ശമ്പളമില്ലാതെ വീട്ടിലിരിക്കുന്ന മാധ്യമപ്രവര്‍ത്തകന്റെ അക്കൗണ്ടില്‍ മാസാവസാനം പണമെത്തി, അക്കൗണ്ടില്‍ നോക്കിയപ്പോള്‍ ബള്‍ക്ക് ഡേപ്പോസിറ്റ് ബൈ സാലറി എന്ന് കണ്ട് ഞെട്ടി. മാധ്യമപ്രവര്‍ത്തകനും എഴുത്തുകാരനുമായ ടി.സി രാജേഷിന്റെ അക്കൗണ്ടിലേക്കാണ് പണമിട്ടത്.
'എനിക്കൊരു ജോലി കിട്ടി. എവിടെയാണെന്നോ, എന്താണ് ജോലിയെന്നോ അറിയില്ല. ഇന്നലെ അക്കൗണ്ടില്‍ ശമ്പളം വന്നപ്പോഴാണ് അറിഞ്ഞത്. ശമ്പളം തന്ന ആ മഹാമനസ്‌കരെ അന്വേഷിച്ചിട്ട് കണ്ടെത്താനും കഴിഞ്ഞിട്ടില്ല' എന്നാണ് രാജേഷ് ഫെയിസ് ബുക്കിലൂടെ അറിയിച്ചത്.

അത്ര മോശമല്ലാത്ത ഒരു തുക അക്കൗണ്ടില്‍ വീണപ്പോള്‍ അത്ഭുതപ്പെട്ടു. കിട്ടാനുള്ള പണമൊന്നുമല്ലെന്ന് മനസ്സിലാക്കി അക്കൗണ്ടില്‍ കയറി നോക്കിയപ്പോഴാണ് സാലറി ആണെന്ന് കണ്ടത്. അങ്ങനെയൊരു ശമ്പളം കിട്ടാന്‍ എനിക്കൊരിടത്തും സമീപനാളില്‍ അപ്പോയിന്‍മെന്റ് ലഭിച്ചതായി ഇന്നുവരെ അറിയുകയുമില്ല. തുടര്‍ന്ന് രാജേഷ് ഇന്നു രാവിലെ എസ്ബിഐയില്‍ ചെന്ന് അന്വേഷിച്ചു. ഏതാണ് കമ്പനിയെന്നറിഞ്ഞാല്‍ നാളെ മുതലെങ്കിലും പോയി ജോലി ചെയ്തു തുടങ്ങാമെന്നു കരുതി. പക്ഷേ, ബാങ്കുകാര്‍ക്കും യാതൊരു പിടിയുമില്ല. ഏത് ബാങ്കിന്റെ, ഏതു ബ്രാഞ്ചില്‍ നിന്നാണ് പണം അക്കൗണ്ടില്‍ വന്നിരിക്കുന്നതെന്നുപോലും അറിയാനുള്ള മാര്‍ഗമില്ലത്രെ. ഇനിയിപ്പോ ആര്‍ക്കെങ്കിലും അബദ്ധം പറ്റിയതാണെങ്കില്‍ തിരികെ നല്‍കി മാതൃകയാകാമെന്നു കരുതിയപ്പോള്‍ അതും പറ്റില്ലെന്ന്. ഐ.ടി റിട്ടേണ്‍ കൊടുക്കുമ്പോള്‍ പൈസയുടെ സോഴ്‌സ് കാണിക്കേണ്ടേയെന്ന് ചോദിച്ചപ്പോഴും ബാങ്കുകാര്‍ കൈമലര്‍ത്തി. നമ്മുടെ അക്കൗണ്ടില്‍ ആരെങ്കിലും പണമിട്ടാല്‍ അതാരിട്ടുവെന്നറിയാന്‍ മാര്‍ഗമില്ലെന്നര്‍ത്ഥം!

തല്‍ക്കാലം പൈസ അക്കൗണ്ടില്‍ നിന്ന് എടുക്കേണ്ടെന്നും അബദ്ധം പറ്റിയവര്‍ അന്വേഷിച്ചെത്തുമെന്നുമാണ് ബാങ്കില്‍ നിന്നു കിട്ടിയ ഉപദേശം. കാശിന് നല്ല അത്യാവശ്യമുള്ള സമയമാണ്. അക്കൗണ്ടില്‍ മിനിമം ബാലന്‍സ് പോലും സൂക്ഷിക്കാന്‍ പറ്റുന്നില്ല. അപ്പോഴാണ് സാലറിയായി ആരോ ഇട്ടുതന്ന പൈസ എടുക്കരുതെന്ന് ബാങ്കിന്റെ ഉപദേശം. മാസാദ്യമല്ലേ, ഞാനെന്തായാലും കാശെടുക്കാന്‍ പോകുകയാണ്. പണം നഷ്ടപ്പെട്ട ഹതഭാഗ്യര്‍ ആരെങ്കിലും തെളിവു സഹിതം അന്വേഷിച്ചെത്തിയാല്‍ അപ്പോള്‍ തിരിച്ചുകൊടുക്കാം. അല്ലെങ്കില്‍, ആള്‍ അന്വേഷിച്ചു വരില്ലെന്നുറപ്പായാല്‍ എന്തെങ്കിലും ചാരിറ്റിയിലേക്ക് വകമാറ്റുകയും ചെയ്യാം. തല്‍ക്കാലം പണം ബാങ്കില്‍ ഇട്ടേക്കുന്നില്ല....