ഉമ്മന്ചാണ്ടി - ചെന്നിത്തല യുദ്ധം, മുരളീധരനും വാഴയ്ക്കനും തമ്മിലായി വളര്ന്നു, ഇരുഗ്രൂപ്പുകളും ലക്ഷ്യം വയ്ക്കുന്നത് അടുത്ത മുഖ്യമന്ത്രി കസേര
കരുണാകരനെ ചൊല്ലി കോണ്ഗ്രസില് ഗ്രൂപ്പ് പോര് ശക്തമാകുന്നു. ചാരക്കേസില് കെ.കരുണാകരനെതിരെ തിരിഞ്ഞതില് ഖേദമുണ്ടെന്ന് കെ.പി.സി.സി പ്രസിഡന്റ് എം.എം ഹസന് വെളിപ്പെടുത്തിയതിന് പിന്നാലെയാണ് പോര് മുറുകിയത്. ചാരക്കേസില് വീണ്ടും വിവാദം സൃഷ്ടിക്കേണ്ട കാര്യമില്ലെന്ന് ആദ്യം പറഞ്ഞ മുരളീധരന് കഴിഞ്ഞദിവസം കോഴിക്കോട്ട് നടത്തിയ പ്രസ്താവനയാണ് എ, ഐ ഗ്രൂപ്പ് യുദ്ധത്തിന് കളമൊരുക്കിയത്. കരുണാകരനൊപ്പം ഒരു ഇലയില് ഭക്ഷണം കഴിച്ചവര് വരെ കാല് വരിയെന്നും അങ്ങനെ നോക്കുമ്പോള് പടയൊരുക്കം സി.പി.എമ്മിനും ബി.ജെ.പിക്കും എതിരെയല്ല കോണ്ഗ്രസിലെ ചിലര്ക്കെതിരെയാണ് നടത്തേണ്ടതെന്ന് മുരളീധരന് ചൂണ്ടിക്കാട്ടിയിരുന്നു. ഇതോടെ പണ്ട് അമ്പ് രമേശ് ചെന്നിത്തലയ്ക്കെതിരെ തിരിയുകയായിരുന്നു.
ചെന്നിത്തലയും കരുണാകരനും മുമ്പ് ഒരിലയില് ഭക്ഷണം കഴിക്കുന്ന ഫോട്ടോസ് സോഷ്യല്മീഡിയയില് വയറലായി. ചെന്നിത്തലയ്ക്കെതിരെ ആരോപണങ്ങള് ഉണ്ടായി. ഇതോടെ ഐ ഗ്രൂപ്പ് നേതാവ് ജോസഫ് വാഴയ്ക്കന് കെ.മുരളീധരനെതിരെ രംഗത്ത് വരുകയായിരുന്നു. ലീഡറെ ഏറ്റവും കൂടുതല് വിഷമിപ്പിച്ചത് കെ.മുരളീധരനാണെന്നും ഒരിക്കലും പറയാന്പാടില്ലാത്ത വാക്കുകള് വരെ മുരളി അദ്ദേഹത്തെ കുറിച്ച് പറഞ്ഞെന്നും വാഴയ്ക്കന് മാധ്യമങ്ങളോട് വ്യക്തമാക്കി. ഈ വിഷയത്തില് ഇനി കക്ഷിചേരാനില്ലെന്ന് മുരളീധരന് പ്രതികരിച്ചു. ഉമ്മന്ചാണ്ടിയെ കോണ്ഗ്രസ് പ്രവര്ത്തകസമിതി അംഗമാക്കുന്നതിന് തടയിടാന്, എ.കെ ആന്റണിയുടെ നിര്ദ്ദേശപ്രകാരം എം.എം ഹസന് പ്രസ്താവന നടത്തുകയായിരുന്നെന്ന് അറിയുന്നു.
കെ.മുരളീധരനെ കെ.പി.സി.സി അധ്യക്ഷപദവിയിലേക്ക് കൊണ്ടുവരാന് ഉമ്മന്ചാണ്ടി നടത്തുന്ന ശ്രമങ്ങള്ക്ക് തടയിടാന് ചെന്നിത്തലയും വാഴയ്ക്കനും അടക്കമുള്ള ഐ ഗ്രൂപ്പും ഉമ്മന്ചാണ്ടി പക്ഷത്തെ എം.എം ഹസനും അടക്കമുള്ളവര് കിണഞ്ഞ് പരിശ്രമിക്കുകയാണ്. സോളാര് കേസില് സി.പി.എം ഉമ്മന്ചാണ്ടിയെ കുടുക്കാന് ശ്രമിക്കുമ്പോള് പരസ്യപിന്തുണയുമായി മുരളീധരന് കൂടെയുണ്ട്. മാത്രമല്ല പ്രതിപക്ഷനേതാവിന്റെ പ്രവര്ത്തനം കാര്യക്ഷമമല്ലെന്ന രീതിയില് മുരളീധരന് പ്രസ്താവനയും നടത്തിയിരുന്നു. ഇതോടെയാണ് ചെന്നിത്തല മുരളീധരനെതിരെ നീക്കങ്ങള് തുടങ്ങിയത്. ഇരുവരും മുമ്പേ അത്ര രസത്തിലല്ല.
കരുണാകരനെതിരെ ചാരക്കേസ് ആരോപണത്തിന്റെ പുകമറ സൃഷ്ടിച്ച് , മുഖ്യമന്ത്രി കസേരയില് നിന്ന് തെറിപ്പിച്ചതില് പ്രധാനി ഉമ്മന്ചാണ്ടിയാണ്. ഇപ്പോഴത്തെ രാഷ്ട്രീയ കാലാവസ്ഥയില് അതെല്ലാം മറന്ന് പ്രായോഗികതയുമായി മുന്നേറുക എന്ന തന്ത്രമാണ് കെ.മുരളീധരന് പയറ്റുന്നത്. മുരളിയെ പ്രസിഡന്റായി കൊണ്ടുവന്ന് പാര്ട്ടിയില് കൂടുതല് ശക്തനാകാനുളള ശ്രമമാണ് ഉമ്മന്ചാണ്ടി നടത്തുന്നത്. ചെന്നിത്തലയാകട്ടെ ഹൈക്കമാന്ഡിലുള്ള സ്വാധീനം ഉപയോഗിച്ച് കരുത്ത് കാട്ടാനാണ് നോക്കുന്നത്. രണ്ട് പേരുടെയും ലക്ഷ്യം അടുത്ത നിയമസഭാ തെരഞ്ഞെടുപ്പും അതിന് ശേഷമുള്ള മുഖ്യമന്ത്രി കസേരയുമാണ്.
https://www.facebook.com/Malayalivartha
