സോളാറി'ല്‍ സഭ പ്രക്ഷുബ്ധമാകുമോ? ആയാലും ഇല്ലെങ്കിലും ആകാംഷയ്ക്ക് നാളെ വിരാമമാകും. വ്യാഴാഴ്ചയാണ് പ്രത്യേക നിയമസഭാ സമ്മേളനം. എന്തായാലും പ്രതിപക്ഷത്തിന് സൂര്യാഘാതമേല്‍ക്കാതിരിക്കാന്‍ കനത്ത പ്രതിരോധം വേണ്ടിവരും. തോമസ് ചാണ്ടി വിഷയത്തെ മിന്നല്‍ രക്ഷാചാലക'മായി ഉപയോഗിക്കാനാണ് പ്രതിപക്ഷ തീരുമാനം. സോളാര്‍ കമ്മിഷന്‍ റിപ്പോര്‍ട്ട് സമര്‍പ്പണത്തിന് മാത്രമായി ചേരുന്ന സമ്മേളനം അതിനാല്‍ പ്രക്ഷുബ്ധമാകാം.

രാവിലെ 9ന് ആരംഭിക്കുന്ന സഭാ സമ്മേളനം 15 മിനിട്ട് കൊണ്ട് നടപടിക്രമങ്ങള്‍ പൂര്‍ത്തിയാക്കി പിരിയും. സമ്മേളനത്തിന്റെ തത്സമയ സംപ്രേഷണത്തിന് ദൃശ്യമാദ്ധ്യമങ്ങള്‍ക്ക് അനുമതിയുണ്ട്. ഇതാദ്യമായാണ് റിപ്പോര്‍ട്ട് സമര്‍പ്പണത്തിന് മാത്രമായി സഭാസമ്മേളനം വിളിച്ചുചേര്‍ക്കുന്നത്.

വേങ്ങരയിലെ നിയുക്ത എം.എല്‍.എ കെ.എന്‍.എ. ഖാദറിന്റെ സത്യപ്രതിജ്ഞാ ചടങ്ങാണ് ആദ്യം. അഞ്ച് മിനിട്ടില്‍ അത് പൂര്‍ത്തിയാകും. തുടര്‍ന്നാണ് റിപ്പോര്‍ട്ട് സമര്‍പ്പണം. അതിന് മുന്നോടിയായി മുഖ്യമന്ത്രി പിണറായി വിജയന്‍ പ്രസ്താവന നടത്തും. തുടര്‍ന്നാണ് സമര്‍പ്പണം. റിപ്പോര്‍ട്ടില്‍, മുഖ്യമന്ത്രി നേരത്തേ പുറത്തുവിട്ട കാര്യങ്ങളെക്കാളും വലിയ സംഭവങ്ങളുണ്ടെന്ന അണിയറവര്‍ത്തമാനം ഇരുപക്ഷത്തും നടക്കുന്നുണ്ട്. സോളാര്‍ കേസിലെ മുഖ്യപ്രതിയായ സരിത നായരുടെ മൊഴികള്‍ പ്രതിപക്ഷത്തെ പല ഉന്നതരെയും നാണം കെടുത്താന്‍ ഉതകുന്നതാണെന്നാണ് അഭ്യൂഹം.

സ്വാഭാവികമായും പ്രതിരോധത്തിലേക്ക് നീങ്ങേണ്ടി വരുന്ന സാഹചര്യത്തെ മറികടക്കാന്‍ പ്രതിപക്ഷത്തിന് കൈയിലുള്ള ഏറ്റവും മികച്ച ആയുധമാണ് തോമസ് ചാണ്ടിക്കെതിരായ കായല്‍കൈയേറ്റ ആരോപണം. ആലപ്പുഴ ജില്ലാ കളക്ടറുടെ റിപ്പോര്‍ട്ടിലെ വിവരങ്ങള്‍ കൂടി പുറത്തുവന്നതോടെ ആരോപണങ്ങള്‍ക്ക് മൂര്‍ച്ച കൂടിയിട്ടുണ്ട്. മന്ത്രിക്കെതിരെ ക്രിമിനല്‍കേസെടുക്കേണ്ട സാഹചര്യമുണ്ടായിട്ടും ഭരണനേതൃത്വം സംരക്ഷിച്ചുനിറുത്തുന്നുവെന്ന ആക്ഷേപമുയര്‍ത്തി തുടക്കത്തിലേ പ്രതിപക്ഷം ബഹളം കൂട്ടാനാണ് സാദ്ധ്യത. നാളത്തെ സമ്മേളനത്തില്‍ കൈക്കൊള്ളേണ്ട തന്ത്രം ഇന്ന് കോഴിക്കോട്ട് ചേരുന്ന യു.ഡി.എഫ് കക്ഷിനേതാക്കളുടെ യോഗത്തിലാണ് തീരുമാനിക്കുക. പ്രതിപക്ഷ നേതാവ് നയിക്കുന്ന പടയൊരുക്കം' ജാഥയ്ക്ക് നിയമസഭാസമ്മേളനം കണക്കിലെടുത്ത് നാളെ അവധി നല്‍കിയിട്ടുണ്ട്.