ഓഖി ദുരന്തത്തില് വേദനയനുഭവിക്കുന്ന കുടുംബാംഗങ്ങളെ ജീവിതത്തിലേക്ക് തിരികെ കൊണ്ടുവരാന് സമഗ്ര പദ്ധതി
ഓഖി ദുരന്തത്തില് വേദനയനുഭവിക്കുന്ന കുടുബാംഗങ്ങളെ ജീവിതത്തിലേക്ക് തിരികെ കൊണ്ടുവരാന് ആരോഗ്യ, സാമൂഹ്യനീതി വകുപ്പിന്റെ നേതൃത്വത്തില് സമഗ്ര പദ്ധതി ആവിഷ്ക്കരിച്ചതായി ആരോഗ്യ, സാമൂഹ്യനീതി വകുപ്പ് മന്ത്രി കെ.കെ. ശൈലജ ടീച്ചര്. ഉറ്റവരെ നഷ്ടപ്പെട്ടവര്, കാണാതായവര്, രക്ഷപ്പെട്ടുവന്നവര് എന്നിവരുടെ പ്രശ്നങ്ങള് സമഗ്രമായി വിലയിരുത്തി അവരെ മാനസികമായും സാമൂഹികമായും സാമ്പത്തികമായും സഹായിക്കുക എന്നതാണ് ലക്ഷ്യം. റവന്യൂ വകുപ്പ്, ഫിഷറീസ് വകുപ്പ്, വിദ്യാഭ്യാസ വകുപ്പ് എന്നിവയുടെ സഹകരണത്തോടെ ആരോഗ്യ സാമൂഹ്യ നീതി വകുപ്പാണ് പദ്ധതിയാവിഷ്ക്കരിക്കുന്നത്. പ്രത്യേക പരിശീലനം നേടിയ കൗണ്സിലര്മാരുടെ നേതൃത്വത്തിലുള്ള സംഘാംഗങ്ങള് ഇവരുടെ വീടുകളിലെത്തി പ്രശ്നങ്ങള് പഠിക്കുകയും ആവശ്യമായ സഹായങ്ങള് നല്കുകയും ചെയ്യുമെന്ന് മന്ത്രി വ്യക്തമാക്കി. പൂജപ്പുര ഇന്സ്റ്റിറ്റിയൂട്ട് ഓഫ് കോ-ഓപ്പറേറ്റീവ് മാനേജ്മെന്റില് ഈ കൗണ്സിലര്മാര്ക്കായി നടത്തിയ പ്രത്യേക പരിശീലന പരിപാടിയില് സംസാരിക്കുകയായിരുന്നു മന്ത്രി.
ശേഷിക്കുന്നവരെ സമാശ്വാസിപ്പിച്ച് ജീവിതത്തിലേക്ക് തിരികെക്കൊണ്ടുവന്ന് സംരക്ഷിക്കുക എന്നത് സമൂഹത്തിന്റെ ലക്ഷ്യമാണ്. എല്ലാവരും ഇതൊരു സാമൂഹിക ദൗത്യമായേറ്റെടുക്കണമെന്നും മന്ത്രി കെ.കെ. ശൈലജ ടീച്ചര് പറഞ്ഞു.
ആരോഗ്യ, സാമൂഹ്യ നീതി വകുപ്പിലെ കൗണ്സിലര്മാരാണ് വിവരങ്ങള് ശേഖരിച്ച് ആവശ്യമായ മാര്ഗനിര്ദേശങ്ങള് നല്കുന്നത്. വിദഗ്ധ പരിശീലനം ലഭിച്ച ഇവരോടൊപ്പം ജൂനിയര് ഹെല്ത്ത് ഇന്സ്പെക്ടര്മാര്, ജൂനിയര് പബ്ലിക് ഹെല്ത്ത് നഴ്സുമാര്, ആശാ പ്രവര്ത്തകര്, അംഗന്വാടി പ്രവര്ത്തകര്, പഞ്ചായത്ത് മെമ്പര്മാര് അല്ലെങ്കില് വാര്ഡ് കൗണ്സിലര്മാര് എന്നിവര് സംഘത്തിലുണ്ടാകും. കുടുംബാംഗങ്ങള്ക്ക് ആവശ്യമായ മാനസിക പിന്തുണ നല്കുക, കുടിവെള്ളം, ആഹാരം, വിദ്യാഭ്യാസം, വിവാഹം തുടങ്ങി അവരെ ബാധിച്ചിരിക്കുന്ന ശാരീരികവും മാനസികവും സാമൂഹികവും സാമ്പത്തികവുമായ അവശ്യങ്ങള് കണ്ടെത്തുകയാണ് ഇവര് ചെയ്യുന്നത്. ഈ കൗണ്സിലര്മാര് ശേഖരിച്ച വിവരത്തിന്റെയടിസ്ഥാനത്തില് അരോഗ്യ, സാമൂഹ്യനീതി വകുപ്പ് മറ്റ് വിഭാഗങ്ങളെ ഏകോപിപ്പിച്ച് അവരുടെ പ്രശ്നങ്ങള്ക്ക് പരിഹാരം കാണും. മാത്രമല്ല മാനസികാരോഗ്യ സേവനങ്ങള് ആവശ്യമുള്ളവര്ക്ക് അതിനുള്ള സൗകര്യവും ഉണ്ടാക്കിക്കൊടുക്കും. മൂന്നുമുതല് 6 മാസം വരെ ദീര്ഘ കാലത്തേക്ക് ഈ സേവനങ്ങള് നല്കേണ്ടിവരും.
കൗണ്സിലര്മാര്, വോളന്ററി കൗണ്സിലര്മാര് ഉള്പ്പെടെ 80-തോളം പേര് പരിശീലനത്തില് പങ്കെടുത്തു. ആരോഗ്യ വകുപ്പ് അഡീഷണല് ചീഫ് സെക്രട്ടറി രാജീവ് സദാനന്ദന്, സാമൂഹ്യനീതി വകുപ്പ് ഡയറക്ടര് നൂഹുബാവ, സാമൂഹ്യ സുരക്ഷാ മിഷന് എക്സിക്യൂട്ടീവ് ഡയറക്ടര് ഡോ. മുഹമ്മദ് അഷീല്, മാനസികാരോഗ്യ സംസ്ഥാന നോഡല് ഓഫീസര് ഡോ. കിരണ് പി.എസ്., ഡി.പി.എം. ഡോ. സ്വപ്ന കുമാരി, മെന്റല് ഹെല്ത്ത് അതോറിറ്റി സംസ്ഥാന സെക്രട്ടറി ഡോ. ജയപ്രകാശന് കെ.പി., പേരൂര്ക്കട മാനസികാരോഗ്യ കേന്ദ്രം സൂപ്രണ്ട് ഡോ. സാഗര്, മെഡിക്കല് കോളേജ് മാനസികാരോഗ്യ വിഭാഗം പ്രൊഫസര് ഡോ. അനില്കുമാര് ടി.വി., മെഡിക്കല് കോളേജ് ആര്.എം.ഒ. ഡോ. മോഹന് റോയ് എന്നിവര് പരിശീലനങ്ങള്ക്ക് നേതൃത്വം നല്കി.
ഓഖി ദുരന്തം ഉണ്ടായപ്പോള് തന്നെ ആരോഗ്യ വകുപ്പിന്റെ നേതൃത്വത്തില് ശക്തമായ പ്രവര്ത്തനങ്ങളാണ് നടത്തിയത്. ദുരന്തമുണ്ടായ സ്ഥലങ്ങളിലെ പ്രാഥമികാരോഗ്യ കേന്ദ്രങ്ങളില് വൈകുന്നേരം വരെ ഡോക്ടര്മാരുടെ സേവനം ലഭ്യമാക്കി. സാമൂഹികാരോഗ്യ കേന്ദ്രങ്ങള്, ജനറല് ആശുപത്രി, ഫോര്ട്ട് ആശുപത്രി, മെഡിക്കല് കോളേജ് എന്നിവിടങ്ങളില് ചികിത്സ തേടിയെത്തിയവര്ക്ക് മതിയായ ചികിത്സാ സൗകര്യങ്ങളും ഭക്ഷണവും ലഭ്യമാക്കിക്കൊടുക്കുകയും മാനസികാരോഗ്യ വിദഗ്ധന്റെ സേവനം നല്കുകയും ചെയ്തിരുന്നു.
https://www.facebook.com/Malayalivartha
