അനധികൃത ക്വാറി; പുന:പരിശോധന ഹര്ജിക്ക് പിന്നില് കോടികള്
പരിതസ്ഥിതി അനുമതിയില്ലാതെ പ്രവര്ത്തിക്കുന്ന പാറമടകള്ക്ക് ഖനനാനുമതി നല്കരുതെന്ന ഹരിത ട്രൈബ്യൂണലിന്റെ വിധിക്കെതിരെ സര്ക്കാര് പുന:പരിശോധനാ ഹര്ജി നല്കുന്നതിനു പിന്നില് മറിഞ്ഞത് കോടികള്. ഉമ്മന്ചാണ്ടി സര്ക്കാര് അധികാരത്തില് വന്നശേഷം 2146 ക്വാറികള്ക്കാണ് ഖനനാനുമതി നല്കിയത്. ഇതില് വകുപ്പുമന്ത്രി പി.കെ. കുഞ്ഞാലിക്കുട്ടിയുടെ ജില്ലയായ മലപ്പുറത്ത് മാത്രം 247 പാറമടകള്ക്കാണ് അനുമതി നല്കിയത്. ഇതിനു പിന്നില് പണത്തിന് പുറമെ ബിനാമി സ്വാധീനങ്ങളുണ്ടെന്നും ആരോപണം ഉയര്ന്നു. മന്ത്രിമാര്ക്കും ഉന്നത രാഷ്ട്രീയ നേതാക്കള്ക്കും വരെ ബിനാമി പേരില് ക്വാറികളുണ്ടെന്നാണ് ആരോപണം. പത്തനംതിട്ട, കോട്ടയം, ഇടുക്കി, മലപ്പുറം ജില്ല കമ്മിറ്റിയാണ് കൂടുതല് ക്വാറികളും പ്രവര്ത്തിക്കുന്നത്.
പരിസ്ഥിതിലോല പ്രദേശങ്ങളില് ക്വാറി പാടില്ലെന്ന് കസ്തൂരിരംഗന് റിപ്പോര്ട്ടില് ചൂണ്ടി കാണിച്ചിട്ടുണ്ട്. ദേശീയ ഹരിത ട്രൈബ്യൂണല് ഇക്കാര്യത്തില് കര്ശനമായ നിലപാടാണ് പിന്തുടരുന്നത്. പരിസ്ഥിതി അനുമതിയും മലിനീകരണ നിയന്ത്രണ ബോര്ഡിന്റേയും അനുമതിയില്ലാതെ പ്രവര്ത്തിക്കുന്ന പാറമടകളെയാണ് ട്രൈബ്യൂണലിന്റെ ഉത്തരവ് ബാധിക്കുകയെന്നിരിക്കെ നിയമലംഘനം നടത്തുന്നവര്ക്കെതിരെ സര്ക്കാര് എന്തിനുവേണ്ടിയാണ് കോടതിയെ സമീപിക്കുന്നതെന്ന് ആര്ക്കും മനസിലാവുന്നില്ല. 3500 പാറമടകളാണ് സംസ്ഥാനത്ത് പ്രവര്ത്തിക്കുന്നത്. ഇതില് കാല്ഭാഗത്തിനു പോലും ലൈസന്സില്ല. ഗാഡ്ഗില്, കസ്തൂരിരംഗന് റിപ്പോര്ട്ടുകള് നടപ്പിലാക്കുകയാണെങ്കില് 123 വില്ലേജുകളില് പ്രവര്ത്തിക്കുന്ന പാറമടകളെ ദോഷകരമായി ബാധിക്കും.
വികസന പ്രവര്ത്തനത്തിന് കോടതി വിധി തടസം നില്ക്കുമെന്നാണ് സര്ക്കാര് വാദം. കൊച്ചി മെട്രോ ഉള്പ്പെടെയുള്ള പ്രവര്ത്തനങ്ങള് നിര്മ്മാണ സാമഗ്രികള് ഇല്ലാത്തതു കാരണം നിര്ത്തി വച്ചിരിക്കുകയാണെന്ന മട്ടിലാണ് വാര്ത്തകള് പ്രചരിക്കുന്നത്. അടിയന്തിരമായി നിര്മ്മാണം നടക്കുന്ന സര്ക്കാര് പദ്ധതികള് നിര്ത്തി വയ്ക്കാന് രഹസ്യ നിര്ദ്ദേശങ്ങള് പോയിട്ടുണ്ടെന്ന് പറയുന്നു. കല്ലും മണ്ണുമൊന്നും ഇറക്കേണ്ടതില്ലെന്ന് പറയുന്നത് സര്ക്കാരിലെ ഉന്നതര് തന്നെയാണെന്ന് സൂചനയുണ്ട്. എങ്ങനെയെങ്കിലും നിര്മ്മാണം തടസ്സപ്പെടണമെന്നാണ് സര്ക്കാരിന്റെ ലക്ഷ്യം. അങ്ങനെ വന്നാല് പരിസ്ഥിതിലോല പ്രദേശങ്ങളിലും ഖനനാനുമതി ലഭിക്കുമെന്നാണ് ക്വാറി ഖനന മാഫിയ കരുതുന്നത്.
ക്വാറി മുതലാളിമാര്ക്ക് ഇടതുവലതു സര്ക്കാരുകളില് വ്യക്തമായ സ്വാധീനമുണ്ട്. പണമാണ് ഇത്തരം സ്വാധീനങ്ങളുടെ അടിസ്ഥാനം. ഉന്നതരും ക്വാറി ലോബിയും തമ്മിലുള്ള അവിശുദ്ധ ബന്ധം ഇന്നോ ഇന്നലെയോ തുടങ്ങിയതല്ല. ഓരോ തവണയും തെരഞ്ഞെടുപ്പ് വരുമ്പോഴാണ് ഇവര് തമ്മിലുള്ള ബന്ധം കൂടുതല് ദൃഢതരമാകുന്നത്. ക്വാറിമുതലാളിമാരെ പ്രതിസന്ധിയിലാക്കിയും സര്ക്കാര് പണം കൊയ്യാറുണ്ട്. ക്വാറികളുടെ പ്രവര്ത്തനാനുമതിയെ കുറിച്ച് ആശങ്കകള് ഉയര്ത്തി വിട്ടാണ് രാഷ്ട്രീയ മേലാളന്മാര് പണം ഒഴുക്കുന്നത്. ഏതായാലും പുന:പരിശോധനാ ഹര്ജി നല്കാനുള്ള തീരുമാനം സര്ക്കാര് എടുത്തു കഴിഞ്ഞു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
