സര്‍ക്കാര്‍ ജീവനക്കാരുടെ പ്രമോഷന്‍, ട്രാന്‍സ്ഫര്‍, ഡെപ്യൂട്ടേഷന്‍ എന്നീ കാര്യങ്ങളില്‍ പാര്‍ട്ടി ഇടപെടരുത്, പൊലീസിനെ നിര്‍വീര്യമാക്കുന്ന നടപടികള്‍ ഉണ്ടാകരുതെന്നും കോടിയേരി
പാര്‍ട്ടി പ്രവര്‍ത്തകര്‍ സര്‍ക്കാരിന്റെ ദൈനംദിന പ്രവര്‍ത്തികളിലടക്കം ഇടപെടരുതെന്ന് സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്‍. സി.പി.എം തിരുവനന്തപുരം ജില്ലാ സമ്മേളനത്തില്‍ പ്രതിനിധികളോട് സംസാരിക്കുകയായിരുന്നു അദ്ദേഹം. സര്‍ക്കാര്‍ ജീവനക്കാരുടെ പ്രമോഷന്‍, ട്രാന്‍സ്ഫര്‍, ഡെപ്യൂട്ടേഷന്‍ എന്നീ കാര്യങ്ങളില്‍ ഇടപെടരുത്. പൊലീസിനെ നിര്‍വീര്യമാക്കുന്ന നടപടികള്‍ ഉണ്ടാകരുത്. ആര്‍.എസ്.എസും ബി.ജെ.പിയും അതിനാണ് ശ്രമിക്കുന്നത്. സാധാരണ പൗരന്‍മാരെ പോലെ പാര്‍ട്ടി പ്രവര്‍ത്തകരും പൊലീസ് സ്റ്റേഷനുകളില്‍ ചെല്ലാവൂ എന്നും കോടിയേരി നിര്‍ദ്ദേശിച്ചു.
ഇതുവരെയുള്ള സി.പി.എമ്മിന്റെ പ്രവര്‍ത്തന രീതിയനുസരിച്ച് പാര്‍ട്ടിയായിരുന്നു ഭരണം നടത്തിയിരുന്നത്. പ്രധാനപ്പെട്ട എല്ലാ ഫയലുകളും എ.കെ.ജി സെന്ററില്‍ എത്തിച്ച് സംസ്ഥാന സെക്രട്ടറി കാണാതെ മുഖ്യമന്ത്രിയോ, മറ്റ് മന്ത്രിമാരോ ഒപ്പിട്ടിരുന്നില്ല. എന്നാല്‍ മുഖ്യമന്ത്രിക്ക് വിധേയനായ കോടിയേരി ബാലകൃഷ്ണന്‍ അതെല്ലാം കാറ്റില്‍ പറത്തി.
നേമത്ത് സിപിഎ തോറ്റത് ജനാധിപത്യത്തിന്റെ മുഖത്ത് പുരണ്ട കരിയാണെന്ന് പ്രവര്‍ത്തന റിപ്പോര്‍ട്ടില്‍ കുറ്റപ്പെടുത്തുന്നു. യുഡിഎഫിന്റെ വോട്ടുകൊണ്ടാണ് ബിജെപി ജയിച്ചതെന്ന വിലയിരുത്തല്‍ ശരിയല്ല. സംഘടനാ ദൗര്‍ബല്യവും പ്രവര്‍ത്തന രാഹിത്യവും കാരണമായി. പ്രശ്‌നം അടിന്തരമായി പരിഹരിച്ചില്ലെങ്കില്‍ മണ്ഡലം എന്നന്നേക്കുമായി നഷ്ടമാകും. ബിജെപിയുടെ മുന്നേറ്റം ഗൗരവമായി കാണണം. തിരുവനന്തപുരം കോര്‍പ്പറേഷനില്‍ പ്രതിപക്ഷത്തിരിക്കുന്ന സാഹചര്യം ഗൗരവമുള്ളതാണ്. ഹിന്ദുത്വ രാഷ്ടീയത്തില്‍ സിപിഎം സ്വാധീനമേഖലയില്‍ പോലും വോട്ടു നഷ്ടപ്പെടുന്നു. വര്‍ഗ്ഗ ബഹുജന സംഘടനകളിലും ഈ പ്രവണതയുണ്ടെന്നും റിപ്പോര്‍ട്ട് വ്യക്തമാക്കുന്നു.
സിപിഐക്കെതിരെയും റിപ്പോര്‍ട്ടില്‍ രൂക്ഷവിമര്‍ശനമുണ്ട്. സിപിഐക്ക് ജില്ലയില്‍ വലിയതോതില്‍ അണികളില്ല. മാധ്യമങ്ങളുടെ സഹായത്തോടെ വിവാദമുണ്ടാക്കി സിപിഐ ഊര്‍ജ്ജം കണ്ടെത്തുന്നു. ഓഖിയില്‍ സഭക്കെതിരെ സിപിഎം പാര്‍ട്ടിയെ ഇകഴ്ത്തുന്ന രീതിയില്‍ വികാരിമാര്‍ ഇടപെട്ടെന്നും റിപ്പോര്‍ട്ട് കുറ്റപ്പെടുത്തുന്നു.
https://www.facebook.com/Malayalivartha
