നികുതി വെട്ടിപ്പ്: പുതുച്ചേരി രജിസ്ട്രേഷന് സ്വന്തമാക്കി കേരളത്തില് വിലസുന്ന വാഹനങ്ങള്ക്ക് ട്രാന്സ്പോര്ട്ട് കമീഷണറേറ്റിന്റെ അന്ത്യശാസനം
നികുതി വെട്ടിപ്പുനടത്തി പുതുച്ചേരി രജിസ്ട്രേഷന് സ്വന്തമാക്കി കേരളത്തില് വിലസുന്ന വാഹനങ്ങള്ക്ക് ട്രാന്സ്പോര്ട്ട് കമീഷണറേറ്റിന്റെ അന്ത്യശാസനം. ഈ മാസം 15നകം നികുതിയടച്ച് കേരളത്തിലേക്ക് രജിസ്ട്രേഷന് മാറ്റിയില്ലെങ്കില് വാഹനം പിടിച്ചെടുക്കുമെന്നാണ് മുന്നറിയിച്ച്. ഒപ്പം റവന്യൂ റിക്കവറിയും നിയമനടപടികളുമുണ്ടാകും. വ്യാജരേഖ ഹാജരാക്കി നികുതി തട്ടിപ്പ് നടത്തിയെന്ന നിലക്കാവും ഇത്തരം കേസുകള് പരിഗണിക്കുക.
പുതുച്ചേരി രജിസ്ട്രേഷന് നേടിയ രണ്ടായിരത്തോളം വാഹനങ്ങള് കേരളത്തിലുണ്ടെന്ന് മോട്ടോര്വാഹന വകുപ്പ് കണ്ടെത്തിയിരുന്നു. നികുതിയടച്ച് കേരളത്തിലേക്ക് രജിസ്ട്രേഷന് മാറ്റുന്നതിന് ഇവര്ക്കെല്ലാം നോട്ടീസ് നല്കിയിരുന്നു. എന്നാല്, പല ഉടമകളും നികുതി അടക്കുന്നതിന് ഇനിയും തയാറായിട്ടില്ല. ഈ മാസം 15വരെ നികുതിയടക്കുന്നതിന് സാവകാശം നല്കാനും ശേഷം കര്ശനനടപടിയിലേക്ക് നീങ്ങാനുമാണ് ആര്.ടി.ഒമാര്ക്കും ജോയന്റ് ആര്.ടി.ഒമാര്ക്കും നിര്ദേശം നല്കിയിരിക്കുന്നത്.
നികുതിയടക്കുന്നതിന് പ്രത്യേകം സംവിധാനമൊരുക്കും. മോട്ടോര് വാഹനവകുപ്പ് ഉദ്യോഗസ്ഥര് പുതുച്ചേരിയിലെത്തി നടത്തിയ പരിശോധനയിലാണ് തട്ടിപ്പ് കണ്ടെത്തിയത്. നികുതി തട്ടിപ്പ് നടത്തുന്ന വാഹന ഉടമകളെ നിയമപരമായി കുടുക്കാന് വാഹനം രജിസ്റ്റര് ചെയ്ത മേല്വിലാസത്തിലേക്ക് രജിസ്ട്രേഡ് കത്തയച്ചിരുന്നു. രാഷ്ട്രീയക്കാരും വ്യവസായ സിനിമ മേഖലയിലെ പ്രമുഖരുമാണ് നികുതിവെട്ടിപ്പുകാരില് നല്ലൊരു ശതമാനവും. ഡീലര്മാര് വഴിയാണ് അധികവും വ്യാജ രജിസ്ട്രേഷന് നടക്കുന്നത്. വാടകക്ക് വീടെടുത്തും ഇന്ഷുറന്സ് പോളിസി എടുത്തും വരെ വിവരം നല്കി രജിസ്ട്രേഷന് തരപ്പെടുത്തിയവരുണ്ട്.
https://www.facebook.com/Malayalivartha
