ആന്തരിക അവയവങ്ങള്‍ക്കും തലയുടെ പിന്‍ഭാഗത്തും ഏറ്റ മാരകമായ ക്ഷതം മൂലമാണ് പാലക്കാട്ട് അട്ടപ്പാടിയില്‍ മധു മരണപ്പെട്ടതെന്ന് പോസ്റ്റുമോര്‍ട്ടത്തില്‍ വ്യക്തമായെന്ന് മുഖ്യമന്ത്രി നിയമസഭയെ അറിയിച്ചു. മരണകാരണം ക്രൂരമായ മര്‍ദ്ദനമാണെന്ന് അന്വേഷണത്തില്‍ വെളിവായതിനാല്‍ കൊലപാതകം, പട്ടികജാതിപട്ടികവര്‍ഗ്ഗ പീഡന നിരോധന നിയമം, വനനിയത്തിലെ വകുപ്പുകള്‍, ഐ.ടി. നിയമത്തിലെ വകുപ്പുകള്‍ എന്നിവ ചേര്‍ത്ത് അഗളി പൊലീസ് സ്‌റ്റേഷനില്‍ കേസ്സെടുത്തു. മണിക്കൂറുകള്‍ക്കകം കോയമ്പത്തൂര്‍, പാലക്കാട്, ചാവക്കാട്, തൃശ്ശൂര്‍ എന്നിവിടങ്ങളില്‍ നിന്നും 16 പ്രതികളെ അറസ്റ്റു ചെയ്ത് കോടതി മുമ്പാകെ ഹാജരാക്കി റിമാന്റ് ചെയ്തിട്ടുണ്ട്. അഗളി ഡി.വൈ.എസ്.പി കേസിന്റെ അന്വേഷണം നടത്തിവരുന്നു.

വനംവകുപ്പ് ഉദ്യോഗസ്ഥര്‍ക്കാര്‍ക്കെങ്കിലും മധുവിന്റെ മരണത്തില്‍ പങ്കുണ്ടോയെന്ന കാര്യവും പ്രതികള്‍ക്ക് അനുമതിയില്ലാതെ വനത്തില്‍ പ്രവേശിക്കാന്‍ കൂട്ടുനിന്നോയെന്നും അന്വേഷിക്കാന്‍ പ്രിന്‍സിപ്പല്‍ ചീഫ് കണ്‍സര്‍വേറ്റര്‍ ഓഫ് ഫോറസ്റ്റിനെ (വിജിലന്‍സ്) ചുമതലപ്പെടുത്തിയിട്ടുണ്ട്. മൂന്നു ദിവസത്തിനകം റിപ്പോര്‍ട്ട് സമര്‍പ്പിക്കാന്‍ നിര്‍ദ്ദേശിച്ചിട്ടുണ്ട്. ആരെങ്കിലും കുറ്റക്കാരെന്ന് കണ്ടെത്തിയാല്‍ കര്‍ശന നടപടി സ്വീകരിക്കുന്നതാണ്. മധുവിന്റെ അമ്മയ്ക്ക് 10 ലക്ഷം രൂപ പ്രത്യേക സഹായമായി മുഖ്യമന്ത്രിയുടെ ദുരിതാശ്വാസനിധിയില്‍ നിന്നും അനുവദിച്ചിട്ടുണ്ട്. ഈ തുക അടിയന്തരമായി കുടുംബത്തിന് നല്‍കുന്നതിനുള്ള നിര്‍ദ്ദേശം നല്‍കിയിട്ടുണ്ട്. അതിനു പുറമെ എട്ടേകാല്‍ ലക്ഷം രൂപ പട്ടികജാതി പട്ടികവര്‍ഗ്ഗ പീഡനനിരോധന നിയമവ്യവസ്ഥ അനുസരിച്ച് നല്‍കും. അതിന്റെ ആദ്യ ഗഡു നാലേകാല്‍ ലക്ഷം രൂപ മന്ത്രി എ.കെ. ബാലന്‍ കഴിഞ്ഞ ദിവസം കുടുംബത്തെ ഏല്‍പ്പിച്ചിട്ടുണ്ട്. കുറ്റപത്രം സമര്‍പ്പിച്ചാല്‍ അവശേഷിക്കുന്ന തുക നല്‍കും.

ചിണ്ടക്കി ഊര് നിവാസിയായ മധുവിനെ മോഷണക്കുറ്റം ആരോപിച്ച് നാട്ടുകാര്‍ മുക്കാലി ജംഗ്ഷനില്‍ പിടിച്ചുവച്ചിട്ടുണ്ടെന്ന വിവരം സംഭവ ദിവസം ഉച്ചയ്ക്ക് 2.15ഓടെ അഗളി പോലീസ് സ്‌റ്റേഷനില്‍ ലഭിച്ചു. പട്രോളിംഗ് ഡ്യൂട്ടിയിലുണ്ടായിരുന്ന അഡീഷണല്‍ സബ് ഇന്‍സ്‌പെക്ടറും സംഘവും ഉടനെ മുക്കാലി ജംഗ്ഷനിലെത്തി. നാട്ടുകാര്‍ ചേര്‍ന്ന് ബസ് വെയിറ്റിംഗ് ഷെഡ്ഡില്‍ ഇരുത്തിയിരുന്ന മധുവിനെ പോലീസ് ജീപ്പില്‍ കയറ്റി. അവശനായിരുന്ന മധുവിനെ വൈദ്യപരിശോധനയ്ക്കായി അഗളി സി.എച്ച്.സിയിലേക്ക് കൊണ്ടുപോകുമ്പോള്‍ മധു ഛര്‍ദ്ദിക്കുകയും പോലീസ് ജീപ്പില്‍ അബോധാവസ്ഥയിലാവുകയും ചെയ്തു. അഗളി സി.എച്ച്.സിയില്‍ എത്തിയപ്പോഴെക്കും മധു മരണപ്പെട്ടതായി ഡോക്ടര്‍ സ്ഥിരീകരിക്കുകയായിരുന്നു.