണ്ടിക്കാട്ടി. ഇതോടെ എം.എല്‍.എ കൂടുതല്‍ ദാര്‍ഷ്ട്യത്തോടെ സംസാരിക്കാന്‍ തുടങ്ങി.

'ആര് പറഞ്ഞു ഞങ്ങളുടെ ഇഷ്ടാനുസരണം പ്രവര്‍ത്തിക്കാനാവില്ലെന്ന്' എം.എല്‍.എ ദേഷ്യപ്പെട്ടു. ഈ നാട്ടിലെ ജനങ്ങളുടെ പണം ഉപയോഗിച്ച് പ്രവര്‍ത്തനഫണ്ട് സ്വരൂപിച്ചിട്ട്. നിങ്ങളുടെ ഇഷ്ടത്തിന് പ്രവര്‍ത്തിക്കാനാവില്ലെന്നും അതിന് വേറെ സംഘടന ഉണ്ടാക്കണമെന്നും ലേഖകന്‍ ചൂണ്ടിക്കാട്ടി. ജനങ്ങളുടെ കയ്യില്‍ നിന്ന് പണം വാങ്ങി പ്രവര്‍ത്തിക്കുന്ന സംഘടനക്ക് അവരുടെ ചോദ്യങ്ങള്‍ക്ക് മറുപടി പറയാനുള്ള ബാധ്യതയുണ്ട്. അത് പറഞ്ഞേ തീരൂ. അല്ലാതെ അപ്പം തിന്നാ മതി കുഴിയെണ്ണണ്ട എന്ന തീരിയിലുള്ള വിരട്ടൊന്നും വേണ്ട. അതൊക്കെ അങ്ങ് എ.കെ.ജി സെന്ററില്‍ മതിയെന്നും ലേഖകന്‍ ചൂണ്ടിക്കാട്ടി. മീഡിയാ വണ്‍ ചാനലിലെ റിപ്പോര്‍ട്ടറോടാണ് എം.എല്‍.എ തട്ടിക്കയറിയത്.