ഇന്ത്യയും ന്യൂസിലന്‍ഡും തമ്മിലുള്ള അന്താരാഷ്ട്ര ട്വന്റി20 മത്സരം നടക്കണേയെന്ന പ്രാര്‍ത്ഥനയോടെയാണ് മലയാളികള്‍. മത്സരം നടക്കാതിരുന്നാല്‍ മലയാളികളുടെ ദീര്‍ഘനാളത്തെ പ്രതീക്ഷകളാണ് ഒലിച്ച് പോകുന്നത്. ഒപ്പം കളികാണാന്‍ ചെലവഴിച്ച പണവും. പിച്ച് അത്രുഗ്രനാണെങ്കിലും ഔട്ട് ഫീല്‍ഡില്‍ പ്രശ്‌നങ്ങള്‍ ഏറെയുണ്ട്. ഇന്ന് മഴ ഇനി പെയ്യാതിരിക്കുക. ഇതിനൊപ്പം നല്ല വെയിലും. ഇതു മാത്രമേ തിരുവനന്തപുരത്ത് കളി യാഥാര്‍ത്ഥ്യമാക്കൂ. കാലാവസ്ഥാ പ്രവചനം അനുസരിച്ച് ഇന്നും കനത്ത മഴയ്ക്കാണ് സാധ്യത.

അങ്ങനെ വന്നാല്‍ കോലിപ്പടയുടെ കളി നേരില്‍ കാണാനുള്ള അനന്തപുരിക്കാരുടെ മോഹം പൊലിയും. കാര്യവട്ടം സ്‌പോര്‍ട്‌സ് ഹബില്‍ രാത്രി ഏഴ് മുതലാണ് ഇരു രാജ്യങ്ങളും തമ്മിലുള്ള മൂന്ന് മത്സര പരമ്പരയിലെ അവസാന ട്വന്റി20. പരമ്പരയിലെ ആദ്യ മത്സരത്തില്‍ ഇന്ത്യയും രണ്ടാം മത്സരത്തില്‍ ന്യൂസിലന്‍ഡും ജയിച്ചതോടെ കാര്യവട്ടത്തെ മത്സരത്തിന് ഫൈനലിന്റെ പരിവേഷമാണ്. അതുകൊണ്ട് തന്നെ മഴയെത്തിയാല്‍ പരമ്പര സമനിലയിലുമാകും.

മഴ പെയ്താല്‍ മിനിട്ടുകള്‍ക്കുള്ളില്‍ പിച്ച് കവര്‍ ചെയ്യാനുള്ള സൗകര്യമുണ്ട്. മഴവെള്ളം കെട്ടിനില്‍ക്കാത്ത ശാസ്ത്രീയമായ ഡ്രെയിനേജ് സൗകര്യവും നിര്‍മ്മാണവുമാണ് സ്‌റ്റേഡിയത്തിന്റേത്. ഔട്ട് ഫീല്‍ഡിലെ നനവ് മാറ്റാനായി അത്യാധുനികമായ മൂന്ന് സൂപ്പര്‍ സോഫറുകളാണ് സജ്ജീകരിച്ചിരിക്കുന്നത്. കളിക്കിടയില്‍ മഴപെയ്യുകയാണെങ്കില്‍ തോര്‍ന്നശേഷം ഔട്ട്ഫീല്‍ഡ് ഉണക്കിയെടുക്കാന്‍ 15 മിനിട്ടിനകം കഴിയും. ഇതൊക്കെയാണ് കാര്യങ്ങളെങ്കിലും ഗ്രൗണ്ടിലെ ഈര്‍പ്പം വലിയ വെല്ലുവിളിയാണ്. അതുകൊണ്ട് തന്നെ മത്സരം നടക്കുമോ എന്ന് ആര്‍ക്കും ഉറപ്പ് പറയാനാകില്ല. എല്ലാം മാച്ച് റഫറിയാകും തീരുമാനിക്കുക.

മത്സരസമയത്തിന് ഒരു മണിക്കൂര്‍ മുമ്പെങ്കിലും മഴ തോര്‍ന്നുനിന്നാല്‍ കളിനടത്താന്‍ കഴിയുമെന്നുള്ള പ്രതീക്ഷയിലാണ് സംഘാടകരായ കേരള ക്രിക്കറ്റ് അസോസിയേഷന്‍. 29 വര്‍ഷത്തിനുശേഷം തലസ്ഥാന നഗരത്തിലെത്തുന്ന അന്താരാഷ്ട്ര മത്സരത്തെ ആവേശപൂര്‍വമാണ് ആരാധകര്‍ വരവേറ്റിരിക്കുന്നത്. 42000 ഓളം പേര്‍ക്ക് ഇരിക്കാവുന്ന സ്‌റ്റേഡിയത്തിലെ ടിക്കറ്റുകള്‍ എല്ലാം ദിവസങ്ങള്‍ക്ക് മുന്നേ വിറ്റഴിഞ്ഞിരുന്നു. 

മത്സരം ഒരു പന്തുപോലും എറിയാതെ ഉപേക്ഷിക്കുകയാണെങ്കില്‍ ടിക്കറ്റിന്റെ തുക ബി.സി.സി.ഐ തിരിച്ചു നല്‍കും. പക്ഷെ കളി കാണാന്‍ വേണ്ടി ചെലവഴിച്ച ആയിരക്കണക്കിന് രൂപയ്ക്ക് ആര് സമാധാനം പറയും. 

കനത്ത സുരക്ഷയിലാണ് മത്സരം നടക്കുക. എങ്ങും അതീവ സുരക്ഷയാണ്. ടിക്കറ്റോ പാസോ ഇല്ലാതെ ആരെയും സ്‌റ്റേഡിയത്തിലേക്ക് കടത്തിവിടില്ല. പഌാര്‍ഡുകള്‍, കൊടി തോരണങ്ങള്‍, വടി തുടങ്ങിയവയൊന്നും കൊണ്ടുവരാനാവില്ല. മൊബൈല്‍ ഫോണ്‍ കൈയില്‍ കരുതാം. കനത്ത സുരക്ഷാപരിശോധനയ്ക്ക് ശേഷമേ സ്‌റ്റേഡിയത്തിലേക്ക് കയറാനാവൂ. വൈകിട്ട് നാല് മുതല്‍ സ്‌റ്റേഡിയത്തിലേക്ക് കടത്തിവിടും.

ഇന്ത്യ ടെസ്റ്റിലെ ഒന്നാം റാങ്കുകാരാണെങ്കില്‍ ന്യൂസിലന്‍ഡ് ട്വന്റി 20യിലെ ഒന്നാംസ്ഥാനക്കാരായിരുന്നു. ഡല്‍ഹിയില്‍ ഇന്ത്യയുമായുള്ള ആദ്യ ട്വന്റി 20 ക്കുശേഷം അവരുടെ ഒന്നാം റാങ്ക് നഷ്ടമാവുകയും ചെയ്തു. എന്നാല്‍ രാജ്‌കോട്ടിലെ വിജയത്തോടെ റാങ്ക് തിരിച്ചുപിടിക്കാനുള്ള സാധ്യത തെളിയിക്കുകയും ചെയ്തു. കാര്യവട്ടത്ത് കിവികളാണ് ജയിക്കുന്നതെങ്കില്‍ അവര്‍ക്ക് വീണ്ടും ഒന്നാം റാങ്കിന്റെ തിളക്കവുമുണ്ടാകും. ഇന്ത്യ ഐ.സി.സി ട്വന്റി 20 റാങ്കിംഗില്‍ മൂന്നാംസ്ഥാനത്താണ്. ഏകദിനത്തില്‍ രണ്ടാമതും. അങ്ങനെ കരുത്തരുടെ മത്സരമാണ് നടക്കാന്‍ പോകുന്നത്. പക്ഷേ മഴയാണ് തടസ്സം.

ഇന്ത്യന്‍ ടീമിലെ മലയാളി സാന്നിദ്ധ്യം ശ്രേയസ് അയ്യര്‍ ഡല്‍ഹിയില്‍ നടന്ന ആദ്യ ട്വന്റി 20യില്‍ത്തന്നെ ടീമിലുണ്ടായിരുന്നുവെങ്കിലും കളിക്കാന്‍ കഴിഞ്ഞിരുന്നില്ല. ഫസ്റ്റ് ഡൗണ്‍ പൊസിഷനിലാണ് രാജ്‌കോട്ടില്‍ കൊഹ്‌ലി ശ്രേയത്തിനെ അരങ്ങേറ്റത്തിനയച്ചത്. രണ്ടാം ഓവറില്‍ത്തന്നെ ക്രീസിലെത്തിയിട്ടും ശ്രേയസിന് അരങ്ങേറ്റം അത്യുജ്വലമാക്കാന്‍ കഴിഞ്ഞില്ല. 21 പന്തില്‍ 23 റണ്‍സേ നേടാനായുള്ളൂ. തെറ്റായ ഷോട്ട് സെലക്ഷനാണ് ശ്രേയസിന് വിനയായത്. ആദ്യ മത്സരത്തിന്റെ സമ്മര്‍ദ്ദം മാറ്റിവച്ച് ശ്രേയസിന് കൂടുതല്‍ ഉത്തരവാദിത്വത്തോടെ കളിക്കേണ്ടിവരും. മലയാളികള്‍ ശ്രേയസിന്റെ മികച്ച പ്രകടനത്തിനായാണ് കാത്തിരിക്കുന്നത്.

ആദ്യമായി ഒരു അന്താരാഷ്ട്ര മത്സരത്തിന് ഒരുങ്ങുന്ന പിച്ചാണ് കാര്യവട്ടത്തേത്. ബാറ്റിംഗിനെ സഹായിക്കുമെന്നാണ് വിലയിരുത്തല്‍. രണ്ടാം ഇന്നിങ്‌സില്‍ സ്പിന്നമാര്‍ക്ക് സഹായകമാകാനും സാദ്ധ്യതയുണ്ട്. നിര്‍ണായക ഘടകമാണ് ടോസ്. സ്പിന്നര്‍മാരെ വിശ്വാസമുണ്ടെങ്കില്‍ ടോസ് കിട്ടുന്ന ടീം ആദ്യ ബാറ്റിങ് തിരഞ്ഞെടുക്കാന്‍ സാദ്ധ്യത.